Welcome to Knot ~ Season 2: #101

今日完全不在狀態咁工作。
我並無理會啫喱嘅關心，或者Scarlett嘅提問。
我根本無心神去處理呢一刻所有嘅事情。
 
就係我沖錯第五杯咖啡嘅情況下，我請咗Kwan仔嚟替我個位。
選擇坐係吧枱嘅角落，我需要一個安靜嘅空間去思考。
 
Kwan仔、楊言同Scarlett完全感覺到我身上「生人勿近」嘅灰色氣場，都離我遠遠，唔想打擾我。
 
呢個電話，完完全全咁改寫咗我呢一年嘅生活，同本來平靜咗嘅心。


我以為，一切都已經回歸正常；
我以為，我已經放低咗；
我以為，我可以開始接受新一段嘅關係；
但原來一個簡單嘅來電，就會將所有嘅「以為」打碎，所有思緒都會被再一次勾返晒出嚟。
 
原來我個心，一直都重在意緊。
 
眼神無焦點咁望住Knot嘅其中一個角落，手再一次拎起繩，無意識地亂打結。
對上一次因心緒不寧而打結，係幾時呢？
一個月？半年？


唔知點解，我腦海中浮現咗嗰個人嘅名。
的確，佢嘅出現曾經為我帶來過一絲嘅曙光，同一大堆嘅苦澀。佢係其中一個會令我想打結嘅人。
但係呢一刻，唔係佢…
 
望一望工作枱上嘅月曆，2014年7月19日，星期六…
離7月24日，原來只有五日…
估唔到，今年我仍然會唔係香港過呢個日子。
冥冥中，係咪真係所有嘢都有所安排？
 
我拎起紙筆，將需要做嘅事一一都寫低。


同時，寫咗封受權書，同簽咗幾張支票。
就係我埋頭專注嘅時候，我身邊嘅座位有人坐咗落嚟。
抬頭一望，我眼神接觸到一個令可我安心，同可以信任嘅笑容。
 
就係呢種可靠嘅感覺，令我整個上晝嘅繃緊一下子全部得以放鬆。
我雙眼開始不自控咁分泌出眼淚，全身無力地靠咗係呢個人身上。
眼前人一手捉住我，將我拉走，離開咗Knot。