中左六合彩頭獎四千八百萬，依家唔知點算?: 70 水運會
阿妹張相伴隨音樂彈出，最慘係我電話係直接入左阿妹個英文名ivy cheung而唔係細妹或者阿妹，
詠恩望到果陣個樣好似就更加黑，就好似火上加油咁，於是我撳熄左個電話。
「...那時太快樂～」但係阿妹不停打離，就好似有心玩野咁款，頂佢個肺！
「...喂！」最後我係細細聲接聽左嘅。
「...做咩一朝早就唔見左人嘅，阿媽問去唔去飲茶喎！」頂...係咁打離就係為左咁牙？
「...你地自己去啦，我唔得閒呀！」我繼續用手暗住個口，盡量唔比詠恩聽到我講乜野。
「...咁神秘，嘻嘻...約左恩姐呢？」阿妹笑笑口問。
「...知就快啲收線啦。」我再講，之後就收左阿妹線啦。
收線之後我有啲尷尬咁望一望詠恩，而詠恩就冇望過我，只係望住下面嘅浠琳。
「...係呢，唔知浠琳有啲咩比賽呢？」我搵野講。
「...你咪自己問佢囉。」詠恩繼續冷漠回應。
好快浠琳佢地就舉行完開幕儀式，依家啲學生開始行返上看台啦。
「...聰哥哥！」浠琳叫我。
「...好精神喎，點呀...一陣有啲咩比賽呀？」我問。
「...er...一陣有「50米自由式」，之後就係「50米蛙式」，
食完飯之後呢...應該就係「4x50自由式接力」，
最後就係「100x2親子接力」啦。」浠琳諗一諗之後就詳細解釋比我聽啦，
估唔到而家啲小學已經玩到咁勁，我仲以為係咁易游25米就算添，
咁嘅距離詠恩邊會搞得掂吖，更何況詠恩隻腳仲好似傷左添。
「...「女子組50米自由泳」初賽第一次召集！」過左冇耐，
大會就開始叫咪啦，第一個比賽項目，正正就係浠琳嘅比賽項目。
「...加油呀！」我同詠恩都異口同聲，就係咁...浠琳就行左過去召集點準備比賽啦。
「...好緊張添！」我講。
「...初賽姐，有咩好緊張吖！」詠恩冷靜回應。
「...點解咁講呀？」我問。
「...你自己睇囉。」詠恩繼續冷淡。
就係咁，比賽好快就開始左啦。
「...咇～！！！」雞聲一響，全部泳手都開始彈出，點解話開始呢，
因為唔同人分別真係好大，技術好參差，有啲好似一枝箭咁飛左出去...包括浠琳，
而有啲就好似食左豬油咁，慢幾拍，人地游左成幾秒先開始起步，擺明係離陪跑。
「...加油～拍拍～加油～拍拍～」就係咁，浠琳喺我嘅打氣聲下，
以驚人嘅速度首名過終點，簡直係我意料之外。
「.....吓...果個係...浠...浠琳離嘅？」我而家o哂咀，完全唔相信眼前依個就係浠琳，
真係快得好離譜，電子計分板顯示完成時間只係三十一秒八，完全唔係一個小學生可以做到嘅時間，
就連而家嘅我都冇咁嘅把握可以做到三十秒內完成，真係太不可思議啦。
「...係。」詠恩繼續目無表情咁講野，睇離佢真係見怪不怪。
「...好勁呀！浠琳你！」到浠琳行返上離果陣，我好驚喜咁同浠琳講。
「...sorry呀，媽咪慢左小小！」但係浠琳第一時間係佢詠恩道歉？咁快都要道歉，唔係掛？
「...哈哈...張浠琳咁慢架你！」同時隔離坐左個同浠琳差唔多大嘅女學生用鄙視嘅語氣同浠琳講。
「...嘻嘻～人地好努力架啦女，唔好咁話人啦！」同時女同學身邊一個中年女人，
應該係佢媽咪嘅人，同樣用恥笑嘅語氣講，依家人點解咁冇禮貌架？
語言間非常多骨，句句都難聽過粗口。
「...浠琳...唔緊要架，盡左力就得架啦！」詠思冇理佢地，只係叫浠琳比心機。
講講果兩母女先，典型有錢人樣，阿媽中年女人，望落四十幾歲左右，
打扮成個闊太咁，對眼生到頭頂咁高，就好似「多啦a夢」入面小夫個老母咁款。
而個女呢...其實都算幾靚女嘅，高過浠琳啲，都係偏瘦運動型，
應該都係比人由細栽培嘅游泳高手。
「...阿女...唔好游咁快呀，留啲力決賽贏盡啲啦。」
話口未完就到闊太個女行左落去準備第二場「蛙式50米」初賽啦。
「...咇！」雞聲一響...同頭先果場一樣啦，所有泳手唔同時彈出，
闊太個女同浠琳一樣係最頭彈出，而且仲勢如破竹咁越爆越有貨，
到衝線果吓拋離第二名果個成條街咁濟，電子計分板顯示...吓...
