波瀾: 第四話(一)

第四話
 

2014
 
因為工作開始繁忙，加上父親的工作時間也難以配合，結果冬至的那頓飯硬是拖到了一月上旬，順便與阿實哥哥的生日放在一起慶祝。洗完碗的阿實坐到沙發上，一手摟著正看得津津有味的母親的肩膀。
 
現在紅哥已能在黃金時段的電視劇中佔一席位了，聽到阿實開始多了工作，作為家人他們也覺得頗欣慰，但看到有師兄已開始能踏足影視界，不免又有些說話讓阿實聽得不太舒服。
 
他哥哥中五畢業以後便出來工作，雖然勤奮但能力所限，這十多年來什麼保險、金融、零售、三行都曾幹過，但一直都無法離開底層的階段。阿實讀大學的學費裡也有他出的一部分在，因此對於現狀他不太滿意也可以理解。




 
「我明你有自己嘅理想同諗法，後生仔有做自己想做嘅嘢嘅自由，」同樣坐在沙發上的哥哥沒阿實那麼黏母親，僅是坐在邊上彎著腰地看電視。「既然老豆阿媽都無乜反對你，咁我亦都無乜好講。但你用咗屋企咁多錢讀個degree返嚟，而家個個月咁樣唔畀家用好似得過且過咁……我覺得唔係咁好囉。」
 
「而家我都開始多job……好快就會……」阿實看著電視螢幕上意氣風發的紅哥，有點羞愧地答道。「總之呢個月開始我會畀家用。」
 
「唔駛勉強嘅，而家我哋又唔係等嚟開飯，我同爸爸都有嘢做架嘛，你哋一個月先返嚟食嗰一兩餐，住又唔係喺度住，家用畀唔畀都無乜所謂啦。」母親看著他倆一眼，笑道。「第時搵到錢再慢慢畀啦。」
 
「放心，我唔係話催細佬定點，做得大佬嘅我預咗，」哥哥轉過頭來看著阿實。「最緊要係你要知道自己做緊咩。」
 
阿實的父親坐在飯桌上，手中攤著當天的報紙，不發一言。




 

家豪跟女朋友求婚了，說是要在半年內結婚。阿實當然打從心裡為他們高興，但看到童年的好兄弟將要踏進另一個階段，再想想自己，多少有點感到唏噓。
 
「你唔係話嗰日個show佢有嚟咩？無下文啦？」家豪吃了口飯，問道。
 
「嗯……」阿實欲言又止地囁嚅著。「老實講無乜。」
 
「老老實實，佢嚟得現場睇你，你仲要話佢都有係咁笑，咁講真你真係有機喎。」
 




「希望啦……」
 
「Ｘ你畀少少自信啦，」家豪罵道。「咁嗰日完咗show之後有無同佢食飯之類啊？」
 
「嗰日我有喺後台問佢，但你知啦我臨急臨忙約人，嗰日咁啱佢約咗屋企人食飯，所以就……」阿實嘆了口氣。
 
「真係？唔係約咗其他仔？」
 
「嗯，我見到來電顯示，同埋佢唔會講大話架。」
 
「唉得啦得啦……」家豪沒好氣地白了他一眼。「聽你呢啲毒男形容女神嗰陣真係特別嘔心。」
 

半年前的棟篤笑大獲好評，加上紅哥跟阿歡接連走紅，作為小師弟的他也開始進入大眾的視線。Peter不時會接到一些來自電視台的工作邀請，雖然大多都是些無關痛癢的綠葉角色，但阿實也開始感受到事情正在往美好的方向發展。
 




轉眼間，阿歡的工作亦開始多得接不過來而要篩選了，公司裡誰也沒想到「正方形乳頭」這個梗居然會流行這麼長一段時間還有餘溫，但似乎沒多少人提起過他的下一場棟篤笑演出，即使他其實一直都有在充實著自己的小本子。
 
於是阿歡主動提出想準備開演新的棟篤笑，為此他跟Peter在會議室裡聊了相當長時間，阿實來到辦公室時才知道他們已在裡頭兩個小時沒出來。
 
Peter是一直都支持他們抽空去準備棟篤笑的，但問題是阿歡現在的通告和工作預約都很多，從商人的角度來看，現在乘著其人氣還沒衰退，繼續憑著廣告和曝光率去擴大知名度確實會比較合理。只是在這種工作密度下，阿歡根本沒可能抽空去寫段子組成一段兩個多小時的棟篤笑。
 
「折衷啲，一係再過多三個月，到時再減少啲job，畀時間你去寫嘢，」Peter在日程表上畫了幾筆。「又或者請幾支槍返嚟幫你分擔下。」
 
「我接受唔到請槍，我諗呢一點我哋三個都係一樣。」阿歡果斷地搖頭拒絕。
 
「嗯……」Peter敲打著桌面，抬起頭看了他一眼。「咁Plan A？」
 
「如果你問我嘅話……我直情想而家就開始接少啲job。」阿歡看向一旁，答道。「可能你會話我有錢都唔識搵，有位都唔識上，但嗰啲上節目嘅嘢，你見我其實都唔太擅長，嚟嚟去去都係嗰個gag攞出嚟俾人笑……」
 
「嗯……」Peter抿著嘴，右手的食指依舊有節奏地敲打著桌子。「咁你要幾多時間？」




 
「一個月……？」
 
「畀個肯定啲嘅答案我，唔好到時又話未Ｘ搞掂又要再extend。」Peter吸了口氣，坐直身子拿起桌面的煙盒。「你而家唔再係幾年前嗰個無人問津嘅阿歡啦，時間開始會變得有限。我明創作呢家嘢需要靈感，但你要學下同練習下點樣喺有限嘅時間入邊唧啲時間出嚟。」
 
「九十日。」
 
「認真？」
 
「認真。」
 
阿實在會議室門外停住了想敲門的手，想起自己也好久沒有再打開那本紀錄著自己靈感和想法的筆記簿，也好一段時間沒再去那家茶餐廳悠閒地坐一個下午了。