<第叄期實體書,經已有售>今年我三十三歲,回到了1998年 (校園、穿越、奇幻): Chapter　１２５　男兒志

 
Chapter　１２５　男兒志
 
謝師宴曲終人散，郭左杰等人提議唱Ｋ作為餘興節目，可是我以明天要上班為由婉拒。
 
姚智風道：「喂！難得今日咁人齊，唔好咁掃興啦！下次咁齊人都唔知要等到幾時喇。」
 
「我同你都仲係住喺石梨，以後大把機會啦！」
 
我拒絕姚智風的主要原因，並不是因為明天要上班，而是布正麗穿得這樣惹人犯罪，我怕有人按捺不住，向她施以綠山之爪，於是充當起護花使者的責任，把她安全送回家。




 
我們上了去石梨的小巴並肩而座，我道：「宛琳珊係咁，妳又係咁，係咪個個女仔都會係謝師宴扮到鬼火咁靚出席？」
 
布正麗嗆道：「依啲日子緊係要打扮下架啦！唔單止我地啲女人係咁，你啲男人咪又係咁，你身上嗰套ARMANI起碼成皮野啦！」
 
布正麗的回應，讓我感到有點尷尬，我轉移話題道：「係呢！妳份工做得慣唔慣啊？」
 
「啲野開始上手，都ＯＫ啊！」
 
我們沉默了一會，布正麗才道：「係呢！聽madam講，湯仲謀單案過幾日就要上庭，你準備成點啊？」




 
布正麗這麼一提，我才記起數天後要出庭作證。
 
「依啲野都係講返當時嘅情況啫，唔駛點特別準備架！」
 
下車後，我打算做好人做到底，把布正麗送回家，布正麗道：「唔駛啦！我老豆會嚟接我架喇！」
 
我看見布正麗的爸爸真的出現在車站，想起那次她爸爸以為我佔了她便宜，差點要把我生劏，我便不禁有點悚懼。
 
「哦！咁好啦！再見。」




 
我轉身離去，布正麗從後喊道：「成皇志！」
 
我別過頭回望，有點奇怪地打量著她。
 
布正麗問道：「頭先你話依兩年入面，認識到好嘅人，我係咪其中一個好人啊？」
 
我聞言笑了笑地點頭，道：「係啊！我好慶幸認識到妳啊！」
 
布正麗笑道：「我都一樣啊！」
 
＊＊＊
 
明日就是會考放榜的日子，這晚我與郭左杰一行十多人相約在城門水塘燒烤，打算整晚也留在這裡不回家，待明日一早便到學校拿成績單。
 




儘管郭左杰與姚智風二人口中都說會出來工作，對明日的會考放榜並不緊張，可是他們還是著意自己的成績。
 
我道：「你地期望會考有幾多分啊？」
 
郭左杰道：「我諗衰極都有五分六分啩！」
 
姚智風聞言，冷笑道：「你有五六分嘅話，我起碼有十分啦！」
 
黎早強逞強道：「姚智風，如果你都有十分嘅話，我直情可以升中六添啦！」
 
在旁的林海原道：「唓！大鳩志，你同依官兩個根本都唔洗擔心啦！以你地嘅成績肯定可以原校升中六啦！」
 
陳依官擔憂道：「唔係啊！我數學同物理無乜信心架！如果炒咗好大鑊架！」
 
霍去登熱情地搭著我的肩膀道：「鳩爺，你上次模擬試全級第一喎！你唔可以原校升，仲有邊個可以喔？抑或你想玩串啲，過去尚天或者五釀丸升中六啊？」




 
我笑著搖頭，道：「唔好玩啦！我唔會轉過去架！」
 
我並不是刻意謙虛，或者對明天的放榜沒有信心，其實我對今後的路向已經有了決定。
 
