從西鐵醒返之後……: 9

文字底下，重有倒數計時。

「一件衣服……六十秒！」望住電視嘅我一瞬間愣了愣，但好快我就明白到咩一回事。

而且燃眉之急！





正當我打算將外套除落嚟時，駱譯已經比我更快，將身上嘅冷衫除咗出嚟。

「逸、逸哥，等我去喇！」

「一齊去！」我衝向大門，然後回頭同夏舞講，「夏舞，你留喺度睇住，同埋幫手叫其他人出嚟！」

「喔、喔！」

我同駱譯打開大門，跑出走廊。





離目的地有四層，計埋等lift時間，跑樓梯可能會比搭lift更快！

我推開防煙門，然後向下跑。

「逸哥，你拎落去先啦！」腳程較慢嘅駱譯將冷衫遞畀我。

「好！」我接過冷衫，好快就先跑到落十四樓。

但係，眼前景令我大吃一驚——





一個血紅色嘅五芒星陣刻畫於地上，線條相當粗糙，周圍血點斑斑。第一眼望落去，就好似真係用血畫上去一樣……

熟悉超自然事物嘅我，清楚五芒星嘅意思——

喺部分神話中，五芒星象徵某部分神明，而基督教中亦象徵耶穌嘅五處傷口。

但若然倒轉嚟睇嘅話，則係象徵緊魔鬼與撒旦。

眼前嘅五芒星無論點睇，都係似象徵撒旦嘅倒五芒星多過象徵神明嘅五芒星。

當聯想到係用鮮血畫出嚟，胃部頓時有種翻騰嘅感覺，不過我好快將心情平復。

既然眼前得呢個五芒星陣，咁五芒星陣就係指令提及嘅目的地。





我將駱譯嘅冷衫放落血陣上，頓時一陣鮮紅光芒亮起！

「哇！做、做咩事？」啱啱跑到落嚟嘅駱譯大嚇一跳。

光芒黯淡之後，眼前嘅地板已經回復正常，唔單止五芒星血陣消失咗，就連駱譯嘅冷衫都一併不見。

「咁樣……即係代表完成？」我不解咁講。

雖然再一次出現超乎現實嘅景象，但我已經再無任何驚訝感覺。

我帶著疑惑，同駱譯返房間。

入到房間，就見到所有人出晒嚟大龐，而電視屏幕變回一片漆黑。

正當我疑惑緊結果係點嘅時侯，家明搶先一步講：「啱啱傳嚟廣播，指令已經達成。」





啱啱行返嚟並無聽到廣播聲……唔通要喺房內先會聽到廣播？

安心嘅係，五芒星血陣嘅消失代表指令嘅達成。

「發生咩事，電視個指令係咩嚟？」首先發問嘅人係阿曉。

「係，我都想知，周埋點解你哋會知道遊戲開始咗？」William一頭霧水咁問，「我同阿妹啱啱喺房度無聽到任何廣播。」

「咩話……？」聽見阿曉同William咁講，反而我感到疑惑，啱啱挪亞進行廣播時，除咗駱譯外並無其他人留意到，出嚟大廳幫手。

除非得一個可能。

我指向夏舞同莉莉間房，然後同駱譯講：「駱譯，你入一入呢間房，閂實對門。」





「喔……哦。」

駱譯進入房間，關上房門，我確認房門緊閉後，向住房間大嗌一聲。

大家都俾我呢個奇怪嘅舉動嚇到，而我就去打開房門，叫返駱譯出嚟。

「駱譯，你啱啱聽唔聽到我講嘢？」

「吓？你……有講嘢咩？」駱譯慌張咁問。

「原來係咁，你坐返埋去先。」我等駱譯坐返低後，就開始解釋：「係隔音牆同隔音門，所以你哋先聽唔到啱啱大廳嘅廣播。」

「但係點解你哋會喺大廳度？」家明問。

「我諗住放鬆下個人，所以落嚟大廳行下，咁啱遇到夏舞。」





「我都係……同埋我諗住重新包一包個傷口。」

之後，我向駱譯問：「反而係點解駱譯你會聽到廣播，你唔係喺房間入面咩？」

「喔……因為逸哥你無閂實對門，我隱約聽到啲聲，所以先出嚟睇下。」

「哈！咁真係要多得我無手尾。」我自嘲一聲。

謎題已經解開，因為呢度嘅牆同門全部都係隔音，所以睡房內嘅大家係聽唔到聲音。

「咁你同駱譯應該無聽到廣播。」家明望向我同駱譯，「除咗我哋，只有三間房間達成指令，另外四間無達成指令，而受到懲罰。」

竟然……有四間房遭受到懲罰！

假如我同夏舞無咁啱行出大廳，可能我哋都因此而受到懲罰……

