《香港傭兵》: [Day 06－護送委託] PART 02

綽姿仲係若無其事咁，切隻失事墜毀嘅UFO...放入口...

咬咗幾啖，又拎咗我手上包奶飲兩啖...

『喂喂喂！』我立即拎開綽姿手上包過期奶！『過期㗎！過咗兩個月喇小姐！』

兩個月喇...牛奶過期兩個月呀！變芝士啦！

「有咩問題？平時都係咁飲。」綽姿完全無視我！一手搶返包過期奶繼續飲！



『喂喂喂...會屙㗎！』我諗應該唔止屙咁簡單...仲會嘔到七彩！

「我未試過。」綽姿放低包奶就繼續食炭！

嘩...咩構造吖？科學怪人呀？

『喂喂...有返少少要求好唔好？』唔係乜嘢狗屎辣殺都放入口㗎嘛...

「喺呢區仲講乜要求？」綽姿完全無視我，繼續食炭。



『呢區都可以有返啲要求㗎！尋晚嗰餐都唔錯吖～有魚有蝦仲有啤酒飲！你仲有得揀唔食老鼠扒！』仲要都幾多人食吓！

「魚？蝦？你會覺得係喺邊度運嚟？」綽姿打量住我。

『喺邊度運嚟？喺海度運嚟囉...』唔係喺海，仲可以喺邊？

「係...的確由水路運嚟。但你唔會認為係喺海裡面新鮮生猛捉上嚟掛？」綽姿冷眼望住我。

『唔係㗎咩？』三聖咁近海...唔係直接捉會容易啲咩？



「你尋晚唔覺碟碟唔係炸就係碎件...甩皮甩骨咁上㗎咩？」

炸？碎件？甩皮甩骨？

「全部嘅食材都係出面賣唔出，死咗好耐，臭晒，冇人要，人哋食剩嘅Dom喺街邊等人執...再唔係就係受輻射影響異變嘅畸形怪物，運入嚟賣俾我哋。」

『咩話？！嘔...』仆街我諗諗都嘔出嚟！

痴撚線㗎？！食死人㗎！

『喂...咁你尋晚又食得咁安樂？！』仲要唔止得綽姿...仲有其他人都係大啖大啖咁食！

其他人我就唔知佢哋知唔知...

但綽姿係知㗎喎！



明知啲嘢咁撚邋遢都食得落？！

「咁係咁㗎啦。」綽姿繼續若無其事咁食炭。

咩係咁係咁姐？

我真係覺得呢句嘢難聽過粗口！

講到好似迫於無奈唯有接受咁！

喂！你有得揀㗎！

喂！你有得反抗㗎！



做乜係都要逆來順受呀？！

唔通人哋俾屎你食你又要食呀？！

「咁你係唔係唔食吖？」綽姿冷眼用餐刀指指我面前碟炭。

『食！食...』鬼叫我肚餓咩...

嘩屌！真係又苦又鹹咁！又要用奶灌住嚟食！

皺住眉咁同綽姿一齊食架燒焦咗嘅UFO同幾舊炭...

好唔容易先食完一餐我人生之中最難食嘅早餐...

「我接咗個護送委託。你今日去踩吓線。仲有，帶定裝備...帶埋支Level 2出去。」綽姿一邊著校服，一邊吩咐。



『哦...』我就拎晒啲碟碟刀刀叉叉去洗。

究竟我食咗啲乜？

成口苦苦澀澀鹹鹹酸酸咁...

一邊洗啲碟碟刀刀叉叉，一邊回頭偷偷望綽姿...

綽姿已經著好校服，背住我對住梳妝檯上把鏡仔梳緊頭。

就算綽姿幾有細妹Feel都好...廚藝未免太差了吧...

所以話細妹煮早餐俾哥哥食呢啲溫馨情節唔會發生係我同綽姿身上囉...



「咁你記得睇個委託內容。」綽姿著埋件大褸，就孭起個斜孭袋。

『哦...』有乜鬼委託內容吖？我咪又係冇Permission睇...

「出去小心啲...拜。」綽姿著埋對婆仔鞋之後就出門。

『哦...你都係...拜拜...』小心啲？

嘩...真係難得...綽姿會關心我喎～

其實綽姿呢個小妹妹都唔錯吖～

唔錯啲乜？我喺度諗緊乜？

其實都...冇話諗啲乜...

話晒都算係一齊生活...唔通下下都起晒弶咁咩...

