[年齡無界限] 就係咁，我最近出席好多喪禮: ３９　保險嘅真相

我地兩個都係叫左叉燒飯，呢度老闆都好好人，免費送兩杯跟餐野飲比我地，蔡老闆知道後不停話呢度嘅老闆真係好人。

見到佢而家每食一啖飯，同見佢第一次同佢去食飯嘅時候係原全唔同，第一次食飯嘅佢，好似每食一啖飯，都要計下果啖飯幾多錢咁，但今日，佢食呢一餐飯，每一啖都食得好開懷。

可能佢知道有左呢份工後，收入會多左，放肆一次，雖然眼中只係平平無奇，好簡單嘅一碟叉燒飯，但對蔡老闆呢一Ｄ老人家而言，可能已經係一種好奢侈嘅食物。

望住佢咁，令我諗起佢咁辛苦做野，係為左供果一份保險，為左果個已經唔理佢嘅前妻及佢個仔，呢一刻，我忍唔住問佢：「蔡老闆，咁辛苦為咩？」

「嗯？」佢邊食邊用疑問嘅眼神望住我。





「阿然佢，講左我知。」我呢一句後，蔡老闆放慢左佢食野嘅速度，直到停左，口中仲含住啖飯問我：「阿然講左Ｄ咩野你知？」

「你供嘅果一份保險，點解要咁做？」我問佢。

而蔡老闆吞左啖飯後就話：「係我欠左佢。」

「你欠左佢地？」我疑問：「你前妻先前欠左出面咁多錢，你已經幫佢還晒，你無野再欠佢地架拿。」

「點解……點解你知嘅？」蔡老闆聽到我所講嘅野，有少少驚訝。





「其實唔止我知道，阿然都知道，我地唔想而家你所做嘅野係白費。」我話。

蔡老闆聽到我咁講後，嘆左一口氣話：「可能，係其他人眼中係白費，但係我眼中，係一種救犢。」

「以前為左工作，我可以犧牲晒家庭嘅所有野，無晒時間陪佢地，夫妻時間、親子時間無晒，每晚返到屋企，我都係繼續工作，連我老婆帶男人返屋企搞野都唔知，直到有一晚，我個仔好夜都唔訓，走左入我間書房望住做緊野嘅我，果陣我仲問佢點解咁夜都唔訓，佢無答我，只係拎住個錢罌問我：『我想買爸爸一個鐘嘅時間，要用幾多錢啊？』真係果一刻我先發現，我係做得幾錯，我行到去阿仔嘅面前，攬實佢同佢講對唔住，而果陣阿仔講左另一樣令我好震憾嘅野：『你先同媽媽講對唔住啦，因為你成日無時間陪佢，媽媽成日搵其他男仔陪啊，我唔想無左個媽媽啊。』聽到果一刻，我就知道一切已經為時已晚。」

如果比著我，我都唔知點答。

「知道左之後，本來想為呢件事挽救，但係已經為時而晚，工作上失敗嘅打擊，唔單止打擊左我嘅士氣，仲令我老婆更快向我提出離婚，果陣我以為佢係因為我無錢所以唔要我，但最後我知道，原來佢投資失利，仲連累到家人，但係佢點解要投資，係因為我，佢想我知道屋企已經好有錢，唔駛我再咁辛苦做野，果Ｄ成日上去屋企嘅男人，原來係話可以幫佢賺錢，有內幕嘅人，但果Ｄ人當然係呃佢啦，佢出面比人呃無左好多錢又唔想累到我，所以同我離婚，跟左另一個有能力幫佢還錢嘅有錢人。」





原來，成件事係咁……

「果陣佢仲問我個仔嘅撫養權比我好唔好，我拒絕左佢，因為果陣嘅我都唔知照唔照顧到自己，點照顧個仔，但佢不停話我已經一無所有，唔想連個仔都搶走埋，但我無理佢，將個仔交左比佢。」蔡老闆講完後，就話：「一切，都係我欠左佢地。」

原來，蔡老闆為左供呢一份保險，係為左救犢。

食完呢餐飯後，去櫃臺埋單，「估唔到，你仲背負咁多野。」我同蔡老闆講。

而蔡老闆只係笑一笑，不停係佢嘅身上面搵緊野，「死火，頭先趕住出黎，原來我無帶銀包。」

「咁呢餐我請啦。」我話，然後就埋左張單。

「咁……唔好意思啊，我一定會請返你，等我出糧我一定再請你食叉燒飯。」蔡老闆話。

「得啦，慌死你會走我數咩。」我望住蔡老闆，原來，一個男人為左尊嚴，可以自己收收埋埋咁多野唔比人知。