《我係窮郵差，專門幫陰陽相隔嘅親人送信》（書局上架中）: 155

 
大叔⋯⋯
 
 
記得我曾經問大叔：「哩份工究竟有咩意義？連接人間同陰間，咁樣係一件好事？」
 
 
嗰陣我哋已經送完第一次信，返到大叔屋企，大叔喺度洗緊菜，我就喺廚房無所事事咁企喺度，玩住佢頭先送畀我嘅打火機。
 
 


噠⋯⋯開⋯⋯噠⋯⋯開⋯⋯啲火光幾靚。
 
 
「記唔記得⋯⋯我話人間嘅信代表連繫，陰間嘅信係代表咩？」大叔一邊洗菜一邊話。
 
 
「放下。」我答。
 
 
「所以你仲未明，點解我哋只係會幫人送一次信？」


 
 
「呃⋯⋯我未必真係明。」
 
 
「總有一日你會明。」
 
 
「大叔，你無屋企人？」
 


 
我見佢屋企只有自己一個人。
 
 
「曾經有⋯⋯」水聲突然間停咗，佢慢慢話：「而家走咗啦。」
 
 
「老婆？」
 
 
「同埋一個女。」佢繼續洗返菜：「不過我都睇開咗啦。」
 
 
記得嗰餐，我哋食得好開心，雖然菜唔係好豐富，只係普通嘅水蛋同炒菜，但已經令我有返家嗰種溫暖嘅感覺。
 


 
「我會去旅行啦。」食完飯，飲緊湯之際，佢講。
 
 
「吓？咁我點呀？」
 
 
「你嚟，咪就係接替我個位，唔係我點去長旅行呀？」
 
 
「但我乜都唔識⋯⋯」
 
 
「要救嘅就係咁多啦，總之記住用心送好每一封信就得。」
 


 
我哋繼續飲湯，我突然有啲感觸咁話：「大叔，多謝你救返我。」
 
 
「唔洗多謝，以後你救返其他人就得。」佢拍拍肚腩話：「記住，對想自殺嘅人嚟講，世界就係黑白色，佢哋好似色盲咁，同佢哋『形容』世界有幾咁色彩斑爛同亮麗，生活有幾咁多姿多彩，佢哋唔會太明白。」
 
 
「咁應該點？」
 
 
「世界美麗有咩用，倒不如畀佢哋『感受』到，自己⋯⋯其實係美麗。」
 
 
當我再擘大眼嘅時候，望見嘅已經係醫院白素素嘅天花板。