「短篇」「小小傻瓜，大大幸福」: 舊日
時間又慢慢推移，聽日就係學校校慶既日子，亦即係話我公司亦要開工拍野。
估唔到咁大個人仲會因為學校活動而緊張，唉。
Cherry：「點呀咁夜仲唔訓坐係梳化度發呆做乜呀~
」我回頭望向聲音傳黎既方向，見到佢捧住一杯紅茶，慢慢就走埋黎坐我身邊為我遞上茶。
我接過佢為我準備既茶之後就騰出一隻手攬住佢，兩夫妻坐係梳化上面。
我：「無啊，只係諗緊聽日拍片D野係咪準備好哂啫，唔想有乜甩漏。」
Cherry：「少可喎，你居然會對單job咁認真？我記得你幾乎每次都係交俾其他人做架~」
我：「鬼叫單job係自己接返黎，個客又係自己母校咩，如果出黎效果唔好，第時邊有臉返學校。
」Cherry：「哈哈，你識咁諗就好啦，唔~~反正聽日星期六，不如我都一齊去學校囉？
」我：「吓老闆娘去監場呀？你咁搞法D同事會好大壓力架喎…
」Cherry：「咩啫，你唔記得左我除左係老闆娘之外都係學校既舊生黎架咩？參加自己母校校慶都唔得咩？
」我：「係係~老婆大人你想點就點啦~不過你記住一定要小心D呀，聽日應該會好多人，可能會有唔少碰撞架。
」Cherry：「得啦~你當我三歲細佬咩，啊係呀lulu…我諗住呢…黎緊唔會返公司啦。
」我：「哦？做厭左啦？」
Cherry：「唔係啦…只係覺得而家每日返公司都好攰啫…唔知係咪因為有左既關係…我今日同總編傾過，佢都話留係屋企做野都無問題。」
我：「咁就無問題啦~好喇，聽日仲要早起身架，去訓啦，唔多D休息聽日就唔靚架啦。
」講完我就起身拖住佢，送呢位美麗動人既孕婦入房休息。
而自己則留係客廳飲埋杯紅茶，諗緊聽日既事。
唔知幾時，我居然就係梳化上訓著左，醒個陣仲發現身上多左張被。
迷迷糊糊咁望下四周，就見美星坐係餐檯笑笑口咁望住我。
我稍稍咁提起身上既被，向美星打左個眼色，示意問佢係咪佢將張被搭係我身上。
佢笑住咁搖頭，仲用手指指左洗手間既方向，話我知係Cherry。
我都估到架啦，呢條友邊有咁好心吖。
我拎開張被，企起身伸左個懶腰之後就走埋餐檯，見到檯面上有幾份早餐。
我：「喂家姐…有無我份？肚餓又唔想自己煮…
」美星：「你老婆咁錫你梗係有煮埋你個份啦，呢份咪你囉~佢仲叫我唔好嘈醒你俾你訓多陣咁話喎。」
我：「吓！你俾佢入廚房煮野！？
」美星：「屌你on9仔冷靜D啦，佢大肚啫又唔係變做BB，煮野有乜問題呀。
」佢講得又有D道理，我尷尬咁坐低係櫈上，隨手拎起杯橙汁飲落肚。
之後我聽到廁所門打開既聲音同腳步聲，心諗一定係Cherry出黎啦。
但當我見到佢，我忍唔住噴左係口入面既橙汁出黎。
因為我簡直唔敢相信眼前見到既一切。
佢居然著住套校服出黎！！
我見到佢咁急忙抹一抹個嘴，衝埋去問佢搞乜野著成咁。
Cherry：「唔？有咩問題呀？返學校梗係應該著校服架啦？吖又估唔到幾年前既校服仲岩著，我keep得真係好~~
」佢完全唔理我，自己係度自己讚自己，仲係我面前自轉幾圈…
我：「唔係呢…你咁著肯定會惹人目光架喎，人地分分鐘當你…」
Cherry：「你唔想自己老婆比人望呀？
係既話你講一句！我即刻入房換過件衫！
」我都未講完，佢就夾硬加把嘴打斷我。
唉真係無佢咁好氣…
我：「算啦你開心就得啦，難得一次，都無乜所謂啦，我約左同事九點學校等架，你洗唔洗化妝？要就把握時間啦。