可以嘅話...就算唔當係一家人...至少都好似…Roommate...

係咯～Roommate～

洗乾淨晒所有碟碟刀刀叉叉後，就拎起部手機睇睇...

綽姿吩咐到，明知冇嘢睇都要睇吓嘅～

開始好熟手咁打開SPIRIT App～睇吓接咗乜委託～

我見到...

『公開委託...護送目標到指定地點？』咩係公開委託？

我仲見到...報酬係...平分...

每人平分幾多就睇唔到...不過就顯示咗總數係...

『15,000 Sil？！』嘩！又成萬Sil！

喂...又真係幾好賺喎...咁講法要賺Sil都唔係好難姐～

不過...要護送啲乜先？

會唔會係啲勁危險嘅嘢先？！

出得起成萬Sil...應該唔係護送韓星出入機場咁簡單掛...

我再睇吓委託內容...但裡面除咗話“集合地點：青衣”之外，又係乜柒都睇唔到...

屌...我都話㗎啦...

青衣...咪住先！青衣嘅話...即係要出去...市區？！

嚟咗未來咁多日...除咗屯門同元朗...我都未去過其他地方...更唔好話出市區！

究竟而家出市區要注意啲乜？

我諗最值得注意嘅係...方法...

「要出去嘅話，就只可以靠喺青山公路一帶行駛嘅紅Van～不過真係好唔方便囉～」

冇錯喇...我記得尋日雨姐講過...要由屯門出市區...唯一途徑就係坐紅Van...

喺青山公路一帶行駛嘅...紅Van...

好啦！唔好理咁多住！首先搵咗架紅Van先！

綽姿話要我帶齊裝備...

咁我就換返套緊身衫褲～綁埋把匕首喺大髀～著埋行者長袍～插返把精神刀柄喺腰間～再拎住件黑色毛毛大褸喺手...

係喎！唔知綽姿啲褸...係唔係暖啲㗎呢？

我左望望...右望望...確保冇人見到之下...鬼鬼祟祟咁拎綽姿件褸著上身試試...

『嘩...嘩...好細件...好窄...好難穿上身...』仲要勁小心咁...唔好整爛...

好唔容易先著到上身...

『真係好鬼細件又勁窄咁...明明就係童裝Size啦...』而且都唔覺得暖身啲...不過就...

有陣香味...

呢種香味係...係綽姿身上嘅...少女香味...

著住綽姿件黑色毛毛大褸...

綽姿嘅少女香味...就好似...好似包圍住我咁...

唔好...唔好...

唔好著咁耐！一陣件褸吸咗我身上嘅男人味嘅話...俾綽姿聞到我實仆硬街！

我勁快手又勁小心咁除返綽姿件大褸出嚟！掛返好佢！

好喇好喇！唔好再嘥時間喇！

著返自己件黑色毛毛大褸袋埋銀包鎖匙電話拎埋支Level 2精神液再著埋對鞋就出發！

一落到街，外面嘅氣溫都仲係好凍...不過我個身就勁熱咁...

唔係因為綽姿件褸真係比較暖...只係著過一陣都暖入心...

純粹係因為我好撚緊張！

聞過綽姿嘅少女香味之後...搞到我熱血沸騰咁！

冷靜啲...冷靜啲...

我望望條街...

「快啲啦！快啲啦！遲到喇！」有個學生妹拖住佢個女同學仔喺我面前跑過。

對面又有幾個學生有傾有講咁行緊返學。

就連殘破嘅輕鐵站都企咗幾個學生妹等緊車。

有高中...有初中...就連小學生都有...

真係仲未接受到...

喺而家呢個情況...我係學生都唔會想返學...

可以嘅話直頭想逃離呢個鬼地方！

或者...或者學校係一個安全嘅地方...

或者...或者學校係學生仲未需要投身殘酷社會嘅避難所...

避難所？講笑咩～

如果我係啲死教畜，喺咁嘅情況之下仲唔當班學生妹係後宮咁日日女女女咩？！

我一邊沿住條馬路行...

「做晒功課未吖？」

仲係有幾個學生妹喺身邊經過...

「我仲未溫晒吖...」

個個都仲係又Pure又True咁...

「聽日就放假喇～你話去邊好呢？」

真係好似...我同阿月做學生嘅時候...

喺馬路邊行咗一段路，差唔多都行到去市中心...