陸永祥道：「其實讀書都係為咗將來做野啫！最緊要知自己想點，我就決定咗重讀一年，有五科合格就去考警察。」
 
成敏研插言道：「阿祥，你又諗住考警察啊？我又係喎！」
 
何敏傑道：「你地都係校隊，學校有重讀位實收你地先啦！」
 
我附和道：「係啊！放心啦！你地實做到警察嘅！」
 
陸永祥可能以為我在嘲諷他，他冷哼一聲，道：「你又知，你識得預知未來啊？」
 




我心想我不是預知未來，而是從未來回來。
 
我沒好氣道：「我祝福你地啫！咁都唔啱聽，最多我收聲囉！」
 
＊＊＊
 
早上七時，我們一行人回到學校，儘管要九時才發放成績單，可是有近半同學已經回到學校了。
 
在走廊遇上了楊鳳瑤，我道：「妳咁早嘅？」
 
「我緊張到成晚瞓唔著啊！你地又咁早嘅？」
 
「我地成晚無返屋企，喺城門水塘燒野食啊！」
 
「唔怪知得你咁大陣燒野食味啦！」




 
我們回到課室，隨便找了個位子坐下，昨晚一夜無眠，我抱怨道：「成績單幾時派啊？快啲派啦，我想返屋企瞓覺啊！」
 
坐在我身旁的陳依官道：「成皇志，你唔緊張嘅咩？我依家緊張到腳震啊？我驚靜間要四圍撲學校啊？」
 
我安慰道：「你放心啦！無問題架！你一定可以原校升中六。」
 
「你安慰我咋？我對自己都無信心，點解你咁有信心嘅？」
 
「咁…不如賭餐飯喇！」
 
「我寧願輸餐飯畀你喇！」
 
「咁我多謝你餐飯先喇！」
 
之前的時空，陳依官順利原校升讀中六，我回到這個時空，激發他更加用功去唸書，他的會考成績應該只高不低。
 
早上八時三十分，班主任李老師走進課室，可是他並不是立刻派發成績單，而是領著我們走進禮堂去聽升學講座。
 
李老師經過我身旁時，悄悄地道：「成皇志，你今次會考好好成績啊！」
 
我聞言一喜，想追問自己的成績之際，李老師已經走遠。
 
在禮堂聽著無聊的專家說著沉悶的升學講座，加上很適合睡覺的舒適環境，我不自覺沉沉睡去。
 
不知過了多久，陳依官拍打我的肩膀，道：「喂！仲瞓？返課室攞成績單喇！」
 
我打了個呵欠，道：「吓！走得喇？」
 
陳依官嘀咕道：「真係服咗你，咁嘅情況都瞓得著？」
 
回到課室，李老師開始派發成績單，我是第一個拿到成績單。
 
李老師道：「成皇志同學，今次會考考得好好啊！有５Ａ１Ｂ。」
 
其他同學一臉訝異地瞧著我，我聞言亦有點難以置信，本來我預算只有生物和化學考獲Ａ級，豈料最後有五科成績達到Ａ級。
 
我接過成績單，查閱自己的成績，中文、數學、中史、生物和化學都是Ａ，其中中史、生物和化學在Ａ這個英文字母旁邊還有著星星。
 
陳依官亦探頭查看我的成績單，道：「嘩！成皇志，你有依個成績就算去安邦升中六都收你啦！」
 
李老師喊道：「陳依官同學到你攞成績單喇！」
 
陳依官接過成績單，看見自己考獲的成績，亦不禁歡呼，道：「yeah！成皇志，我雖然無你揸咁多支火箭，但係我都有二十分啊！」
 
「哦！咁你爭我一餐飯喇！」
 
李老師接著喊道：「管佳莉。」
 
管佳莉接過成績單，她在這次會考取得十八分，原校升讀中六是沒有問題的。
 