三十秒八...唔拿係掛...到底依家啲小學生食乜大架？三十秒...好似當食生菜咁嘅...！
足足快浠琳成秒。我而家嘅感受就好似「龍珠」入面嘅比達第一次見到小朋友杜拉格斯變超級撒亞人咁，
完全接受唔到好似係人都變到身果吓感覺。
「...噢～我都叫阿女唔好游咁快架啦，唔好意思呀...快浠琳你咁多...嘻嘻！」
中年女人繼續喺我地隔離發音波功，見到詠思塊面黑到呢...好似比人連住條頸透唔到氣咁款。
「.....！」見到浠琳都好無奈咁唔出聲。
「...浠琳...唔洗咁緊張喎！」我坐埋浠琳度講。
「...冇呀！」浠琳語氣同詠恩一樣，細細聲話冇...其實個樣不知幾在意。
「...聰哥哥以前考救生員果陣都好緊張架喎！」我講。
「...吓！乜...聰哥哥你係救生員離架？」浠琳有啲驚喜。
「...以前果陣就係，依家唔係啦！」我再講。
「...點解依家唔係嘅？」浠琳再問。
「...er...因為聰哥哥過左期好耐好耐都冇再考囉，
仲有依家要做救生員比起我考果陣又要再考多幾個試，
所以我而家咪唔係囉。」我詳細解釋。
「...哦！」浠琳講。
「...果陣我成日都好驚會考唔到架！但係之後再諗...考唔到咪考唔到囉，
都冇乜野姐，又唔會死嘅，係咪先？」我講。
「...都係嘅！」浠琳回應。
「...其實依個世界呢，唔係咩努力左都一定會有回報架。
但係只要盡左力，就算最後輸左，起馬我都嘗試過，
享受過果個過程...對得住自己咁就得架啦！」講到依度...浠琳終於都開心返啦，
見到佢面露笑容，希望我一番說話真係可以開解到佢啦。
比賽繼續進行，浠琳成功拎到「50米自由式」冠軍同「100米自由式」冠軍，
但係「蛙式」方面就只係攞到第三名。好快過左食飯時間啦，比賽依然繼續，
下午嘅比賽多數係一啲接力賽同社際比賽，浠琳繼續有好表現，
攞左班際「4x50自由式」接力冠軍之後再贏埋社際「4x50自由式」接力冠軍。
但係頭先贏浠琳果個女同學同樣都有驚人表現，雖然大部分自由式比賽都不敵浠琳，
但係所有蛙式比賽都贏哂咁濟，而家積分榜上同浠琳打成平手，
邊個攞到最後嘅全場總冠軍就要睇最後嘅「親子2x50」接力賽啦。
點算好呢，果個串咀貴婦家長已經開始熱緊身，著哂鯊魚泳衣咁款睇離都唔係善男信女，
反觀詠恩根本連水都唔多識游，而且隻腳又整傷左，如果勉強參賽輸就一定架啦
一個唔小心隻腳仲會傷上加傷，可能會有浸親嘅危險添，點算好呢...！