[真人真事][校園][純愛]《總有一天，會再次遇見》: 第五十九章

落咗車之後

我:「送埋你上去啦 」

晞澄:「少有喎 」

我:「你隻腳依家咁樣自己一個點行丫 」

晞澄:「不過依家好似冇咁痛 」



我:「都係差幾步路咋嘛

唔爭在啦 」

晞澄:「咁好啦 」

跟住我就跟咗佢入去佢大廈嗰度,

當然我仲係扶住佢慢慢行啦



雖然嗰陣真係幾夜,

起碼點幾兩點鐘,

自己亦都幾眼瞓

不過都係嗰句啦,

鬼叫佢整到隻腳咩



依家咁咪當我補返數囉

上到去之後我就扶埋佢去佢屋企門口

跟住佢就撳門鐘,

冇幾耐之後就有人開門

講起上嚟我都係第一次見佢屋企人

之前我都講過啦,

其實我就唔鍾意見同學嘅屋企人

因為唔知講咩好



我總係覺得氣氛會好尷尬

即使上呀邦屋企都係,

如果佢屋企有人我就唔會上去

不過今次就算啦

反正都上到嚟佢住嗰層,

冇理由唔送埋佢去門口

跟住就佢呀媽開門,



佢呀媽同佢都幾似樣

我估三十零四十歲左右啦

絕對唔算老,

佢見到我個樣都呆咗一陣

我:「伯母唔好意思呀

晞澄佢整到隻腳

加上我又見到咁夜,

所以我扶咗佢上嚟



打擾晒 」

伯母:「整到邊度呀 」

晞澄:「腳踭嗰度呀 」

伯母:「唔該晒你呀細佬

點稱呼呀你 」

我:「叫我呀賢啦 」

伯母:「賢仔你入嚟坐下啦



辛苦晒你拖住呀囡咁耐,

飲杯水抖下先啦 」

我:「唔使喇伯母

好小事啫

我都攰啦返屋企瞓覺先啦拜拜 」

伯母:「真係唔該你呀

得閒歡迎賢仔你上嚟玩呀

拜拜 」

晞澄:「拜拜 」

跟住我就走咗

估唔到佢呀媽都幾好人

初頭我以為好似電視劇嗰啲媽媽咁樣,

成日都西口西面

點知個落差原來咁大,

仲真係好熱情

唔錯唔錯.


跟住我都返屋企沖涼啦

你估真係唔攰咩

沖完涼出嚟準備瞓覺嗰陣,

我就見到晞澄sms我

晞澄:「媽咪讚你好人呀 」

我:「事實上伯母冇講錯丫 」

晞澄:「你條友頭先嗰樣

仲乖過喺學校對住訓導嗰陣

好戲到 」

我:「唔通我講晒粗口咁樣咩

我得你呀媽都唔得啦下話

咪住先你有冇踢爆我 」

晞澄:「冇呀 」

我:「咁都好啲

幾驚你搞彎我形象 」

晞澄:「咁

有人今日咁緊張我隻腳傷咗,

又特登早啲陪我返嚟,

我都知嘅 」

我:「知你就好啦

聽日睇跌打 」

晞澄:「係呀 」

我:「咁早啲休息啦我都瞓覺喇 」

晞澄:「今晚真係唔該晒 」

我:「你地兩母女都真係好客氣 」

晞澄:「乜係咩哈哈 」

我:「長氣瞓覺啦 」

晞澄:「早抖 」

雖然今年聖誕唔係預期咁樣,

不過一啲都冇覺得唔開心

扶住佢行其實個感覺都幾唔錯

起碼我可以利用呢段時間俾自己暗爽,

當然我更加希望冇第二次發生啦

其實男仔有時好易開心,

只要可以對住自己鍾意嘅女仔獻殷勤,

而個女仔又接受嘅話,

即使係好簡單同你講一句「唔該」,

咁就已經滋潤到心靈

或者開心其實唔係真係咁難

呢啲咁微不足道嘅事,

起碼已經令到十一年後嘅我,

再去回味一次.