可是之後同學接過成績單後，臉上的表情都有點繃緊。
 
曾倩萍的會考成績未如理想，當場哭了出來，管佳莉見狀連忙上前安慰。
 
黎早強搖過成績單眉頭猛皺，道：「有無搞錯啊？得三分。」
 
姚智風接過成績單，搖著頭道：「點會得兩分架？」
 
郭左杰接過成績單，猛然笑道：「嘩！原來我有六條Ａ啊！」
 
郭左杰顯然在開玩笑，可是這時並沒有人去理睬他。
 
有些成績未如理想的同學，接過成績單後立刻離去，找別的學校升學或重讀。
 
這時老馮走進課室，一臉堆歡道：「成皇志，你跟一跟我嚟喔！校長想見你啊！」
 
我跟隨老馮到了校長室，校長一臉歡喜地與我握手，道：「你就係成皇志同學啊？」
 
其實之前我與校長有過數面之緣，可是他顯然對我沒有印象。
 
校長道：「成皇志同學，你今次會考成績好好，為學校爭光。係咪啊？馮老師。」
 
老馮猛然點頭道：「係啊！校長，對上有咁好成績嘅，已經要數返三十年前喇！成皇志仲要係由中一已經開始喺到讀書，更加係史無前例啊！」
 
校長滿意地點道：「成皇志同學，我地會為你向校董會申請獎學金，話晒你都喺到讀咗五年，同學校建立咗深厚嘅感情，你會繼續喺到升中六嘅。」
 
我搖了搖頭，校長見狀一驚，道：「成皇志，唔通你想去其他學校升中六？」
 
老馮急道：「成皇志，你係咪有啲咩難處或者唔滿意喔？你講出嚟，等我地幫你喔？係獎學金嘅問題？抑或關於之前自強會嘅事？」
 
我搖了搖頭，道：「校長、馮老師，我唔係去其他中學去升學，而係我無繼續升學嘅打算。」
 
校長與老馮聞言面面相覷。
 
我離開了學校，收到了媽媽的來電：「喂！阿志，會考咩成績啊？」
 
「廿九分，５Ａ１Ｂ。」
 
「嘩！５個Ａ咁叻仔啊！原本我仲擔心你升唔到上去，依家咁嘅成績讀邊間都得啦！」
 
「媽，其實我唔諗住再讀上去。」
 
「吓！點解啊？你咁讀得書，做咩唔讀上去啊？阿志，你擔心錢嘅問題？依層你唔駛擔心喎！你讀到書，阿媽再辛苦都供你讀上去。」
 
「媽，唔係依個原因啊！我地見面再講啦！」
 
與媽媽結束通話後，我還收到各個舅父及阿姨的親切問候，他們得知我在會考取得佳績都很替我歡喜。
 
回到家裡，我躺在床上，這次會考我考得很好，之前的努力沒有白費，算是回到１９９８後，改正得最好的一件事。
 
這次會考成績比之前好得多，可是上個時空我是唸到中七，現在我只能夠唸到中五，大學生活？對於現在的我實在太奢侈了。
 
當初的的目標是升讀大學，然後找一份普通的教職工作，可是現在計劃改變了，因為兩星期的那件事，我的人生路不得不作出另一種選擇。
 
兩星期前，我為湯仲謀傷人一案出庭作證，儘管他作供時堅稱是我自己用刀自殘，可是他的說話並未能說服任何人，法官判處湯仲謀蓄意傷人罪罪名成立，判處四年。
 
湯仲謀聽得自己要失去自由長達四年，他激動得雙手抓著犯人欄，瞪著我的雙目燃燒著仇恨的怒火，他一字一句從牙縫迸出，吼道：「成皇志，依個仇我一定會記住架，出返嚟之後，我要你連本帶利還畀我啊！唔單止係你，你身邊嘅人都要付出代價啊！」
 
