親愛的，老師也有喜歡過你: 幾忙，都想見你

雖然我講到好似好灑脫咁, 但我又成日衰心軟. 有時心掛掛, 又手痕, 就會上佢instagram stalk下佢.
我諗個個女仔都係咁, 當自己鍾意一個人, 但又唔肯定人哋嘅感情狀況嘅時候, 個個都好似福爾摩斯上身咁,
即刻去人哋啲social media, 睇吓有冇啲咩蛛絲馬跡. 但礙於老師呢個身份嘅關係 (又或者佢其實有太多不可告人的秘密),
K其實都好少Post野, upload得嘅相都離不開風景同埋美食大特寫.

我碌吓碌下佢instagram, 見到佢放咗張Cinque Terre影嘅相, 我先醒起佢三月尾佢去咗轉意大利.
上網睇過, Cinque Terre明明就好靚, 但比佢影到成個貧民窟咁款. 到底係啲人假相, 定係佢影得衰呢？
突然間, 我個電話「叮」咗一聲, 有人snap我.

我打開snapchat, 見到K send咗張相比我, 我㩒落去, 但係等左勁耐, 張相都未load到.




我再㩒咗吓reload, 之後放低咗部手機係枱面, 由佢自己慢慢load. 我行番入自己房, 係我枱面疊書下面搵番佢比我封信.

「以前放咗工都留係學校做野等埋你練完波先一齊走, 你成日都擔心比人哋見到.
擔驚受怕嗰個樣, 真係好搞笑. 依家又要出到九龍返工, 又多野忙, 但一得閒, 我就想搵你. 」

喂, 大佬, 點會係唔怕比人閑言閑語...嗰陣咁張揚, 學校知起上嚟, 仆街嗰個通常都係老師㗎, 係咪傻咗.
仲有, 冇人叫佢出去教埋啲名校姐, 賺埋啲錢都冇埞洗㗎啦, 日日搞到自己疲於奔命, 為咩姐？
不過魚唔過塘係唔會肥嘅, 所以有時吊頸, 又識得抖下氣就得, 最緊要係唔好壓力過多、諗唔開, 千祈唔好死, 比你攝吓又點話.

聽佢講, 轉咗工之後佢晚晚都九點幾就瞓. 諗下又係喎, 次次我半夜三間send比佢啲message, 佢都係清晨覆我.




計落佢轉工已經兩三年, 日日咁早起身, 換轉係我, 一定頂唔順. 大佬, 啲人雖然成日笑啲老師係教畜.
但佢地番工要教書, 唔係番去扮工喎！仲要對住我地呢班番學等放學嘅、上堂又唔聽書嘅塞豆窿, 其實點解咁睇唔開, 要去教書？

「最近忙住搞緊個project, 晚晚都7點先收工, 返到屋企沖個涼就瞓. 上次約星期四晚食飯, 我都預咗第二朝要打的返工.
你好好咁話改期等我放假先見, 但我知道一講下次, 又要唔知等到幾時. 你話係咪真係要等到你變咗棄婦呢？」

天時、地利、人和都好緊要, 有啲嘢時機唔成熟, 因緣未到, 就冇可能開花結果.
我諗冇人想做第三者嘅, 我明喎, 所以你先會寧願等到我第日變棄婦, 都唔敢輕舉妄動.

「隔咗兩年再見返你, 覺得你大個咗好多. 諗番起你以前齊陰、戴眼鏡個樣, 就覺得時間真係過得好快.




我諗依家是但求其搵個人, 都估唔出我大你十年咁多. 上次個侍應先話咩 “女朋友想食咪咩咩咩”,
我見到你又無奈又尷尬, 我心諗, 誤會吓啫, 唔洗面都紅晒喎, 依家我好差咩！」

啲侍應真係好鍾意亂搭訕, 依個世代啲男男女女關係好複雜㗎, 啲人可否唔好再假設一男一女出街就係情侶...
依家兩男兩女都可以係couple㗎. 但其實, 個侍應估我係佢女朋友已經好比面,
如果佢暗地裡覺得佢請ptgf又或者話 “細妹想食咩”, 咁樣咪仲可悲...不過我仲慘, 躺著也中槍...

不過講真嗰句, 我不嬲睇上去都係老相啲, 啲人成日都估我24、25歲, 我係打扮成熟嘅, 但我突登㗎嘛.
大佬, 明知你收工過黎都係會著得試試正正, 我唔通著到成個bb咁咩.
我做唔到好似其他大學生咁, 成日都踢拖、著頹tee. 我覺得打扮有時係一個基本嘅尊重.

「上次你問我有冇覺得你大嚿咗, 我話冇係呃你咋, 你以前邊有咁好肉哋. 唔知係咪肥肥哋係咪特別好攬嘅呢. 」

喂, 講埋啲咁嘅嘢, 成個說法我覺得好explicit, 哈哈. 老規舉, 唔可以對對方有太多遐想.
Btw 其實我好多時同我啲朋友見面都會攬一攬, 不論男女的. 你地唔覺得香港人好生外嘅咩.




好似就算同個朋友識咗幾耐都好, 掂吓好似要死咁. 所以如果下次見面同道別嘅時候,
只要我個朋友唔好尷尷尬尬或者趕住走, 其實攬吓對方有咩所謂.
不過到底佢話我好肉哋係讚緊我定彈緊我, 我睇唔透.