[真人真事][校園][純愛]《總有一天，會再次遇見》: 第九十一章

我同Eunice一路發展以嚟,

自己都覺得冇乜特別野

所以我都唔多講當中嘅情節喇

去到2015年我同Eunice就結婚

我好記得結婚前兩晚,





呀邦搵咗我去球場飲野

因為聽朝要早起身準備後日結婚嘅野

咁就費事去酒吧

唔知醒就大鑊

呢幾年大家都少咗踢波





仲係讀緊u嗰陣就要做project,

出到嚟做野你估唔使搵食咩

所以我地落到去街場都係射籠為主

仲邊有鬥波嘅氣力丫

其實大家都係志在出嚟吹水,





我地射完籠就坐低喺度飲野傾計

呀邦:「我地識咗幾多年 」

我:「十年囉,

05年嗰陣識你嘅 」

呀邦:「咁就做咗十年朋友

時間過得真係好快 」

我:「你唔係基佬下話

無啦啦講啲咁嘅野 」





呀邦:「你都戇居

要基嘅使等到依家 」

我:「又係嘅十年時間

要基一早基咗啦

好彩唔係咁都放心啲 」

呀邦:「我只係覺得好感慨啫

十年朋友唔易呀,





話咁快聽日你就結婚

開始覺得自己真係老喇

身邊愈來愈多朋友結婚 」

我:「係咪打唔到飛機呀

所以先有呢個感悟 」

呀邦:「你收皮啦

你虧我都未虧 」

我:「挑 」





呀邦:「不過咁,

有一單野我真係好想問你

一路唔敢問,

但係你聽日就結婚,

有啲野我好想知道

原諒我嘅好奇心 」

我:「問啦屎忽鬼 」





呀邦:「你真係鍾意Eunice 」

嗰陣呀邦係我身邊唯一一個知道Eunice中文名嘅人

又難怪佢會咁樣問嘅

我:「真係好想知 」

呀邦:「係

我仲記得當日你同我講Eunice中文名叫乜野嗰陣,

我係呆咗一呆

其實咁耐以嚟係咪冇放低過 」

我:「咁講啦,

我依家終於明白點解以前啲人成日講,

同你一齊嗰個多數都唔係最鍾意嗰個

我以前唔明架

猛咁喺度諗,

結得婚咪即係最鍾意嗰個囉,

原來以前嘅自己真係好愚昧

又或者轉第二個講法,

我最鍾意係咪Eunice唔緊要,

只要佢覺得我係最鍾意佢咁就得啦

對於呢一樣野我好有信心

至於我最鍾意邊個,

唔好逼我講啦,

一日唔講出口我都可以自己呃自己

但係一講咗我自己都會聽埋,

咁到時就冇得呃 」

呀邦冇再講野,

淨係攞罐啤酒同我乾一乾杯就算

其實大家心裏面都有個答案,

只係唔想講出口.

結咗婚,

冇幾耐我老婆就大肚

嗰陣我陪我老婆去照超聲波

知道係女仔之後,

咁就梗係拿拿臨準備啦,

bb啲野又有

坐月嗰啲野都有

係好忙但係又好興奮

第日你地做老豆嗰陣就明白係咩感受

你會知期待係點解

買晒所有野之後,

我老婆屎忽痕話諗改名

跟住我就諗到啲野

我:「你唔係想去嗰啲乜鬼野堪輿學家嗰度改名下話 」

老婆:「梗係唔係啦你知我都唔迷信嘅 」

我:「咁呀,

中文名你諗囉

你啲文采勁過我 」

老婆:「懶鬼名都唔諗 」

我:「我改嗰啲出唔到街呀

一係咁我諗英文囉 」

老婆:「又好啫 」

諗咗一輪之後我老婆終於諗到

仲講埋俾我聽

我:「幾好聽喎 」

老婆:「到你喇

你有冇諗架 」

我:「梗係有啦你當我吹水咩 」

老婆:「講嚟聽下 」

佢大我喎

你估我真係冇諗咩

我:「Charlotte,

好唔好呀 」

老婆:「幾好聽喎

無啦啦點解會諗到呢個名 」

我:「以前睇唔知邊套戲嗰陣,

我記得有個好靚嘅女主角係叫呢個英文名

咁就記咗入腦 」

老婆:「係咪真架

邊套戲嚟架 」

我:「一早唔記得啦

入到去淨係睇靚女咋嘛 」

老婆:「你真係

掛住睇靚女 」

我:「我唔睇靚女又點娶你返嚟呢 」

老婆:「口花花 」

我:「偷笑

明明就好開心 」

其實真係好自然諗到呢個英文名

咩原因都好,

諗到就冇問題啦

同埋我老婆信就可以,

係真係假又重要咩