話唔定呢啲都係挪亞嘅預料之中。

「而家有聽到廣播內容嘅就只有你哋三個，我哋其他人都聽唔到。」William望向我、夏舞同駱譯三個，「你哋可唔可以將啱啱嘅內容完整咁複述一次畀我哋聽？」

「無問題。」

我將剛才嘅廣播內容，同埋廣播完之後嘅狀況，包括我見到嘅倒五芒星，一滴不漏講晒畀其他人聽。

「大致上完全明白，只要指令出現，就要喺限時內去完成指令。」William點頭道。

「但係……」家明托一托眼鏡，「我哋點知指令幾時會嚟？」

「不定時可以係一分鐘之後，半個鐘之後，甚至幾個鐘之後。」我將猜測道出，「要等遊戲結束，就要等到聽朝。」

「即係……我哋要全部人坐晒喺度，等到聽朝為止？」Ellie驚愕咁講。

若真如此，呢場將會係一場消磨體力同精神嘅戰鬥。

「但如果我哋返晒房嘅話，就無人留意到指示。」家明講出問題核心。

「咁即係唯一方法就係我哋全部人留喺大廳，直到遊戲完結為止？」莉莉講。

「我唔贊成。」鮮有出聲嘅阿曉忽然開口，「就算我哋平安通過呢場遊戲，我哋都無精神同體力應付之後嘅遊戲。」

阿曉講得無錯，我哋唔單止要諗點樣通過呢場遊戲，重要考慮之後落嚟嘅狀態。

我哋都唔知挪亞會出啲咩遊戲。

「我……有個諗法。」駱譯膽怯咁舉手講，「我哋可以輪班，每三至四人一組留喺大廳當值，其他人就爭取時間休息。」

輪班……竟然可以用咁嘅方法。

「我贊成呢個方法。」阿曉點頭講，「總好過全部人留喺度。」

「我都贊成呢個方法。」夏舞講。

「的確係一個唔錯嘅方法。」Wiliam同Ellie亦示意贊成，而其他人亦無異議。

雖然駱譯份人比較膽小怕事，容易慌張，但不得不說佢有時會諗到啲其他人諗唔到嘅嘢……

可能連佢自己都唔自覺，其實自己比其他人都要聰明。

「輪班……」家明鎖緊眉頭，手托下巴。

「你覺得有問題？」我問。

「呢個都係無辦法之中唯一辦法。」沉默半刻，家明緩緩開口：「不過，我想大家明白，大家嘅性命就喺當值嘅人手中，所以必須要打起十二分精神，謹慎行動。重有如果遇上突發事情，就搵其他人出嚟幫手，我會隨時stand by，千祈唔好擅自行動。」

無錯……輪班嘅話，就等同於將自已嘅性命交於他人手上。

有呢種考量，係理所當然。

不過家明……雖然目前為止佢無特別表現任何態度，但我明白佢心裡並唔信任所有人，即使表面同意與大家合作，但佢心個套總係有自己嘅考量。

「無問題，一於咁話。」我講。

所有人一致通過輪班制後，就開始分組。

＊

我哋十個人分為三組，考慮到需要體力勞動，會將男女平均分配。

結果，我、夏舞同駱譯一組，家明、莉莉、修洛文同傑少一組，William、Ellie同阿曉一組。每組當值四個鐘，並由我哋組先開始當值。

時間大約六點，我、夏舞同駱譯三個待於大廳。

即使有其他事情打發，四個鐘都唔係話過就過嘅時間，何況處於呢個情況，我哋絕無餘裕去做其他事情。

「喔，逸哥、夏舞……話說，我想問……」駱譯忽然出聲。

「你唔使咁拘謹，放鬆啲。」望見駱譯緊張嘅表情，我道出一句建議。

「喔、喔！我想問，你哋覺得呢個遊戲又會唔會係參考某個兒童遊戲設計出嚟？」

夏舞搖頭示意，我亦回答：「唔知道。」

「我都唔知，但係關於遊戲規則，我有一個諗法。」駱譯講，「你哋有無聽過囚徒困境？」

「唔……曾經聽過，但唔係好清楚。」我答。

「囚徒困境係一個好經典嘅理論，警方拘捕咗兩個嫌疑犯，但無足夠證據起訴佢哋，於是警方就分開囚禁佢哋，隔絕佢哋嘅溝通。之後，警方分別同佢哋會面，向佢哋提供咗兩個選擇——沉默或者檢舉對方。假如兩個人都選擇沉默，佢哋會被各判半年；假如兩個人都選擇檢舉對方，佢哋會被各判五年。但假如一方沉默而另一方檢舉嘅話，檢舉者會即時獲釋，而被檢舉方會被判十年。」

