《香港傭兵》: [Day 24－三合成立] PART 02
當我再次有意識之時...再次睜開眼之時...
『執...執行...天...』天...天花板？
呢度係...我屋企...唔係...
喺我都仲未回過神之時...就有一個...身影飛撲埋嚟！
「飛揚哥哥～」係...羅羅把聲...羅羅飛撲埋我身上...攬實瞓喺床上嘅我...
唔係...呢度...已經唔係我屋企...係日倫嘅地方...
『我...我...』我攬住羅羅...瞓喺床上...
日倫就企喺床邊，翹住對手：「你終於都醒喇？」
『嗯...』我點點頭...望住日倫，『我...我又瞓咗...瞓咗幾耐？』
我好似...好似又...腦海空白一片咁...
日倫打量住喺床上嘅我同羅羅：「由你尋日進入深層睡眠到而家...已經過咗十五個鐘...而家已經係十點幾...」
『我...我...』我又深層睡眠咗十幾個鐘...
羅羅壓喺我身上，甜絲絲打量住我：「你真係好瞓得呢～」
『係咯...點解...點解我會咁瞓得...』仲要...仲要好似...唔記得咗啲乜...
我攬住羅羅...諗一諗...乜都諗唔到咁諗一諗...然後又望一望日倫...又望一望四周...
『係呢...綽姿呢？』唔見...唔見綽姿嘅？
日倫摸摸頭：「綽姿佢一大早就話有私人事要處理...出咗去...到而家都仲未返～」
『係...吖...』私人事？係...茵婷？
羅羅立即谷起塊面豬登，拍拍我胸口：「一醒咗就掛住嗰個梁綽姿！我喺正你面前都唔理人！」
『邊...邊係呢...』我邊有唔理你姐...我而家仲攬住你㗎喎...
羅羅越谷...塊面越紅...紅到成個紅蘋果咁：「仲話唔係？唔係嘅話就攬得我實啲先啦...」
『哦...哦...好好...』我就攬得羅羅實啲...攬到實一實...攬實喺懷裡...
日倫就冇我哋咁好氣，拎部電話出嚟撳撳...睇睇...
而我...總係覺得咁樣攬實羅羅瞓喺床上...好似唔係咁好...
始終有日倫喺度㗎嘛...好老尷㗎嘛...
之但係...我又唔好意思推開羅羅...
唉...是旦啦...
羅羅就總係甜絲絲咁～好似個小妹妹瞓喺哥哥嘅懷抱之中咁～
至於我...都仲係痴痴呆呆咁...好似連接唔到...呢個世界...
過咗一陣...又過咗一陣...都過咗好一陣子...
然後...
“叮噹”門鐘聲...
「返嚟喇...」日倫就行出房...
我同羅羅都坐返起身...但羅羅仲係攬實我...甜絲絲咁嘅樣...
然後...等到日倫同綽姿都行入嚟...
『返嚟喇？去咗搵茵婷？』我帶住微笑問問綽姿...
「多事。」綽姿回個冷眼俾我。
關心姐...又多事...
綽姿坐喺凳上：「我同佢講咗...而家出面好亂...都係留返喺屋企。」
『嗯...都啱嘅...佢唔會八八卦卦偷偷走出去㗎嘛？』我總係有啲唔放心...
綽姿冷眼打量住我：「人哋先冇你咁八卦...千叮萬囑過...佢應承我唔會出去。」
『嗯...』乜我好八卦咩...
日倫挨近窗台：「好喇...處理晒私人事...係時候討論返現時局勢。」
係時候討論...現時局勢...
日倫打量住綽姿：「你啱啱出過去，出面嘅情況點？」
綽姿擰擰頭：「冇乜點...冷冷清清。」
冷冷清清...