庭警見狀，連忙上前制止湯仲謀，並把他押走，可是他的報仇宣言和怨憤歹毒的眼神已經深深烙印在我心中。
 
我知道湯仲謀不是因為一時氣憤而擱下狠話，以他的性格，他絕對言出必行。
 
湯仲謀會在四年，甚至更早的時間重獲自由。
 
如果按照原本的人生目標，我在唸大學二年級的時候，湯仲謀已經出獄向我討債。
 
為了保護自己及身邊人，我不得不作出取捨。
 
＊＊＊
 
茶餐廳裡，我和布正麗面對面而座。
 
我把一個公民袋交給布正麗，布正麗把公民袋打開，一臉奇怪地瞧著我，道：「成皇志，你畀咁多錢我做咩啊？」
 
我道：「我想妳同榮仔過去台灣生活，依到有二十萬，應該夠你地用一段時間，仲有我拜託咗宛琳珊公公，佢喺嗰邊會為你地打點一切。」
 
我欠了宛琳珊一個人情，之前我去找她，希望她請求她的公公去照顧榮仔和布正麗。
 
宛琳珊考慮了片晌，欣然答應，她糾正道：「唔止係你，係連布正麗都欠我一個人情。」
 
我點頭道：「妳點話點好啦！」
 
布正麗瞧著我，道：「咁你同阿興會唔會一齊過嚟？」
 
「其實我都有叫阿興跟妳過去台灣，但係佢唔肯。」
 
「你怕湯仲謀出返嚟會對付我同榮仔，所以要我地去台灣，而你就想一個人留喺到做英雄？」
 
「我唔想連累到你地，琛琛拜託咗妳照顧榮仔，而妳又一直想過去台灣搵妳媽媽，咁樣咪啱囉！」
 
我們默言地瞧著對方，有很多說話想說，可是每次話到嘴邊，總是未能說出口，最後她嘆了一口氣，道：「我知我講咩都無用，你記住凡事唔好勉強自己，如果你應付唔到，就過嚟台灣搵我同榮仔啦！」
 
我點頭笑道：「或者係四年後，件事完滿解決，你地喺台灣返嚟呢？」
 
＊＊＊
 
放榜翌日，布正麗與榮仔已經離開了香港。
 
房侍農與我到了８座數字幫的大本營，朱斌仔左擁右抱、好不威風。
 
朱斌仔見我們進來，把焦點放在房侍農身上道：「嘩！房沙展，哎！唔係，係房幫辦先真，咩事今日咁錯蕩啊？」
 
房侍農道：「喂！朱斌仔，我今日嚟再同你講一次，阿志係我房侍農嘅好兄弟，如果你搞佢，我唔會放過你。」
 
朱斌仔攤了攤手，道：「我朱斌仔最講義氣，阿湯入冊，啲場啊！人啊！我就幫佢睇住先啦！等佢出返嚟，我實畀返佢架！至於佢同你地嘅仇，到時就要睇佢喇！做兄弟嘅一句說話，刀山火海我都同佢闖。」
 
朱斌仔的話雖說得好聽，可是很明顯朱斌仔樂得湯仲謀入獄，可以當一下無人掣肘的山寨王。
 
這四年裡，我不用擔心朱斌仔會對我作出騷擾。
 
＊＊＊
 
會考放榜已經過了五天，除了一些離島中學尚有少數學額外，大多的中學都已經完成了收生程序。
 
這天，我收到一位久違的人的來電，那人居然是呂靜宜的爸爸。
 
呂世伯與我相約在熊貓酒店的咖啡廳見面。
 
我與呂世伯順暢談舊情一番，我問道：「係呢！呂世伯，呂靜宜喺英國生活成點啊？」
 
「靜宜喺嗰邊都幾好啊，只係倫敦嗰邊成日落雨佢唔係好慣，佢間中都有問起你。」
 
「係咩？聽到佢喺嗰邊生活得唔錯，咁就好喇！」
 
「成皇志，我都聽Humphrey講起你嘅野，你會考咁好成績，點解唔讀上去啊？」
 
呂世伯見我沉默不語，他續道：「我睇報紙知道咗你同嗰個叫湯仲謀嘅人有啲恩怨，你有啲咩打算喔？」
 
我與湯仲謀的恩怨真是一言難盡，很難去和呂世伯交代清楚。
 
我苦笑道：「的而且確，我唔讀上去係因為依一件事，至於有啲咩打算，暫時我都未清楚。」
 
呂世伯瞧著我，道：「雖然我唔係咩江湖中人，唔可以幫你去解決依一件事，但係我有一個建議，你不如過去英國啦！你去到英國，嗰個湯仲謀再神通廣大，都對付唔到你。生活費同學費方面，你唔駛擔心，我幫你出啦，你覺得唔好意思，就當我借住畀你先，等你將來搵到錢先還畀我。」
 