」Cherry：「啊係wor！
你等陣！我好快得！」佢講完就衝左入房，仲差D撞埋房門度，真係吖，睇路吖嘛。
不過見佢著住校服個樣…真係同以前一模一樣，有一刻我仲以為自己穿越左返去添哈哈。
算啦佢開心就得啦係咪先？
啊我都要快D食埋份早餐再換…
美星：「魯路修！！！
」哇你做乜野搞成咁架家姐！！
佢成身都係橙汁，你鐘意飲橙汁都唔係…咦咪住先…唔通…
呀屌原來我頭先噴D橙汁噴中左佢！！死硬喇今次！！
之後既十分鐘我都要承受美星佢既體術，如果唔係呢廿幾年訓練有素，真係有機會一命嗚呼。
Cherry根本唔知發生咩事，因為佢仲係房入面化緊妝，化出妝出黎個陣我已經受完刑…
但係佢化完妝出黎個樣同之前都無乜分別既…到底化左D乜呀…
美星用眼神警告我叫我唔好亂講野，搞到我只能冤冤咁忍住痛同開心到不得了既Cherry一齊出門口，真係有住天淵之別。
坐左一陣美星既車之後，我地就黎到學校，係我想打開車門個陣，Cherry卻講左句野令我停下。
Cherry：「同開放日個陣真係好似呢。
」佢唔係望住我，而係望住學校既外牆講。啊係喎…佢咁講一講又真係有D似…
仲記得當年開放日我同佢係負責空中花園，個日仲發生左好多好多事，直頭多到可以拍套戲。
但係亦正因為咁，個日既記憶係我腦入面都比較深刻，我仲記得大家捉錯用神，鼓勵肥豬…哈哈都係唔好再講落去比較好。
唔通佢今日著校服返黎，係想…
「knock knock。」
就係我仲沉浸係沉思既時候，車外卻有人敲我地既車窗，原來係我個班同事。
望一望手錶，岩岩好九點半，真係夠哂準時。
Cherry比我更快打開車門跳落車，興奮咁同我既同事打招呼，就真係好似一個活潑既中學生。
大家見到佢身上既校服都呆左係度，之後就係望住仲係車入面既我。
我表示無奈之後都緩緩落車，同大家打聲招待就開始一邊討論今日既流程，一邊帶領大家走入學校。
學校好快就有職員出黎接待我地，當中仲包括自己當年既IT老師，估唔到咁多年後佢仲係度教書。
正常黎講，校慶係係校長致詞之後先開始，然而我地既工作就唔同，係佢開始致詞之前就已經開始了。
我地一路拍一路拍，拍低各個精彩時刻拍左半日，自己都不知不覺咁被呢片觀樂既氣氛感染到，臉上既笑容久久都不能退去。
啊…呢D就係青春啊…
同我當年既開放日一樣啊…死喇我都好想去玩下添，拉下划艇機，撈下金魚，諗下都開心！
咦咪住先…Cherry呢？佢去左邊呀？
發現老婆忽然唔見左蹤影，我開始荒起來，離開左自己既同事，周圍搵返自己既老婆。
好衰唔衰，呢個時間既學校偏偏係最多人，D家長帶住自己D仔女形成一條又一條既人鏈阻住我既去路。
自己身為校友又即將成為人父都唔好意思咒罵人地，只好一次又一次咁避開佢地，仲差D被迫左出學校。
唉，真係麻煩。
就係我繼續搵佢既過程中，我又比人迫左埋一邊角落既一個小攤檔，仲唔小心撞到一個女學生。
我下意識就即刻同呢位小師妹道歉，因為呢個世界，一個唔小心就會比人話非禮架嘛，都係即刻道歉好。
點知呢位「小師妹」緩緩轉過身望住我，向我擺出一個殺死人既笑容。
Cherry：「唔緊要呀，老~公~
」佢呢下轉身，呢個裝束，呢個笑容，又令我憶起舊日了。
唉，你真係吖…
我都唔理身邊有幾多人，有幾多目光，直接大庭廣眾下同佢黎一個深情之吻。
乜野job，唔撚理啦屌！