香港都市傳說三：無法逃離的上環地鐵站: 第三章：調查

「聽講佢失咗踪兩日，最後出現嘅地點就係我地公司附近啲酒吧，所以查下查下就查到上嚟我地公司。唉，頭先又俾啲客見到晒，今次公司真係中晒招，希望公司無事啦，如果唔係要搵過份工就慘啦！」
 
就在二人說話之際，老闆突然從他的房間裏走出來。
「阿朗，你入一入嚟！」
 
「吓？唔係呀，又關我事？」阿朗感到莫名奇妙，然後一臉無奈地進到老闆的房間內。
 
「你就係林天朗先生？我地請你入嚟，係有少少嘢想問你嘅。請問你同羅建輝先生，即係你嘅同事Daniel，係咩關係呢？」一名警員，用近乎威嚇的眼神看著阿朗。
 
「吓？咩關係，咪同事囉！」阿朗毫不在意的回答。




 
「同事？你地平時有無咩聯絡，或者有無咩金錢上嘅糾紛？」那警員用更重的語氣作出詢問。
 
「聯咩絡啫，我同佢都唔熟，最多咪佢啲客Server出事嗰陣會搵我囉！同埋邊有咩金錢糾紛，我財政狀況不知幾健康！阿Sir，你究竟想問乜呀？」阿朗由於經常工作至夜深，在街上常會被警察截停盤問，所以他一點都不怕這警察的威嚇。
 
「唔好意思，林先生。因為我地Check到，羅先生，即係Daniel，喺佢失踪嗰晚，最後搵嘅就係你！所以先想你協助調查，唔介意我再問你一啲問題呀嘛？」另一名看似較為高級的警員，用比較禮貌的態度詢問。
 
「我實唔介意架！我有得介意咩？不過一返到嚟就俾人當嫌疑犯唔係好開心啫！」阿朗怒視著剛剛那名言語上威嚇他的警察，但那警察似乎毫不在意。
 
擾攘了好一會後，警察總算調查完畢。




「唔該晒兩位嘅合作！林先生，如果你再次收到Daniel嘅電話，請你盡可能接聽同了解下佢嘅情況，之後盡快通知我地。麻煩晒！」
 
警察離開公司後，老闆把調查時所受到的氣，發洩在同為調查對象的阿朗身上。
 
「仆你個街！查還查呀，搞到我要OT，真係頂！」阿朗對著大海大喊。
 
「朗哥冷靜啲，你咁大聲今晚都係要OT架！」阿豪在一旁安慰阿朗。
 
「係喎，朗哥，頭先班差佬做咩事，點解連你都要叫埋入去？」比起阿朗加班，阿仁還是較關心剛才警察的事情。
 




「唉，原來Daniel失踪嗰日，最尾一個電話就係打俾我！所以啲差佬咪問呢樣問嗰樣囉！唉，真係黑仔！」阿朗歎了口氣，無奈地說。
 
「吓？唔係啩，佢打俾你做咩呀？」兩人略感訝異，這也難怪，Daniel和阿朗兩人除了工作上會接觸外，兩人可說是毫不相識，而且性格也大相逕庭，完全無法想像兩人會有任何聯繫。
 
「痴線，鬼知佢打嚟做咩，我都無接到，應該都係公事啩。佢打嚟果陣差唔多零晨一點，零晨十二點後唔接公司電話是常識吧！」阿朗表示不知情，但兩人聽到後，眉頭卻不禁皺了一皺。
 
「喂，你兩個搞咩呀？一聽完我講就苦埋口面咁嘅？」阿朗當然不會看漏這些微的變化。
 
「無......不過......朗哥你記唔記早幾日我地同講嗰單嘢呀？」阿仁帶點不安地說。
 
「邊單呀？咦！你......你係想講......」經阿仁的提醒，阿朗又再記起那尾班地鐵的傳聞。
 
「係......係囉，你估......會唔會......同嗰單嘢有關呀啦？」阿仁不安地問。
 
「痴......痴線啦！呢個世界邊有咁多古怪嘢，咪亂諗啦！走啦，夠鐘返去做嘢啦！」阿朗推了推兩人，慢慢走回公司，回程途中，腦海裏卻又浮現了之前夢見「屍殺列車」的畫面。




 
「朗哥，走先啦！」很快又到了放工的時間，阿豪和阿仁跟阿朗打了聲招呼後，便先行離去，整間公司只遇下阿朗一人。
 
好不容易，他總算撐到了十二點，正當他準備離開公司，老闆突然致電給他，要他處理好某個客戶的要求才離開，阿朗只好無奈地留下。
 
「仆街！正仆街嚟架！差佬上嚟查佢啫，關我鬼事咩！係都要發洩喺我身上！屌你，個客係咪低能架？Restart一次咪得囉，屌！」阿朗邊處理老闆給他的工作，一邊抱怨著，待他處理好後，已經過了三十分鐘。
 
為了追趕尾班地鐵，他馬上收拾好後便離開公司了。
他總算在十二點五十五分來到上環地鐵站，為了能早點回家，他毫不猶豫的進了地鐵站。
 
但他卻不知道，十二點五十六分的尾班地鐵，在他飛快的跑向月台時，已經慢慢離開了。