[劇毒]自從裝左小熊來電之後……我部電話就無響過……: 15

[1/3/2015 20:31] 

我地離開左旺角電腦中心，沿住奶路臣街，穿過多人既花園街，走入條相對上無咩人既洗衣街，一直行到去街尾，間Starbucks就正正喺衣到。
若果你平時行過都未必會好留意到原來衣到有間樓上式既Starbucks，入口唔突出，但係當你沿住條樓梯行上去果陣，你會發現有堆九龍皇帝式既大字寫晒上牆到。

我地沿住樓梯上到一樓既入口，啊樺就舉一舉手停低左話：「等等先，我地分開兩班人去搜尋衣兩層。」

啊樺一講完，大隻佬就拉住運動姐姐同Major Tom走埋去我同啊樺到。
我望一望Major Tom，佢對我笑一笑，睇嚟氣息好左好多，唔洗再要人扶，自己都行到。
我再望望龍友果邊，唔洗講都估到，佢一早mark實左港女OL，四眼警察就半推半就咁跟左佢地。




正所謂敵人既敵人就係朋友，MK仔當然痴埋去龍友到，援交妹就跟實MK仔。
而且唔知幾時開始，援交妹變到同MK仔好Close，仲要繞實晒MK仔隻手。
我心入面不禁對MK仔甘拜下風，只係短短既幾個鐘，MK仔就將援交妹溝到手。

都總算分好隊，啊樺就對住我地隊人講：「我地上二樓睇啦。」
大家默默咁點頭就跟住啊樺各自拎住部單反行上去。
上到二樓，啊樺指幾指，大家就跟住佢既分工各自散開。
如果要形容衣到既環境，我只可以話係"復古大雜燴"。
咩意思？
地板係有舊時冰室既feel，牆上面仲有好多舊式招牌寫住啲關於Starbucks既野，又有好多舊時電影既廣告牌，衣堆野加加埋埋，咪就係"復古大雜燴"。





我地成班人拎住部相機周圍走，但係好彩間Starbucks唔算多人，而且唔似之前喺旺角電腦中心咁，啲人會郁，所以對比都快左好多。
啊樺帶我地落番去同龍友佢地會合。

一落到去，四眼警察就成個棟左喺入口果到，對住部相機望一望，再睇睇條樓梯。

大隻佬舉起隻手問四眼警察：「喂，兄弟，你喺到做咩啊？」

「哦，嘿嘿……無啊，影相果個哥仔SET左個腳架同相機喺到叫我睇水。」四眼警察露出佢個招牌苦笑，睇嚟都似係比龍友公報私仇迫左去站崗。






果然毒撚係唔得罪得……


大隻佬講左句「加油」就跟左我地入去。
點知一入門口就已經見到龍友同MK仔企左喺個Counter後面，扮係Starbucks職員左搞右搞。
而港女OL一早搵左個無人坐既位，斯斯然咁用刀叉嘆緊佢個cheese cake。
援交妹就拎住杯類似MOCHA既野周圍走。
龍友見到啊樺就話：「好，大佬到。啊賢，你叫Stephy同Karen佢地過嚟啊。」
MK仔點點頭就走左過去搵OL同援交妹。
龍友順手就喺個counter到交左幾個包比我地食。

如是者，除左四眼警察之外，我地上左二樓搵左張枱坐低。

自從龍友發現左相機可以搵出偽裝既西裝佬之後，個人自信左好多，佢一副大佬樣咁同我地講：「我睇過衣到應該無果班西裝佬，同埋我set左個腳架喺一樓門口，咁就可以隨時監視到有無西裝佬入嚟。」





「我覺得我地仲可以喺衣到既窗邊set多兩部相機。」運動姐姐指一指二樓衣層果兩塊可以望到街外面既玻璃窗。

「其實我簡衣間Starbucks就係貪佢睇到街外面既情況，入口得一個，人流小，方便我地提防果班西裝佬。加上有個野食下，ok既。」運動姐姐再補充。

啊樺飲左啖mocha話：「每人負責監察一邊窗，但係樓下入口，我覺得至小都有兩個人，始終果個位係重要啲。」

龍友比左個大拇指啊樺：「你岩。」

港女OL提出左個尖銳既問題：「咁如果佢收鋪點算？我地咪困住左喺到？」

MK仔輕挑咁講左聲：「超！你唔記得左我地透明既，我去拎條鎖匙咪得囉。」

港女OL反駁：「啊傻仔，你唔記得左門口得一個啊？西裝佬只要圍住個門口，我地咪死得？」





運動姐姐解釋：「哦，其實有防火門既，果到走我覺得OK既。」

港女OL聽到都無咩好講，龍友就走出嚟整個中場休息：「UM……你地等我一等，我去SET一SET腳架先。」

討論暫都因應龍友一走暫時性停止。