《燈靈》: 1.4

醫院裡。
 
「我記得翻哂所有野喇！」病房門外的我大聲喊。
 
「嗯！？」阿飛忽然閃到了我身旁。
 
「我地遇上一場好恐怖既交通意外…」回想起，此刻我仍然心有餘悸。「我要睇吓我女朋友而家點啊！」說罷，我衝出了病房，然後像發了狂般橫衝直撞…是橫穿直透才對，因為我的身體根本沒有碰上任何東西。
 
我活像一隻盲頭蒼蠅，不斷在醫院裡四周搜尋阿彩的縱影，找了一會，才發現原來是大海撈針。
 




「你喺度搵你女朋友？」阿飛問。
 
我點頭。
 
「醫院咁大咁多人點搵啊？你又唔知佢喺咩病房。」他說。
 
「咁點算啊…」我感到有點不知所措。
 
「等我幫你搵佢出黎啦。」
 




「點搵！？」
 
「用呢度。」他指著自己的腦袋。
 
「你女朋友叫咩名？」
 
「阿彩。」
 
「全名呢？」
 




「梁美彩。」
 
「可唔可以形容吓佢既外表？」
 
「咪眼大大，長頭髮咁囉…」
 
「好。」然後，阿飛閉上了眼，像是在思索著些什麼。
 
「想點啊你！？」我心存陰影，不想忽然又跌進某條時光隧道，然後又莫名奇妙地昏倒。
 
過了半晌，阿飛睜開眼說：「搵到！」他突然伸出了手並按在我的額側。
 
醫院的地板突然扭曲了起來，繼而形成了一個白色的大漩渦。
 
「哇！」又是那條白色的時光隧道。




 
「啊～！～！～！～」我大叫。
 
很討厭他口中的這種『暈船浪』。
 
身體彷彿一直由高處急速墮下，彷彿被大型漩渦中的無情浪不斷在攪拌著。
 
過了一會，旋轉的感覺終於停下，我於是睜開了眼，發現自己已來到了另一間病房，而躺在白色病床上的人正是阿彩。
 
「阿彩！」我上前想要握著她的手，落空，心情又是一下落空。
 
阿彩的手上佈有幾道傷痕，幸好只是皮外傷。不知道為何，望著正在酣睡中的她，我竟然情不自禁地哭了…
 
原來鬼是能夠流眼淚的，正宗的鬼哭神嚎。
 




望見她安然無恙，我高興得流下了安慰的淚水。
 
「唔使咁傷心喎。」阿飛安慰我說：「頭先你屋企人都話佢無咩大礙，一定可以醒得翻。」
 
突然，我想起了一個問題…
 
「咁我呢？而家我個靈魂咁樣出左竅，咁…點先可以醒得翻？」
 
「問得好！」他雙腳一騰，然後整個人倒轉，倒立了於天花板上：「你必須要完成任務。」
 
「任務？係點架？」我擦拭著眼淚。
 
「頭先我都同你解釋過，你同我一樣，而家都係一隻燈靈，所以會見到每一個人既頭上有盞銀色既燈，我地會稱呢嚿野為『靈燈』。」
 
阿飛頓了頓，望向神情有點呆滯的我。




 
「我聽緊架，你繼續講。」我說。
 
「如你所見，靈燈上面會有一團綠色既火焰，呢團火焰其實係代表住一個人既壽命，當呢團火焰唔再燃燒既時候，就代表呢個人既氣數已盡…」
 
我打斷了他：「其實你可唔可落翻黎先，你咁樣倒吊喺我面前，又要一邊聽你講野，我好辛苦，好頭暈啊。」
 
阿飛突然瞪大了雙眼，然後若有所思地搔著下巴，突然又大笑了幾聲：「哈哈哈！」
 
這個人…有神經病的嗎？
 
他慢慢將倒轉了身軀旋回到地上，然後站著，動作像極了一個處於無重力狀態的太空人，很神奇。
 
他又說：「如果你想醒翻既話，就要去收集一定數量既靈燈。」
 




「咩神燈話？」我聽不清楚，以為是阿拉丁中的神燈。
 
「你睇下自己身上有無一本黑色既簿仔？」
 
然後我搜了一下自己的褲袋，發現袋裡果真藏了一本全黑色，像是本迷你電話簿般的東西。
 
「真係有喎！」
 
「呢本野叫做靈冊…」阿飛頓了頓，說：「有無睇過死亡筆記？」
 
我點頭：「有啊。」
 
「只要我地喺上面寫上某人既名字，佢就會即刻死。」阿飛的神兔突然變得凝重了起來。
 
我心感驚訝，望著手上這傳說中的邪惡東西，不禁張口瞠目，一時不懂得如何反應。
 
「講下笑咋…」阿飛掏出了屬於自己那本死亡筆記，並將其打開：「第一步，將佢打開，然後睇下簿仔入面有總共有幾多個欄位。」
 
我跟著辦，發現頁內全都是空白的，與一本普通的單行簿無異，只是每一欄位旁邊都有一個數字，而數字的排列當然是順序。
 
我把靈冊翻到最後一頁，發現最後一欄的數目字是2000。
 
「二千個囉。」
 
阿飛瞄了瞄我手上的靈冊：「嘩…咁少咋，你真係好彩，唔使做咁多。」
 
「吓！？」我聽得一愣一愣，瞥見他手上那本簿載滿了密密麻麻的紅色字。
 
「呢個數目字，代表你要去收集既靈燈數量…換言之，只要你收集夠二千盞靈燈，你就可以醒翻，翻去現實世界同你既屋企人團聚。」
 
「咁而家即刻開始啦，行喇。」我已經整裝待發。
 
「請等一等！」阿飛突然高舉雙手，且聲若洪鐘，被嚇了一跳的我轉身望了望阿彩，生怕她會被他吵醒。
 
我確定，這個人是患有精神病。
 
他又說：「只有熄滅左既靈燈…即係當一個人已經死亡，我地先可以收集。」
 
「咁二千盞，好似要搞好耐咁喎！？」
 
「咁又唔會，每日都咁多人死，一日閒閒地收三，四十個，一個月多啲都做得完啦！」
 
「哦！」我半信半疑，因為他是瘋的，況且一個月也未免太長了吧。
 
「至於收集既方法係點，聽日先再講解你知啦…」
 
「吓！？點解啊，而家講埋啦！」
 
阿飛看了看手錶後說：「時候都唔早喇，我有啲緊要事要做，聽日先！」
 
「但係…我而家已經準備好，隨時行得。」我只感到無奈。
 
「放鬆啲啦香港人，你以前第一日翻新工，啲人都唔會即刻叫你埋位做野啦。」阿飛的雙腳開始離地，在半空中盤膝而坐：「唔使急喎，越急只會越慢，有啲野，你好快就會明白。」
 
說罷，他擺出了瞬間轉移的姿勢。
 
「喂！唔好走住！」我說。
 
「嗯！？」
 
「我點先可以搵到你！？」
 
「你唔需要搵我，因為我自然會黎搵你。」
 
「咁…」我不知道應該說些什麼。
 
「今日你就休息吓先啦，聽日見！」
 
「嗖」一聲，他憑空消失了，這是我看過最逼真的特技。