係喎...尋日...尋日解決晒西貢獻命...一個不留...而家出面嘅情況...淨係冷冷清清？
「係吖...」日倫諗一諗，「接住落嚟...呢邊會點呢？由邊個接手...正如飛揚所講...西貢獻命做咗Condom...」
『我...』我有咁講過咩？幾時吖？
點解又好似...又有啲嘢唔記得咗咁嘅...
日倫點點頭：「不過其實都唔意外...中共一貫嘅作風～所有用嚟做唔見得光嘅嘢嘅人...最終都會用完即棄～仲要乾乾淨淨～冇把柄～冇機會俾佢哋作反～之前嘅警隊都係咁～」
之前嘅警隊？係幾耐之前？
呢啲嘢都唔重要...重要嘅係...
『我哋又會唔會變成棄卒？』始終...我哋都係用嚟做唔見得光嘅嘢...
「唔會～」日倫帶住微笑擰擰頭，「我哋係SPIRIT...警察...解放軍...國安局...甚至中共都好，就算真係反目，對我哋都唔會有咩影響。」
『唔係...』我擰擰頭，『我唔係咁嘅意思...我係指...SPIRIT...』
日倫...綽姿...仲有羅羅都眼定定咁望實我...
『我係指SPIRIT...會唔會捨棄我哋...』我哋...我哋一班...行者...
日倫皺一皺眉：「點解你會有呢個諗法？」
羅羅都翹實我隻手臂，用個小饅頭壓一壓埋嚟：「係咯係咯～點解飛揚哥哥會咁諗嘅？」
『我...我都唔知...我總係有...有呢種預感...總係覺得...不論係修行者...隨行者...執行者...甚至係先行者...都會被SPIRIT所棄...』冇錯...我總係有呢種感覺...
日倫同羅羅都皺住眉...好似唔多認同我嘅講法...
至於綽姿...都仲係保持住木無表情...
係唔係我諗多咗呢？
係唔係我嘅錯覺呢？
我都唔知...
我嘅第六感...一向都唔可以話準...但今次...今次真係有啲唔同...
喺我內心深處...總係有一種感覺...不安嘅感覺...
大家都靜咗一段時間...然後...
羅羅咬住下唇：「先唔好理我哋會唔會變成棄卒...而家嘅情況...對我哋都好不利呢...」
而家嘅情況...對我哋好不利？
綽姿繼續木無表情...
我同日倫就等羅羅繼續講落去...
「唔...」羅羅咬住下唇...諗一諗...再諗一諗，「而家...而家我哋面對緊嘅...首先係同解放軍反咗面...」
我同日倫都點點頭...
係吖...呢點尋日都已經可以確定...
「唔...」羅羅繼續諗一諗，「解放軍嘅目的應該就係要喺屯門同我哋決戰...而國安局係唔係有心刻意喺呢個時候清算西貢獻命...為咗幫解放軍騰出屯門呢個戰場出嚟又好...想趁住呢個好時機將自己啲污糟嘢洗乾洗淨都唔重要...最重要嘅都係...事實就係騰出咗屯門呢個戰場出嚟...」
我同日倫再點點頭...
「唔...」羅羅又再諗一諗，「而最大問題係...屯門呢個地方...我哋而家...應該集結咗唔少行者喺呢度...但如果話真係要同解放軍決戰...我哋背後仲有天門嘅逆行者...咁即係話...可以話係腹背受敵...」
冇錯...羅羅嘅分析好啱...其實尋日都已經有諗過...
只係...而家連西貢獻命都清算埋...真係乾乾淨淨...
之不過...
『我哋真係要同解放軍決一死戰咩？』一講到呢點...我就覺得奇怪...
日倫都點一點頭：「冇錯...我哋真係冇必要同解放軍決一死戰...」
羅羅都點點頭：「我哋係傭兵...唔屬於任何國藉...派別...」
日倫接住講：「喺恐怖獨攬大權之前...」
我同綽姿都打量住日倫...
恐怖...現時SPIRIT唯一預行者...唯一決策人...
