《亡命者》「選擇」「領袖」: 第二十九章 升級
教官辦公室內。
『首先恭喜兩隊戰隊取勝』
陳曉輝拍手説，隨即從旁邊的櫃桶中拿出兩疊白色的臂章圈，放上枱面。
『每人數下夠唔夠十七個』
鄭家榮和張百城各自拿起一疊，各自埋頭點數。
『夠十七個』
『我都夠十七個』
陳曉輝聽後又再出一個黑色和一個白色的臂章圈。
『宜家你地手上嘅係騎士級戰力的臂章圈，呢兩個係惡鬼級同埋聖騎士級臂章圈』
鄭家榮拿起其中一個騎士級臂章圈，白色底色，中間有一個黑色騎士頭盔，簡潔程度猶如以前班會整班衫結果設計個條友最後去左某間大型連鎖店(獨角獸啲朋友)買啲一式一樣的班杉就算。
其實都無咩所謂，求求其其開心咪算，他媽的最老尷嘅係陸運會個日先知同隔離班撞杉，結果你眼望我眼，令鄭家榮真係想一槍打死設計班杉個條木契。
鄭家榮望向張百城的臂章圈，他媽的又白底黑頭盔，係多左把黃色的騎士槍在頭盔中間。
『邊那個設計嫁？咋咋臨開槍打死佢啦』
鄭家榮忍不住説。
陳曉輝説：『睇埋你嗰個先』
鄭家榮拿起自己的臂章圈，旁邊的張百城都忍不住好奇心一起來看看。
黑色底色，中間使用惡鬼面具做標志，面具雙眼都是用黑色，令惡鬼面具多一份恐怖。
陳曉輝拍一拍左肱二頭肌，説。
『臂章圈要掛係左邊肱二頭肌』
二人聽見馬上戴上臂章圈，鄭家榮一邊戴一邊慶幸自己可以跳級升軍階，如果唔係要佢戴上騎士級臂章佢真係寧願做返新兵算。
『我唔係應該升騎士級咩？點解我會係聖騎士級？』
張百城終於忍唔住問。
陳曉輝聽後大聲地笑，令張百城不知所措。
『以你地十強新兵嘅潛質，好快都可以升到上去，洗乜在意個一兩級軍階』
陳曉輝大笑著說，張百城都笑兩聲令場面不要太尷尬。
鄭家榮心想：『辛苦你啦百城兄』
陳曉輝此時乾咳了兩聲，令自己開始認真返。
『聖騎士級戰力張百城，你可以落返去食飯同派埋臂章比你戰隊嘅隊員』
『Yes sir』
張百城回應時看了鄭家榮一眼便離去，鄭家榮稍息姿勢等待。
陳曉輝等到張百城關上門後才開始説話。
『你地半夜上山練成點？』
鄭家榮睜大雙眼看著陳曉輝，萬萬沒想到夜晚的訓練會被人知道。
『係軍營入面我無嘢係唔知』
陳曉輝微笑説，仿佛看穿所有東西。
『訓唔著咪上山練習下囉，哈哈』
『五個男人都訓唔著？要拎埋武器上山？』
『好喇唔挽喇！我地上山練劍呀！』
陳曉輝翹手説：『我無怪你，只係想知道你地練左啲咩可以安排返進階訓練比你地』
鄭家榮説：『飛宏同蔡國榮就練武士刀，kinglam繼續練箭，肥巫佢練雙面長斧頭』
陳曉輝記錄在筆記簿上。
『你地今晚唔好上山訓練，聽日有任務』
鄭家榮立正説：『Yes sir』
『無問題嘅話宜家落去食飯』
鄭家榮轉身離開，留下要繼續工作的陳曉輝。
鄭家榮站在門口閉眼沉思，左手拿著臂章圈的手微微顫抖，他思考明天任務的危險可能性，任務類型。
十五分鐘後…軍營飯堂。
大部分新兵都已在吃晚飯，但有一枱的新兵並沒有起筷，皆因他們的隊長還未返到，旁邊的軒少，哥斯拉和Jason早就在自己枱食緊飯。
潛水已久的隊員開始怨聲不斷。
南南説：『搞錯呀，咁耐嫁！』
心姐安慰説：『唔好咁啦，阿榮都唔想嫁』
Candy與兔仔頭放枱上，看著眼前的食物…。
馬嬲和詩詩低著頭祈禱，但雙眼都經常看一看食物。
肥巫，飛宏和kinglam早就想衝上去找鄭家榮，但想起是教官找他就縮了沙。
Madam poon 和榮sir交談，分散自己的注意力。
樂兒靜靜地等待，忽然間頭被人輕摸，樂兒擰轉頭，看見這個十日前向自己求婚的傻男孩，臉上依然泛起紅暈。
『sorry，我遲左』鄭家榮道歉
眾人雖然想吊打他，但因未食飯，所以食埋飯先。
鄭家榮和樂兒都低頭食飯，但二人的左手都在枱下十指緊扣，令少鹽少糖少油的軍營飯多了一份甜絲絲的味道。
眾人今天雖然戰鬥了一整天，但眼神已經再無入營前那份恐懼，而是多了一份自信。
在夜晩訓練前，鄭家榮企起身，把臂章派給戰隊隊員，除了十二個人外，鄭家榮把兩個臂章拋向哥斯拉和Jason，以及拋三個臂章給軒少讓他自己分配給手下。
『媽的！咁嘅樣點戴呀？！』飛宏和kinglam抱怨説
鄭家榮當然不會放過可以恥笑兄弟的機會，笑到飛宏同kinglam差少少又三人切磋。
夜晩的體能訓練比平時相對輕鬆，可能不想太明顯地讓鄭家榮一等人優先休息令人感到不公平，所以用一個皆大歡喜的方法完場。
鄭家榮已經跟一眾男生表示有任務，今晚不用上山訓練。
樂兒和鄭家榮亦都把握可以一齊的時間，二人在周圍沒有人的地方手牽手聊天，珍惜眼前的時光。
半夜，男生營房。
四位男子靜靜潛行打算上山訓練，但腳步聲早已大聲過大象行路的聲，眾人拿著要訓練的武器，電筒和一些食水就跑上山，卻沒發現還有一位男子的床是用枕頭冒充。
四人快速跑上山，對上山的路駕輕就熟，皆因十天半夜都要跑上去訓練兩小時。
肥巫説：『我地扔掉阿榮自己跑上黎會唔會唔係咁好呀？』
飛宏回應：『唔會呀，比佢休息下啦，今晚啲訓練咁簡單反而訓唔著』
Kinglam説：『宜家唔訓練反而唔慣』
榮Sir深表認同，睇黎成班早就被感染成鍛煉狂。
不知不覺，眾人已跑到平時訓練的地方，卻發現在燈的照亮下，有一名男子正在手執西洋劍，鍛煉自己的步法以及架式，而且四肢都紮上鉛塊，身上還有件負重背心。
雖然四人都在潛行，但看著男子的毅力和創造力不禁心心佩服，男子忽然停下，平靜地説。
『橫掂都嚟咗，出嚟訓練啦』
四人馬上起身一起訓練，為明天的任務做準備。