消失的五年: 《二十八》

上面寫住一個地址 - 佐敦嘉賓商業大廈715室


"嘉賓？唔通 …… 鬍鬚佬有計？" 我心諗


事不宜遲，拍拍身上啲麈，望望前面架車嘅側鏡，見塊面乜傷，就馬上去行落地鐵站！


咪住！志豪無辜慘死 ……，今次一定要小心行事，Michael 仲喺佢手，如果再有差池，條仆街又唔知會開邊範！






攞番志豪部手機出嚟睇，螢光幕已經爛晒，乜都睇唔到，關機，攞出 Sim Card，插入，一開，㩒電話簿，啊 ~ 果然，做得保險一定有好多舊同學嘅電話，一搵之下，竟然比我搵到范一斌同鍾可晴嘅電話！


鍾可情 ……？既然有佢電話，就將計就計引佢出嚟，如果佢真係出嚟，就問清楚佢係咪同件事有關，萬一佢唔出，起碼可以做個假象，等我可以上嘉賓大廈睇下咩事，一舉兩得！


好，時間無多，於是我就用志豪嘅電話號碼打比佢！






「喂，係咪可晴？」


「志豪？咁耐無見，搵我咩事？」


「咳咳，無，有啲好緊要嘅嘢想搵你當面傾，咳咳，唔知你依家方唔方便？」我扮咳咁講






「聽你把聲好似病得好嚴重咁喎？」可晴就話


「無乜病，少少傷風咳啫！」


「哦！依家呀？唔 …… 都可以嘅，邊度吖？」可晴考慮咗陣，就話


「約你 2230，佐敦地鐵站 A 出口上面嘅嘉賓大廈等，OK？」我望望電話，時間係 2144


「神神秘秘咁，好啦，一陣見！」






收咗線，我繼續行落地鐵站，預早少少去到佐敦，今次唔可以再有任何意外！


時間 : 22:25


買咗個包，企响對面金鋒大廈，靜靜咁等佢嘅出現，揸實部電話，心情有啲緊張，再過多一陣，就可以知道成件事究竟係咩一回事！


咇，咇 ……


電話終於響起，望向對面馬路，係佢喇，著住黑衫嘅鍾可晴，咁多年無見，一眼就可以認出，佢無乜點變！






我慢慢行過馬路，一路行，個心噗噗、噗噗咁跳，鍾可晴就响對面，好快我就可以知道邊個係嗰條仆街老朋友！


Michael，阿爸嚟緊㗎喇，你等我啊！


一切一切都喺我預計之內，但係 …… 一切都只係我自己認為 ……