[惡搞無極限] 就係咁，我同幾個豬朋上左大陸獵金: ８２　我無事，你放心

今早呢段路程，我係用一個擔心既心情去坐，而知道左勞斯萊斯一Ｄ故事後，我就無太拘緊，而且好放心咁坐上左佢既粉紅色私家車。 

聽完勞斯萊斯既故事後，我都諗緊，如果一個女仔肯為一個男人放棄自己既身份，甚至為一個男人改變自己性取向，其實係要用好大既勇氣同埋堅持。 

愛能夠成為所有野既動力，其實，係好事，定係一件壞事？ 

呢一程車我好平靜咁坐，無理會好ＨＩＧＨＥＲ　既勞斯萊斯同阿俊，我睇住車出面既風景，諗起阿欣。 

唔知，佢發現搵唔到我時，佢會有咩反應…… 





我係唔係應該話佢知我而家既去向…… 

我地到左賓館，亦都好順利咁拎到自己既行李，再返去「英紅吧」。 

呢一晚，比我想像中平靜。勞斯萊斯幫我同阿俊分別安排左一間房休息，而我呢間房個窗，咁岩可以望到個月光。 

我拎係帶左上黎既電話，換左飛機卡後，我開左ＷＨＡＴＳＡＰＰ，可能一日幾無開，Ｄ　ＭＳＧ　竟然多到彈ＡＰＰＳ。 

等我再入返個ＡＰＰＳ　果陣，原來阿欣已經ＳＤ三千幾封ＭＳＧ　比我。 





果一刻，我微笑左一下，然後，回左一個ＭＳＧ，「我無事，妳放心。」 

關左個ＡＰＰＳ，我繼續望住個月光，隔左陣，我聽到一把好熟既尖叫聲音。 

個把聲我認得出，係阿俊……