(處女作)《通往死城的圖書館》首部曲: 第二十五話:冰釋前嫌

我還是第一次目睹阿強痛哭流涕的樣子，看來海虹對他真的非常重要。儘管我們是局外人，也能感受到這種悲哀。一個自己重視的人在自己面前被殺，卻無法拯救她的無奈，是常人也沒法接受的。

「對唔住啊虹，我一直都冇好好保護你，我應承過你嘅嘢，一樣都冇做過。要死嘅，應該係我至啱。」

「葉永強，唔准亂講。」海虹認真道：「我抵死架，我仲應承你要珍惜生命……可惜，到最後我都做唔到。」

阿強面上的淚痕愈加頻密，哭道：「唔係，你一啲都唔抵死，你一直以嚟都咁幫我，我就一次又一次咁嫌棄，係我冇好好珍惜。對唔住。」

此時，身為局外人的Cathy也插道：「你哋唔好咁啦，我知道你依家嘅感受，不過我哋仲有任務要做，所以……」





「你收聲！你又點會明白我依家嘅感受吖，睇住自己鍾意嘅人俾人殺，都幫佢唔到，我……」

這刻的Cathy臉上隱約露出一絲淚光。奇怪，這種感受怎麼如此熟悉，就像……就像我第一次遇到她的時候。

「冇錯，可能我真係未經歷過生離死別，但係，我試過同我深愛嘅男人一齊之後，佢突然人間蒸發，當我再見番佢嘅時候，佢已經唔記得我。不過我知道，佢唔係特登離開我架，所以我一直都離遠望住佢，見到佢可以好好生活，我就放心喇！」

「所以你都要堅強啊，就算佢人離開咗，佢都會默默支持你架！係咪啊，海虹？」

「嗯。」海虹笑著回應：「聽到未啊傻佬？我會一直守護住你架。」





阿強聽罷，也微笑起來：「知喇。虹，其實你係咪仲嬲緊我啊？因為之前嗰件事。」

「哈哈傻瓜，我根本就冇嬲到你，反而我係嬲自己，我只係反省自己。強，你係咪我一直都冇乜理你，係因為我嬲你啊？」

阿強沒有回答，彷彿也是海虹意料之內：「其實我一直都唔理你，係因為我唔敢啊！自從嗰件事之後，我一直反省自己，覺得你講嘅嘢好啱，我想同你道歉，但係一直都唔敢，所以……所以我先一直唔理你。」說罷，她也不禁落淚。

此刻的阿強彷彿變成細心的褓姆，為海虹抹乾眼淚。

「夠喇你，當我細路女咩？」她笑言。





阿強依然不發一言，繼續撫摸著女子的頭髮，還有那副天真爛漫的面頰。這個畫面好不溫馨，我卻恍如很久沒有這種感覺。

看到當下的畫面，眼淚不禁滴下來。沒想到平日沉默冷靜的海虹，也有如此純真的一面。當初還以為她是個冷血的人。

「強，記唔記得我哋一開始困喺間房嘅時候，我暈咗嘅。」海虹虛弱道：「嗰陣其實我一直都夢見你，喺夢入面，我同你一齊玩、一齊傻笑，你就好似個傻佬咁氹我，哈哈！我真係好希望夢想可以成真，永遠都同你一齊……」

「嗯，一定會架！」阿強回她。

說罷，海虹閉上了眼睛，彷彿安詳地睡著了。阿強這刻也終於忍不住，把眼珠中的淚水也釋放出來。在充滿屍體的房間，卻上映了一段淒美的愛情故事，看得我也是滿滿的揪心。

此刻，Henry跨過了那些屍體，走到電腦內，開啟一個叫「權限設定」的版面，似乎他正自己進行「計劃」。不一會兒，屏幕上顯示出幾個綠色剔號，應該是那許可已設定好了。Henry也向我們示意要離開，只見阿強依然死抱緊著海虹，不肯放手。

「阿強，我哋要行啦！」我淡然道。

他仍然沒有任何反應，只緊懷著海虹，繼續飲泣起來。





「阿強，呢個計劃一定要繼續，如果唔係，就會有更多人死架啦！」Henry急忙道。

經過一番的勸告後，阿強還是站起來起行了。只是阿強仍堅持抱著海虹走，看來他是不會放下她的了。

就這樣，我們向升降機繼續前行。