[年齡無界限] 就係咁，我最近出席好多喪禮: １２　計劃書

飲完個茶，我地就坐車返去，一落車，福伯就話：「我返屋企先拿，聽日見啦。」

「好，聽日見。」呢兩句對話，我地日日都會講。

返到屋企，都係對住果ｄ野，我放左份計劃書係枱上面，煮左ｄ野食開飯，老人家開飯嘅餸都係果ｄ，酸菜、鹹魚、榨菜肉絲、腐乳、青菜一碟……係未好多都重口味呢？無它嘅，老人家味覺退化，食飯最緊要有味，所以食嘅野都重口味ｄ，不過我都追求健康架，所以一定會煮一碟菜。

食完飯後，我拎左本計劃書睇，原來已家搞善終已經好多選擇，會因應你嘅信仰啦，想最後安置係邊啦都有得選擇。

而最令我吸引嘅，係其中兩種安置嘅方法，第一種，係香港起左好多叫環保花園嘅地方，果度會有撤灰服務，姐係火化完，就可以係果度嘅花園撤灰，而果度仲可以放自己嘅石碑，可以比人係自己死後，去懷念一下，拜一下……





唔錯，我鍾意呢個。

而另一個，係將自己嘅遺體捐比ｄ大學，比醫科嘅人做實習……解剖！？下！？比果ｄ三唔識七嘅人掂死後嘅我！？我生前已經唔多會比陌生人掂，死後仲點會比人掂ｗｏ，我一定唔會選擇呢個，我諗好多人都會有我呢一個想法。

估唔到呢份計劃書又真係幾詳盡，價目仲列明得幾鮮明，係有幾隻錯字要改下，「珍」惜嘅「珍」點會用呢個「真」先得架。

睇完個計劃書，我開始覺得，真係時候諗自己嘅身後事，望一望小段嘅卡片，係未應該搵日約佢出嚟好好傾下呢。

但係，估唔到，下次見小段，會係一個咁嘅場合……