【完】最近我想追一個女仔⋯⋯: 懦夫連幸福都會怕

【32. 懦夫連幸福都會怕】

「頂你個肺，關我鬼事咩？你可唔可以入正題啊！」我大怒道，因為我在意的人只有阿玲一個。
.
「秋月無邊，涼風有信，漫漫長夜，你做咩咁急？」阿康忽然杜甫上身。
.
「我⋯⋯」
.
「況且，你有咩資格為佢著急？」
.




「我⋯⋯」我一時語塞，竟找不到反駁的餘地。
.
都係嘅，阿玲嘅事又幾時輪到我著緊？
.
阿康詭異地笑了一聲，續說：「呢個球場，就係我同阿儀相遇嘅地方。每次我一返嚟，所有回憶都會返哂嚟。但回味之後，淨底嘅就只有空虛。」
.
「你究竟想講咩？」他說的這些話到底有甚麼意義？
.
「呢種感覺真係好難受⋯⋯我第一次感覺到，就算我幾努力都好，只要阿儀唔喺我隔離，我個心就好似被人挖空咗一樣⋯⋯」
.




「所以？」
.
他抱著籃球躺了下來，雙眼遙望夜空。
.
今晚的天空很漂亮，一顆顆閃星綴著天際，但我現在哪有心情欣賞？
.
「嗰日佢心事重重咁嚟搵我，我見佢平時都唔係咁，已經知道唔知發生咗咩大事，咪問下佢做咩囉。我嗰時心諗，會唔會係佢屋企人出咗事呢？定係佢唔見咗啲好重要嘅嘢？」
.
月光映著兩道淚痕，阿康又哭又笑，道：「點知佢同我講，後日係佢隔離枱生日喎！但佢完全諗唔倒送咩俾好，所以煩到連覺都瞓唔著、飯都食唔落⋯⋯佢話佢隔離枱好好人，買嘢飲會買埋佢嗰份，上堂嘅時候會搵佢吹水，而且每日唔知點解都會講笑話；雖然啲笑話真係好爛，但係佢都會忍唔住笑。」
.




我心中起了一陣波瀾。我不知道，原來阿玲對我有這麼高的評價⋯⋯
.
「跟著我問佢：『咁關我咩事？』，點知佢又話，佢想知男仔會鍾意啲咩，但佢身邊比較熟嘅男仔friend就得我一個，所以佢問我可唔可以同佢一齊揀禮物。最後你都知我哋買咗啲咩啦。」
.
我看著地上的Forever Dream 背包，已是心領神會。
.
「其實你真係冇留意到咩？阿玲佢⋯⋯根本一直都鍾意你。」
.
「咩⋯⋯咩話？」我失神道，這樣的事我連做夢都沒想過！
.
「一個女仔，如果唔係鍾意你，又點會為你做咁多嘢？你諗下，你同佢單獨相處嘅時間，已經比我多幾十倍有多！唔係鍾意你，又點會咁做⋯⋯」
.
「咩⋯⋯佢為我做咗啲咩？」阿康的說話對我衝擊太大了。
.
「上年戲劇學會解散嘅原因，你知唔知係咩？」他好像早就知道我會這樣問。




.
「好似係⋯⋯喺公開表演嘅時候出醜，校長一怒之下就解散咗⋯⋯」
.
「咁你又知唔知，當年係邊個做女主角？」
.
我不料有此一問，嘴巴顫抖抖道：「唔、唔通⋯⋯」
.
他點點頭，續說：「只係因為一啲小失誤，佢嘅努力就付諸流水⋯⋯佢話過，佢唔會再做演員。」
.
他轉過頭來，說：「但為咗你，佢應承咗幫你拍片。」
.
我內心一揪，關於這件事，我竟然一無所知，還把一切當作理所當然⋯⋯
.
「佢好關心你，關心到好似以前阿儀對我咁⋯⋯所以某程度上，當我同佢一齊嗰幾個鐘，我就當咗佢好似阿儀一樣，雖然好短暫，但係我已經好滿足。我知我唔啱，但我都唔想⋯⋯你可唔可以原諒我？」
.




他看起來好像很後悔，但我仍無法忘記當日的畫面，我總覺得阿玲被其他人佔有了。
.
我重重嘆了口氣，道：「我唔知⋯⋯有咩之後再講⋯⋯」
.
「等陣！」阿康叫停了我。
.
「無論你原唔原諒我都好，我都想你大膽啲去追佢，或者佢都等緊你。」
.
聽罷，我緩緩步出球場，消失於朔月之中。
.

＊＊＊＊＊

.
我到底要怎樣做呢？真的要表白嗎？




.
一直以來我只是想搏取阿玲的好感，但如今有選擇在我面前了，我竟然有點猶豫不決。
.
說到底，我還是覺得自己配不上阿玲。
.
我既沒有阿康的高大威猛，亦沒有哈比人的聰明才智，更加沒有內涵，連用來包裝自己的玩世不恭都欠奉。
.
我不知道我能帶她到哪裡玩、不知道哪裡有好吃的、不知道要怎樣哄她高興⋯⋯ 這樣的我，去告白只是枉然⋯⋯
.
而我，又應不應該原諒阿康？
.
不想管了不想管了⋯⋯
.
萬般憂愁，唯有靠挑燈夜讀才能解。
.




轉眼間，期末考終於來了。那是我早已為此而準備的戰爭。每一份卷我都拼盡全力去做，有些題目很難，但我靠著不屈不撓、死磨爛磨的精神，竟也被我做出了一個靠譜的答案。
.
最後成績單發下來了。
.
阿玲、阿康和哈比人都考得很好，肯定能考得進A班、選到心儀的科目。
.
阿玲選的是PHY 、 CHEM 、BIO 、M2 ，即是超級全理科，全都是熱門的科目，若我成績稍有不濟，那麼我就與阿玲無緣了。
.
我早就下了決心，如果能跟她挑上一樣的科目，我就跟她表白。
.
「王傲風！」人形豬班主任喊道。
.
我緊張地接過成績表，用白紙掩著全級名次。
.

中文：100 / 141


.


英文：69/ 141


.


數學：34 / 141


.

看到這裡的時候，我已經心灰意冷了，這樣的成績大概是無望了吧，果真天要亡我⋯⋯
.
此時阿玲在我旁邊大叫：「嘩！阿風原來你通識咁勁㗎！」
.
「喂你唔係而家嚟膶我⋯⋯喂唔係，通識？」
.
我眼珠一滾，滾到通識一欄。


.


通識： 1/ 141
.
「我⋯⋯我考到第一？」連我自己都感到不可思議。
.
我再三檢查這份成績表是不是我的，最後大力一揭，急不及待看全級名次。
.
全級名次：50/ 141 （淮升 四年A 班）
.
「好耶耶耶耶！我升到A班啦！我揀到科啦！」我興奮得大叫了起來，拿起了阿玲的手狂舞，周圍的同學看我驚慌有如見到青山走犯一樣。
.
阿玲卻沒有尷尬，而是開懷笑道：「恭喜你啊！我哋下年又同一班啦！」
.
「嗯！」
.
雖然我一直拖泥帶水，但這次我真的下定了無比的決心——只要找到機會，我就會向她表露心跡！