[專員≠Hugo] 我係溫文樂，奉命調查一宗垃圾站藏屍案: 三十四

我諗番起，原來當日Candy同我提過， 
佢上司係我一個故人。 
而家我終於知道，個個故人原來就係呀健。 
我唔知呀健而家提起Candy係咩意思， 
亦都唔知佢地有幾熟絡。 
不過，點解呢個時候呀健會係到出現？ 
點解佢會主動問我Candy既事？ 

"係喎，我記得喇。 
做咩無啦啦提起佢？"我試探性咁問。 





"冇，睇下你過成點姐... 
我知你都好難過架喇..."呀健安慰我。 

"放心接受左啦，不過我一定會幫佢查出兇手。"我拍拍佢膊頭以示感激。 

"單野係你跟？有冇咩進展呀？"呀健似乎估唔到我係負責調查既人員。 
佢眼神閃過左一絲驚訝。 

"唔好意思，好多野我都唔講得。 




不過如果你任何證據幫到手， 
我唔介意同你分享下。"我反客為主，直覺話我聽我應該套下佢資料。 

"嗯...明白既。 
我同佢都好多年冇聯絡喇。 
只係個日睇到新聞， 
咁岩今日又撞到你， 
咪問下你囉。"　當然，一如所料，呀健冇講到d乜。 
我分唔出佢係講大話，定係真係乜都唔知。 





"明白。好啦，我要走喇。 
再聯絡啦！"我有少少失望。 

正當我想轉身走既時候，我突然諗起一樣野。 

"咦，等等，唔記得問你， 
你而家住邊呀？"我對住呀健大嗌。 

"都係沙田囉，做咩呀？"佢有少少愕然。 

"冇，得閒搵你飲茶啦！" 

點解呀健會係到出現？ 
點解佢會問起Candy？ 
點解佢冇啦啦係慈雲山出現？ 




點解佢褲上面有d灰燼？ 
真係巧合嗎？ 

"呀燊？樂仔呀。幫我查一個人得唔得？"