《印度 · 尋油 · 台灣妹》: 《四十三》

「乘客廣播，乘客杜愷情小姐，妳未婚夫 Da Vinci 在離境大堂的機場服務中心等妳，如有需要，請與職員聯絡！」 


一連幾次廣播，又中又英，如果 Priscilla 真係响度，佢一定一定聽到，我企响服務中心外面，雙眼不停左右搜尋，希望真係有奇蹟嘅出現！ 


時間一分一秒咁過去，依家已經係廣播後嘅十分鐘，一個又一個不同國籍嘅旅客响我面前經過，但始終仲未見到 Priscilla，我同自己講 


「十分鐘啫，仲有時間嘅，女仔係行得慢啲㗎喇，拉住咁多行李，又要搵，應該差唔多，差唔多！」 






我不停深呼吸，深呼吸，希望自己唔好咁緊張，不自覺緊握住拳頭，張開，手心亦開始出汗，噗噗噗噗嘅心跳聲，令自己周身唔自在，Priscilla 妳究竟响邊？ 


我望一望錶，三點十一分，Priscilla 會唔會唔係搭的士，可能搭巴士或者機場快線，啱啱先到，咁咪聽唔到頭先個廣播，又有可能咁啱行咗出出面坐，又有可能其他原因，咁咪死得！ 


我開始為 Priscilla 搵唔同藉口，但心底裡其實知道見到 Priscilla 嘅機會越嚟越低，响我擔天望地之間，忽然有人拍一拍我膊頭，我即時轉身，原來係嗰位好心嘅職員小姐，佢遞咗杯水比我，就講 






「先生，你唔好咁擔心啦，你好快會見到你嘅未婚妻㗎喇！」 


「希望啦，不過，無論點都好，真係好多謝妳嘅幫忙！」我無厘神氣咁話 


「唔駛客氣，我應該做嘅！」嗰位小姐微微笑咁講 






忽然，電話响起，我嗱嗱臨攞起一睇，係一個無來電顯示嘅電話，一按一聽，電話嘅另一方傳嚟熟悉嘅聲音 


「嗚嗚 …… 是我！」 


「Priscilla …… 妳在那？ 」我緊張到爆咁話


「我 …… 聽到剛才的廣播，為什麼 …… 你還來找我？」Priscilla 一邊飲泣，一邊講 


「Priscilla，因為我太喜歡妳！」我終於向 Priscilla 講出心底話 






「嗚嗚嗚 ……」Priscilla 已經喊到出唔到聲 


「Priscilla，妳知不知道我找了妳多久？我有多麼的想妳？請妳說給我聽，妳在那兒？」 


「嗚嗚嗚 ….…」Priscilla 仍然响度喊 


「Priscilla，妳聽我說，我不相信什麼命運，什麼天意，我只知道，我真的喜歡妳，我想永遠與妳一起，請妳相信我！」 


「嗚嗚嗚 …… 嗚嗚嗚 …… 」Priscilla 越喊越犀利 






忽然，「咇、咇」兩聲，我望望電話，吓，呢個時候你又嚟玩嘢，螢光幕顯示得番 4% 電量，我要盡快叫 Priscilla 講出所在地點先得，如果唔係，斷咗線就仆街㗎喇 ！ 


「Priscilla，請妳不要哭，妳可不可能說給我聽，妳現在在那兒，我來找妳！」我好心急咁問 


「嗚嗚 …… 我 …… 我 …… 現在 ……在 …… 嗚嗚嗚 ……」Priscilla 終於講 


「Priscilla，請不要哭，慢慢說！」我口裡平靜，但心入面就急到暈 


「在 ………………………………………………………………」耳筒嘅另一邊突然靜晒 






「Priscilla，Priscilla，Priscilla …………」我不斷重複咁講 


點解無晒聲㗎？我攞起電話一睇，螢光幕漆黑一片，即係 …… 


「點解咁㗎？點解會咁㗎？你呢部垃圾係咪玩到咁盡！」我望住部電話，不停咁問 


「啊啊啊 ………… 仆你個街！！」由喜轉悲，由希望變成失望，我失控咁將部垃圾電話掉落地 


「嘭」一聲，整部電話完全解體，啲碎片散落滿地，响我前面嗰位職員小姐見到咁嘅情況，都嚇到唔敢出聲。 






最後機會，呢個係最後嘅機會，但係 ..... 依家已經化為烏有，短短幾分鐘，所出現嘅反差實在太大，大到我真係接受唔到！


~ 下一篇係完結篇，記住記住唔好錯過喇！ ~