『仲未見嘅...』其實我係喺度搵緊架紅Van。

雨姐話會喺青山公路一帶行駛，但會經邊呢？

行咗咁耐都仲未見...係唔係仲要行前啲呢？

我就繼續行...沿住條馬路行...又橫過條馬路繼續行...

唔好話紅Van...就連搵架車睇吓都冇...

而行人路上，連啲學生都越嚟越少...應該差唔多返晒學...

行行吓...成條街又得返我一個...

『唉...究竟要行到去邊㗎？』

行行吓就行到嚟置樂...行到嚟恆順園...

左望望...右望望...望向對面馬路，舖位嘅玻璃窗都爛晒...冇一間營業...

其實呢區嘅人，除咗工廠區之外，仲可以靠乜維生？

真係越諗越唔明...

繼續邊諗邊行，行行吓就又行到嚟三聖。

尋晚同綽姿喺度...大吃大喝...

雖然話食啲嘢都係垃圾，但係個感覺...都真係幾好...

起碼都見到綽姿笑...難得見到冰山美人會笑...

我就企喺路邊望望左又望望右～

『青山公路一帶...』就算係去邊，呢個路口都係必經之路！

我諗企喺度等...應該會等到！

我就企定定，食晒西北風咁等！

“颼！”好凍...

“颼！颼！”好撚凍...

“颼！颼！颼！”好撚柒凍！

『嘩屌！係唔係真係有車㗎？』我唔係話唔信雨姐...但我都差唔多食咗十五分鐘西北風！鬼影都冇隻喎！

我知紅Van啲班次係估佢唔撚到又唔知幾時先開車...

但咁樣企喺路邊食風真係好撚凍呀！

好撚凍呀...好撚柒凍呀...仲要等幾耐㗎仆街？

就喺冷得我騰騰震...鳩都縮埋之時...

“吼！”我聽到...車聲？

“吼！吼～”仲要係...用柴油發動嘅引擎聲？！

“吼～吼！依！”突然！我見到有架紅頂小巴飄住咁入彎！

咦喂！真係有紅Van㗎喎！

仲要係最傳統...最有特色...最有風味嗰隻十六座紅Van！

正呀喂！

我就興高采烈咁對住架紅Van手舞足蹈！

“依！！！！！！”紅Van一個急剎！停喺我面前！

“啪！”同時間打開車門！

『唔該...』我都仲未講完...

「屌你老母咪閪企喺轉角截車得唔撚得㗎？睇柒到你咩？」成個林雪嘅樣嘅紅Van司機就用上林雪口吻問候我老母！

『哦哦...Sor...Sor...』係唔係個個紅Van司機都成個林雪咁㗎呢？

「Sor乜鳩嘢呀？上車啦屌你老母...」林雪繼續屌...

『哦哦...』上咪上囉...

「俾錢呀屌你老母！第一日搭紅Van呀屌你個閪...」林雪向我攤大手板！

『哦哦...我想去青衣...幾錢吖？』一時唔記得姐...又要屌...

「青乜撚嘢衣呀屌你老母！你新嚟㗎？去到深井㗎咋！五百啦！」林雪啲口水飛晒出嚟！

『咩話？五百？！』紅Van出名貴我知！但又使唔使五百咁撚貴呀？！

而家啲通脹真係咁勁咩？！

「係呀屌你老母！聾閪咗呀？講得咁鳩清楚都仲要問？嫌貴呀？係咁㗎喇！呢度得我一架車出到去！你自己有車揸定係你用腳行都係出唔到去㗎喇！咁你仲搭唔鳩搭呀屌你老母？」林雪示意我快啲科水！

『哦哦...』你都講到咁...五百咪五百囉...

我拎五百蚊交到林雪手上...

「屌你老母咁閪多嘢講！阻鳩住晒...坐穩啦仆街！」林雪收完我錢就閂返道門上個波！

『哦哦...唔該...唔該...Sor...嘩呀！！！』架紅Van一開，我成個人都撻咗落張凳度！

“依！吼！吼～”架紅Van就喺青山公路衝住去！

成車都坐滿晒人！

有幾個男人...又有幾個女仔...

個個都係木口木面咁...

成五百蚊一程...真係好撚柒貴...

仲要只係去到深井！

深井...前日帶宋伯伯...去到深井交俾...解放軍...

究竟點解...唔止雨姐...就連林雪自己都話...只有佢呢架紅Van出到市區呢？