[真人真事][校園][純愛]《總有一天，會再次遇見》: 第六十三章
唔好話睇嘅你地覺得意外
就連當局者嘅我,
亦都意料不及
其實有時諗返起都好無稽
或者青春始終都係會有做錯決定嘅時候
今日唔知聽日事,
呢句野絕對唔係廢話
唔使多,
如果每個人都知道聽日發生咩事,
咁樣就好大機會可以避免自己唔想發生嘅事
不過世事又點會咁理想丫
都係無謂ff啦,
講返件事先啦
之前都講過,
sing con決賽喺禮拜六搞
我喺度講得決賽,
即係代表晞澄入到啦
亦都唔意外嘅
因為佢唱歌真係幾好聽
就喺禮拜五嗰日,
佢又提多我一次
晞澄:「聽日一點鐘呀
」我:「放心啦
其實真係唔明,
明明係你唱歌搞到好似我唱咁樣
我去唔去你都贏架啦
歌后喎
」晞澄:「唔係呀
你唔喺度我唔知望邊個好
」我:「你求其搵條蛋散啦
」晞澄:「呢啲邊有得求其
唔好走數呀
」我:「唉得喇得喇
總之聽日一點鐘禮堂開咗之後我就坐喺第一排啦
」晞澄:「好野
」我:「咁都可以笑一餐
」晞澄:「你識乜野呀
」跟住都各自歸家,
佢又學埋嗰班人咁樣,
飲埋嗰啲乜鬼野咸柑桔
不過話知佢啦
咁我都想佢贏嘅
有邊個男仔會想自己鍾意嘅女仔輸先得架.
喺嗰晚
上網上到十二點就瞓覺
原本想喺msn嗰度搵晞澄嘅,
不過我估佢都瞓咗覺
咁就無謂打擾
原本一切都好正常,
點知瞓瞓下,
無啦啦俾人嗌醒
媽:「起身呀,
你呀公唔得喇
」對於啱啱瞓醒嘅我嚟講,
腦袋一時之間空白咗
因為完全唔知噏乜
我:「做咩呀
」媽:「我話你呀公入咗醫院
醫生叫我地快啲嚟見佢最後一面呀
」我:「點解無啦啦咁
」媽:「唔知咁多呀
你知你呀公本身都有病
」跟住我個腦終於醒返
即刻換定套校服,
因為我一早同佢地講咗今日要返去學校
當然個理由係學校補課啦
而唔係同佢地講要去聽晞澄唱歌
搞完一輪之後就搭的士去,
我記得嗰陣係凌晨四點半
跟住就見到呀公插晒喉咁樣,
講真當時嘅我唔係好大感覺
因為其實我同我呀公感情唔算好深
不孝啲講句,
其實等於一個普通嘅老人家咁樣
咁當然啦
見到佢咁就梗係辛苦啦
不過就冇我老豆我阿媽咁激動
跟住我呀公都捱咗幾個鐘,
去到朝早十一點終於走咗,
跟住我呀媽就打晒俾咁多位冇嚟嘅親戚
將呢個消息同佢地講,
而其他有到場嘅親戚,
就成班人圍埋喺度傾身後事
點樣處理又乜又乜,
呢個時候我就sms俾呀邦,
叫佢幫我留住禮堂第一排其中一個空位
我同佢講有正經野搞緊
一搞完就返嚟,
如果有人問起我喺邊度,
就話我整緊正經野
跟住順便熄機
驚嘈到人
搞咗一輪都差唔多到兩點半,
我見佢地仲有排傾
就話我要返去學校補課
咁佢地都話讀書緊要就俾咗我走
跟住一落到去醫院門口就即刻搭的士,
喺度講下先,
平時我一個人嗰陣,
從來唔搭的士
最大原因當然係因為貴
呢個原則去到今時今日都係咁
不過嗰一刻我就破咗例,
如果我再搭巴士左兜右兜,
去到九成九完咗
依家唯有希望冇咁快完啦
上到的士我就開返電話睇,
一打開嚟睇原來呀邦係咁sms我
「開場喇到未
」「聽人講仲有七個到charlotte.」
我心諗你條友真係好野
咁都知仲差幾多個到晞澄
「得返三個咋
」「呀穎都問你喺邊度
」「唱埋依家呢個就到charlotte
」睇晒啲SMS之後我就咁啱去到學校落車,
跟住即刻跑去學校
一去到果然散咗場
我喺操場見到呀邦同呀穎
就行埋去問佢地,
我:「咁快完嘅
」呀邦:「你仲好講你去咗邊度嚟
」我:「都話有正經野做緊
」呀邦:「知唔知charlotte係咁搵你
打你電話又唔聽
」嗰陣我就唔鍾意俾人知道自己今朝有屋企人走咗
覺得呢啲唔係好野
所以我就冇同佢地講呢件事
我:「都話有野整緊
你估我特登唔嚟咩
咁最後佢唱成點
」呀邦:「第三囉.」
我:「咁都好啦仲想點啫
」呀邦:「唔係呢個問題呀
」呀穎:「charlotte驚你唔知有咩事
因為佢話你平時好少咁冇搭霎
佢叫我地係咁搵你,
以為你出咗危險
」呀邦:「你睇人地幾關心你
」我:「喂大佬
做乜搞到依家好似我做錯野咁樣
又唔係特登唔嚟,
講咗真係有正經野做丫嘛
況且學校呢度又唔係有啲乜野大件事
都只係一個騎騎呢呢嘅歌唱比賽啫
」講真我嗰一下真係有啲火
一嚟到就係咁俾人問,
本身有屋企人死咗心情都唔算好好啦
雖然話感情唔深啫,
更何況我成晚瞓得三個鐘左右,
精神狀態極差
我仲已經補埋鑊搭的士過嚟
平時係唔會搭
你話我遲起身,唔記得咗呢啲大意野就話啫
咁我真係有野做,
你估我想特登唔嚟
跟住我見佢兩個視線望去我後面
咁我就擰轉面啦,
就見到隻眼腫咗嘅晞澄
頭先應該喊過嚟
唔通因為拎唔到第一
不過嗰陣我唔敢講笑
因為見到佢個樣好嬲
好耐冇見過佢咁嘅樣,
之前有一次我激嬲佢嗰陣,
佢都冇依家咁好火氣.