Welcome to Knot ~ Season 2: #103

Knot Cafe並冇因為任何事而改變佢嘅運作。
表面上，一切都正常。
奈何佢嘅擁有者，即係我，個心已經定唔到落嚟…
 
星期六嘅午市，多咗好多年輕人同遊客。
我好好收拾心情，專心咁沖調我嘅咖啡。
亦都因為專注，令我覺得呢幾個鐘頭，似乎好過少少。
 
襯有個Break，我過咗去路比佢哋到坐下。
雖然楊言好用心咁煮咗碟茄汁雞肉長通粉俾我，但我真係一啲食慾都冇。拎起叉撩咗兩下，我又放返低。


「你唔食嘢唔得架，點都食少少啦！」坐我旁邊嘅路比關切咁同我講。
 「係囉，你重要頂成個下晝，唔食嘢會暈架。食多少少啦。」靖都勸告住我。
「Sorry…我真係冇咩胃口，食唔落。」語畢，我又走到工作枱。突然好為自己調配一杯咖啡。
 
我係雪櫃拎咗鮮橙汁同冰出嚟，再係櫃底拎咗一支橙酒出嚟。
Taz見到我拎咗支酒出嚟，顯得好驚訝：「點解Knot會有酒嘅？Knot唔係唔賣酒架咩？」
「Knot係唔賣酒，但唔代表佢唔可以用少量嘅酒去調咖啡。你Oppa夠冇酒牌啦，咪又係會用酒去整蛋糕。」靖用佢對餐飲業嘅知識，去解答Taz嘅問題。
疑團得到解答，Taz同其他兩個人，又再次好專注咁留意住我嘅動作。
 
我先係第一個搖酒器入面倒入鮮橙汁、少量橙酒、糖漿同兩塊冰，然後用力搖晃。


我係個咖啡杯入面放咗少量冰碎，再將頭先嘅混合物倒入去。
咖啡機沖咗兩個shot嘅咖啡出嚟。
以我宜家嘅情況，我需要好好麻醉一下自己。我將double shots全部倒入第二個搖酒器，加咗少少橘子香精、砂糖同一粒冰，並再次用力搖晃。
 我將混合物輕柔緩慢咁倒入咖啡杯入面，用匙更阻攔豆奶嘅奶泡，只係傾倒微溫嘅頭奶。
先將奶泡留係杯頂，最後灑上橙皮。
 
Cointreau Mandarin Orange Latta，Ocean第一次調俾我飲，亦係第一次教我去調嘅咖啡。
我記得佢話過，女仔唔識飲酒係好蝕低，所以佢話要好好咁訓練我去飲酒。
呢杯君度橙酒咖啡，就係我嘅第一課。
 


因為咖啡嘅熱力，令橙香四溢。
「嗯…好香呀！」Taz二話不說，就伸手想拎起我啱啱放上吧枱嘅咖啡。
「啪！」路比一手拍落去，Taz當然叫痛。正想大聲鬧路比之時，靖已經示意唔好。
 
睇嚟靖真係可以好好咁治到Taz。
我笑一笑，將咖啡推咗俾Taz：「請你飲。撗掂…我講過除咗Ocean調俾我嘅Orange Latta，其他人…包括我自己調嘅，我都唔會飲。」