「喔，係考驗信任嘅遊戲。」我講。

「無錯，但無論如何最終都只會導向一個結果。」唔知點解，眼前嘅駱譯變得有自信起來，與平時判若兩人。

「係咩結果？」我問落去。

「無法溝通嘅情況下，佢哋只會考慮自己，於是會有咁嘅諗法：如果對方檢舉我，咁我檢舉對方先可以獲得較短嘅刑期；如果對方沉默，咁我檢舉對方就可以即時獲釋。最終，結果必然係互相檢舉。」

「原來係咁，聽落好似幾有趣。」我講，「但係，呢個同我哋嘅遊戲有咩關係？」

「係——」

正當駱譯打算講時，電視屏幕突然亮起——

「五條頭髮……？」望到指令嘅我，一瞬間想摸向自己嘅頭，但當我見到出局條件時，就馬上停下手。

頭髮平均長度最短嘅房間……？

我記得挪亞講過，假如所有房間都達成指令，就會根據出局條件去選出最少一個出局者。＇

雖然上一回合有四間房無達成指令，但可能係因為佢哋留意唔到遊戲嘅緣故。

實際上，五條頭髮並唔係咩難事。

換言之，為咗保險起見，我哋必須要盡可能將五條最長嘅頭髮放落目的地，避免符合出局條件！

「今次我都去喇！」夏舞企起身講，「呢度得我一個係長頭髮。」

「……好！」我望向駱譯，「駱譯，你呢個回合留喺度先。」

「逸哥……」駱譯表情有啲遲疑。

「做咩？」

「……無，都係無嘢。」

我對駱譯嘅反應有啲不解，咁時間無多，我同夏舞先離開房間，沿住後樓梯跑落十六樓。

圍住走廊跑咗半圈，就喺路中心見到血紅色嘅五芒星陣。

「哇！就、就係呢個？」第一次見到嘅夏舞顯然被嚇親，差啲企唔穩。

「嗯，無錯。」

「喔……咁抆我嘅頸髮放落去喇。」

「可能會有少少痛，忍住。」

我伸手摸向夏舞嘅後腦，傳來溫熱嘅觸感。我將五條頭髮逐條乾淨俐落拔出，數清楚後就放落血陣上。

血陣亮起一抹紅光，連同五條頭髮一同消失於眼前。

「……咁就完成喇？」夏舞問。

「無錯……你打晒冷震咁，係咪好凍？」我問身體正在抖震嘅夏舞。

「嗯，有少少喇。」夏舞答。

「咁我哋快啲返房先。」

我同夏舞原路返到房間，大約坐低唔夠十秒，電視屏幕頓時關上。

『609、1009、1209、1409、1809房間達成指令。409、809未能達成指令，另外1609數量不符，皆視為未能達成指令，將隨機挑選一名玩家作為懲罰。』

呢次係我第一次聽判斷廣播，原來只有八間房間……

指令雖然講「每層『9』字尾的房間」，但事實上得由四樓數起到十八樓嘅雙數層數房間。

啱啱落樓時，我亦有留意到只有雙數樓層先有防煙門，單數樓層並無法通行。

睇嚟係因為複式房間緣故，一間房間佔用兩層，所以實際上每兩層先有一間房。

「估唔到今次竟然有三間房無達成指令。」睇嚟我對出局條件嘅疑慮係多餘。

「我哋平安無事就好。」夏舞輕輕挨落我膊頭上。

等等……

「夏‥…夏舞？」

夏舞……佢做咩無啦啦挨落我膊頭上……？

有種奇怪嘅感覺從心中萌生，呢個舉動霎時令我不知所措，而且……

咦——？

好似有啲唔對勁！



我望向夏舞，只見夏舞臉頰泛紅，嘴唇乾裂，額頭冒滿汗珠，露出一副十分辛苦嘅模樣……