呂世伯的話讓我愣住了，他這樣說不知是他本人的意思？還是呂靜宜的意思？如果呂靜宜已經對我忘情的話，世界上有這麼多地方，呂世伯怎會要我到英國去？
 
呂世伯呷了一口咖啡，靜待我的答覆。
 
我腦海中浮起了呂靜宜的倩影，及與她一起的經歷，只要我點頭的話，我將可以到英國與她重新開始，呂世伯這番話等於首肯我與呂靜宜再續情緣。
 
我思慮良久，最後我還是謝絕了呂世伯的好意，我搖頭道：「呂世伯，我好多謝你地一家人一直以嚟都對我咁好，但係我唔可以離開香港架！我離開嘅話，湯仲謀出返嚟搵唔到我，佢就會對付我屋企人，唔通要佢地全部人都移民去其他地方咩？」
 
呂世伯搖著頭，嘆了一口氣，道：「我都估到你唔會應承，咁你有咩打算？」
 
我已經死了一次，現在能夠在這一個時空重新活過來已經賺了，我不怕把命再輸一次。
 
我捏著拳頭，以堅定眼神瞧向呂世伯，道：「有人想我死，我就不斷去發奮變強，唔畀人睇死；有人想對付我，我就向對方作出反擊，畀佢地知道我唔會坐以待斃，最後就算係政府定國家想對付我，佢地都要諗清楚，負唔負擔得起依個後果！」
 
呂世伯瞧著我，點頭道：「我見過好多人初時都好雄心壯志咁話佢地要闖出一片天，最終佢地都係失敗，但係我覺得你會係例外嗰一個。成皇志，我期待你今後嘅表現。」
 
＊＊＊
 
我在呂世伯面前豪情壯語一番，可是我並沒有什麼實際的打算。
 
雖然我掌握了未來的一些軌跡，可是我缺乏本金和技術，做生意是不行的。現在我還未夠十八歲，不知有什麼工作適合自己。
 
究竟有什麼工作不限年齡、又有前途、又適合自己的發展呢？
 
倏地，我靈機一動，想到了一個符合以上條件的職業。
 
我到了植爺的公司去找他，和他的助手報上自己的姓名。
 
半小時後，我見到植爺，植爺瞧見我，恍然道：「助手話有個叫成皇志嘅男仔搵我，我仲諗緊係邊個？原來係你，你係唱明年今日嗰個成皇志。」
 
「係啊！植爺，其實我今次嚟搵你，係我想入樂壇發展，當初你講過，如果有日我想入樂壇發展就嚟搵你。」
 
植爺與我商談良久，最後他道：「成皇志，我會將你引薦畀其他唱片公司，睇下邊間有興趣？」
 
「多謝你啊！植爺。」
 
「嗯，最後我有句說話想同你講，香港只係得娛樂圈，並無樂壇。」
 
植爺這番話說得有點蒼涼，想必是他在樂壇打滾多了後，有感而發的肺腑之言。
 
「植爺，多謝你嘅忠告啊！」
 
別過植爺，走到街上，看著日落西山的夕陽。
 
想不到我的人生會出現如此的變化，由升讀大學變成踏進樂壇，回到過去卻踏上未知的銀色旅途，究竟前路是吉是兇？已經不是我能去預料，可以做的只能小心翼翼去見步行步。
 
 =15.6px以下是小弟的FACEBOOK專頁,內有更多精彩內容,如各位對小弟的作品感興,不妨到此留下讚好,給予鼓勵,你們每一個支持,均是給我做得更好的動力,謝謝
https://www.facebook.com/vc907907?ref=hl