在IG上重遇你: 01

「Bobo_wing已要求追蹤你。接受/拒絕」

「雖然唔知係邊個，不過accept左都冇壞，反正係女就得。」我㩒左接受，但對方未同意，淨係顯示「已提出要求」。我並唔知道，因為㩒左接受，我同佢就拉上左關係

三天後……

我㩒緊手機嘅時候，竟然有人係IG DM我。我留意下個用戶名，係嗰日follow我嘅女仔。我心諗唔通個天可憐我，於是送我一個女友

Bobo：「請問你系咪馬國威？」





我：「yes 你係邊個？」

Bobo：「我系你小學同學，你記唔記得坐你隔離個女仔」

唔係掛，成十年前嘅事我邊記得。我諗黎諗去都唔記得，今次真係仆街啦！

Bobo：「估你都係唔記得，我係羅穎妍」

我：「我記得啦，你係箍牙孖辮妹。做咩冇啦啦follow我？」





Bobo：「其實係我地想搞個小學聚會，所以咪要搵番大家。」

小學聚會，成十年冇見，都唔知認唔認得出大家。自從小學畢業，我就冇同任何人聯絡，一黎以前冇電話，二黎大家見面又唔知做咩好，所以基本上冇人搵到我。

Bobo：「知唔知搵你搵左幾耐:unamused::unamused:？成班人都冇你電話，本來諗住放棄唔搵，點知又比我係IG搵到，真係好彩！」

我：「你都幾有恆心，咁你地幾時聚會？」雖然唔係幾想去，不過難得可以見番啲同學，都系出現下，費事啲人以為我死左。

Bobo：「今個星期日，七點，尖沙嘴XX酒店宴會廳。記得準時！見面再傾」





我見自己訓唔返，就睇下佢IG上面啲相。佢好多post都係影啲畫作，睇黎佢同以前一樣，好鐘意畫畫。睇下睇下，已經到凌晨三點，周公又叫我陪佢打麻雀。

星期六晚上………

終於趕好左份功課，但已經凌晨兩點，所以上左個fd嘅宿舍訓。

「Steven，聽晚落唔落老蘭？好似你個女神都去。」

「聽晚要去小學聚會，都唔知搞到幾點？如果有時間咪去。」

唔知點解我竟然有少少期待聽日個聚會，可能人大左，開始想緬懷過去。前幾日，我摷返以前小學影嘅畢業相，望返以前自己個樣，真係好Young。再望下Bobo，唔知佢依家咩樣呢？希望唔會係隻恐龍啦。突然間，電話震左震，我睇到係Bobo嘅信息，雖然好眼訓，但都係覆左佢先。

Bobo：「阿威，你訓左未？」

我：「未呀。做咩咁夜搵我？」





Bobo：「冇，啱啱做完份project，先醒起要提你聽日係小學聚會🤦！」

我：「我記得，唔好以為我係你，咁冇記性:joy::joy:」

Bobo：「」

我：「夜啦，早啲訓啦，唔係我聽日會見到隻熊貓」