日倫皺住眉頭...好認真咁講：「大家就算唔去正視...都必定察覺到...我哋一直所執行嘅委託...都係有方向...」
羅羅同綽姿都點點頭...
日倫繼續講：「雖然...連我都唔算可以話係經歷過內鬥時期...之但係...我哋所認知嘅方向...同我哋所執行嘅委託有好大出入...呢樣所有行者都一定察覺到...特別係呢區...依重喺中共...縱使因為中共資金強大...都不至於偏重得咁過份...而我都有調查過...一切都係由恐怖獨攬大權後開始改變...」
羅羅接住講：「之前...我哋就一直主要幫中共政權...我仲喺度諗...會唔會係因為天門...逆行者...我哋就同中共聯手抗衡嘅理由...但而家...我哋已經同解放軍反咗面...又算唔算係已經同中共割蓆？」
日倫擰擰頭：「我都唔知...始終...一切都只係我哋自己推斷...猜測...」
『話唔定...所有都係權宜之計...話唔定...仲有其他目的...』話唔定...話唔定...
日倫同羅羅都打量住我...
『我唔知...我只係...有一種感覺...總係覺得...解放軍又好...國安局又好...甚至整個支共都好...都只不過係一小環節...唔可以話唔重要...係必要...但唔係最重要...』重要...有更重要...
日倫同羅羅繼續打量住我...好似等緊我繼續發表偉論...
『試問一個單手掌控整個強大嘅地下組織嘅獨裁者...政權...國家...又算係啲乜嘢...』
日倫同羅羅都諗一諗...
『為錢...為錢...委託同Sil其實都係一種操控手段...』
日倫同羅羅互相對望一眼...
『操控我哋...我哋SPIRIT嘅行者...我哋看似係為賺更多嘅Sil而行事...但實際上係為SPIRIT做事...』
日倫同羅羅一直互相對望...諗一諗...
『所謂為SPIRIT做事...其實都係為上面做事...隨行者聽命於跟隨嘅執行者...執行者同時亦要接受先行者所指派嘅強迫委託...而先行者呢？』
日倫同羅羅都再次打量住我...
『SPIRIT...一個階級觀念好重嘅組織...而喺呢個階級之中...身處最高處嘅係邊個？係恐怖...就只有恐怖一人...』
日倫同羅羅都諗一諗...點一點頭...
『恐怖...究竟恐怖想點？假如所有所有所有方向都係由恐怖定出嚟...一切一切一切都係由恐怖一個決策...咁究竟...恐怖嘅最終目的...會係咩呢？』我眼定定咁望實...久久都冇出過一粒聲嘅綽姿...
日倫同羅羅都跟住我嘅視線...望向仲係木無表情嘅綽姿...
綽姿回一回神...望望日倫同羅羅...再冷眼打量住我：「你哋望住我做乜？我唔會比你哋知得多。」
『冇～我見你咁耐都冇出過聲...咪睇吓你有冇乜嘢意見囉～』其實都係想Brainstorm吓姐～冇乜意思嘅～
綽姿繼續冷眼打量住我：「我會有乜意見...我又唔係調查型行者。」
『咁都可以估吓㗎姐～我都係估估吓咋嘛～』唔知點解...我總係想聽聽綽姿有乜面解...
我總係覺得...喺綽姿身上...總會有發現...
總係會發現到一啲...我哋發現唔到嘅關鍵...
「冇...」綽姿擰擰頭，「我都冇見過恐怖...都冇人見過恐怖...我諗...除咗一尾同片翼。」
一尾...同片翼...
『你哋估...一尾同片翼會唔會喺呢度...我指喺屯門...』講起一尾同片翼...
「唔知呢...」日倫都擰擰頭，「尋晚都唔見佢哋...」
「係咯係咯...」羅羅都點點頭，「尋晚交收嘅時候...都唔見佢哋兩個～」
『係...吖...』原來真係冇出現...
我仲諗住...一尾同片翼...兩個大人物...會喺交收嘅時候出現...