我係大學嘅私家偵探: 27

我以昨天放鴿子為由，約Jovy到西餐廳吃飯。

哈，方便的藉口。

至於原因？這樣還要問？

「咦？到喇？」我提早到達，抬頭一看，卻頓時瞪大雙眼。

她一改風格，穿上粉色蕾絲連身裙，襯上一條簡約的銀色手鍊，既清純又優雅。





「嗨。」她點頭坐下，掛著微笑，與初見面時可謂大相徑庭。

女孩就是這樣，換上一套衣裝，氣質完全改變。

「你要嘅嘢。」她遞來信封，裡面是報酬和攝錄器。

「哈，Thanks。」果然守信用。

說來，那個案子最後怎了？





「係喔，Hall嗰邊嘅嘢搞掂左？」我問。

「嗯。Morris踢左出去。至於阿琪，我哋話兩句就算，畢竟佢喺Hall嘅Contribution太多。」Jovy回答。

原來如此。

其實問也沒意義，已經與我無關了。

「咁你呢？」我又問。





「我？」Jovy一時錯愕，不知我指什麼。

「餐牌呀。呢餐賠罪，我請。」我指著桌子上的餐牌，露出意味深長的笑容。

「咁我唔客氣喇，我驚食窮你。」她笑說。

「哈，有啲難度。」我炫耀道。

我想起數天前的事情，到Jovy家裡一起監視Cici，還發現她的秘密。

每個人也是經歷過傷害，才會成熟和長大。

其實有這些回憶也許是好事，催化我們進步，時刻保持清醒。

不然，我怎會有如此成就？





而我感覺，對方和我是同一類人。

剛好，我也有個不太好的家人。

「想要咩呀？」我主動問她。

「法國田螺你啱唔啱？」她反問。

「哈，我自己都未試過，不過我信你。」我回答：「平時我好難信人。」

要我相信別人，的確有點難度。

「我一向都識揀。」她放下餐牌，與我對視：「你今日有口福喇。」





主菜很快送上，我們邊吃邊聊，享受寧靜的氣氛，窗外的景色。

「嗯。的確唔錯。」眼前的田螺果然不錯，肉質鮮嫩，口感媲美鮑魚，而蒜頭和香草的味道瀰漫口中，教人心頭一震：「我都係第一次食。」

我實在不得不讚歎Jovy的眼光。香港來說，法式田螺算是冷門美食了。

「其實有個問題，我一直想問你。」Jovy轉過話題：「你真名係咩？」

「算係商業秘密喔。」我喝一口水，裝作神秘，心裡卻沾沾自喜。

「係咪咁先？」Jovy靠後，像是不滿，像是矯情。

二人的關係，二人的距離，彷彿變了。

的確微妙。





「記住喇，我叫Waylon，利譽東。」說來，許久沒有真正介紹自己了，畢竟沒很多朋友：「讀BBA，Year 3。」

氣氛霎那間變得奇異，明明認識一會了，現在才報上名來。

不過，名字真的重要？

「放心，我一定記住。」Jovy雙手托著下巴，凝望著我。

「你呢啲讀Law嘅，應該幾好記性啦。」取笑的一句。

「嘿，所以你以後唔好得罪我，我會記住你，告死你。」Jovy回答，裝作奸詐，卻顯得可愛。

柔弱的光線下，二人不自覺低頭，微笑。





這種感覺，的確不錯。

「話說你呢啲私家偵探，手段都幾狠呀，又玩賄賂，又玩攝錄器。」Jovy語氣一變，斜視著我。

「你都唔錯呀，滴蠟都玩。」我回敬對方。

「好，我服。」對方裝出一副無奈的姿態：「不過，究竟做偵探係咪真係咁好玩？」

「係幾刺激架。點？想跟我學嘢？」我反問。

「唔啦，做律師啱啲。」Jovy回答：「可以任擺龍門，可以玩下法律罅咁。」

「咁我哋咪同一類人囉。」我說：「扮咩好人。」

「係對你先誠實少少。」Jovy回應：「平時我好少咁誠實。」

「嗯？就好似你屋企嘅事咁？」我試探對方：「都幾正常嘅，呢啲嘢好難誠實。」

我才不怕得罪，畢竟已熟成這樣。

Jovy愕然半秒，然後恢復平靜，甚至露出欣賞的目光：「果然係偵探，夠聰明，夠大膽。」

「原來你睇少我？」我彈了彈手指，再將蛋糕放入口中。

「斃喇，以後冇秘密。」Jovy苦笑。

「放心，我好口密。」我說：「應該咁講，剩係你嘅嘢，先會口密。」

「咁我咪好特別？」Jovy靠頭過來，她的眼中只有我一個。

「係特別架。」我也要讓她看清，我瞳孔裡的樣貌。

就算是我這種資本主義家，都有弱點。

不過，我心甘情願。

「話說你請我食飯，我有啲唔好意思喔。」Jovy邀請我：「一係我請返你睇戲，咁就當打和。」

「咁嘅理由都得？」我苦笑。

「買左飛喇，冇得拒絕。」Jovy簡直硬來。

哈，不過也沒所謂吧，反正有空。

完