《無啦啦多左幾個家姐同細妹Season 3》: 意外
理想很美好，現實卻殘酷。
Present完之後，我地五個坐係M記，大家都唔敢講野。
或者應該話，大家都唔想提起頭先既事。
本來以為自己已經準備得夠好夠充足，綵排預演都試過四五次，但始終實戰真係另一回事，意外總會發生。
就算已經預計到自己會緊張，但當去到真係上場既時候，個份緊張感完全超出想像。
手震，口震，就連腳都震埋一份，係大學個幾年都未試過緊張到咁。
仲要唔只我一個係咁，我地全部人都係咁，大家既緊張導致出現左唔少唔應該出現既失誤。
例如講錯野，Skip左頁Powerpoint，甚至係突然deadair都有出現。
到最後，我地換黎既只有一句「返去等消息」，挫敗感十分重。
而家回想返，雖然話坐係中間既係笑容親切既大家姐，但我地仲要面對個班惡形惡相既西裝友。
佢地每個人既表情都極度不屑，翻揭我地計劃書既動作更加好似話緊俾我地知我地衰硬咁。
唔係話想搵藉口，但係我覺得第一次面對一班職場上既大人，呢D緊張真係無可避免。
唉算啦，衰左的話我咪話「問屋企人借左筆錢」，自己拎錢出黎夾多份囉。
起碼今次叫做攞左個經驗吖，下次如果再有咁樣既機會的話都會識應付。
好，對白已經諗好喇。
我決定成為打破沉默既個位，係各位朋友都低下頭既時候，第一個抬起頭。
我：「唔好咁啦手足們，以第一次黎講我地算係做得唔錯架喇，雖然係有D失誤，但都算中等喇，你地話係咪？」
聽到我拋出橄㰖枝，幾位拍檔都輕輕抬頭望一望我，神情普遍都係帶有淡淡既哀傷。
特別係阿Ray同阿輝，呢兩個特別唔習慣挫敗既人。
平時習慣抱怨既阿輝今次終於都無聲出，因為大家都知道今次大家都有唔同既失誤。
我：「好啦，再垂頭喪氣都無補於事，聽日開始我地再諗過點樣繼續創業大計啦好嗎？」
真係無諗過呢D安慰人既說話會由我講出黎，平時都係人地安慰我多。
阿嵐：「嗯，阿明講得岩，好好訓一覺之後一定可以諗得出好既辦法既，呵..開始有D眼訓添…不如今日去到呢度先？」
聽到阿嵐又想訓覺，大家都無奈咁唉左一聲，但此刻大家臉上終於都重現笑容。
唉，希望在明天，一定有其他辦法既。
「咦，真係你地幾個吖？點解會係度既？」
呢把咁令人討厭既聲，唔通係…？
我地幾個幾乎同時擰轉頭，望向聲音傳黎既方向。
果然，呢把聲既主人係佢。
大學時期勁乞我地憎既一個同學，Stanley。
當佢確認到真係我地既時候，佢就開始慢慢行埋黎，臉上仲掛住個副招牌既笑容。
真係睇見就憎，好想一拳打落去。
以前係大學佢成日都用一種高人一等既姿態，衣著浮誇之餘舉止又多餘，上堂遲到仲要扮哂主角咁。最令人頂唔順既係佢懶係social咁周圍撩人，特別係女。但聽浩銘講其實好多女都唔鐘意佢，認真諷刺。
Stanley：「畢業以來第一次見喎幾位，點呀最近過成點呀？搵到工未呀？未搵到其實都好既，嘩我返左工之後忙到甩碌，連少少私人時間都無呀陰公。」
嗱你睇下，條友仲係咁既性格，表面上好似好nice，其實就係借故炫耀自己。
浩銘：「係啊？邊間公司咁無良呀講個名黎聽下，等我唔好去幫趁，同你出返口氣都好。」
Stanley：「咪天晨集團囉，不過我諗大家都無乜可能會幫趁，我公司主要係做房地產，呀可以唔好去我地D商場囉。」
聽到「天晨集團」呢四個字我地幾個都即刻打左個突，因為呢個集團正正就係我地頭先去既地方。
亦即係話，佢而家係我屋企公司做野…
我：「咁你做咩post?」
佢似乎對我呢個問題有D驚訝，因為我見到佢表情出現左變化，笑容入面既自信已經唔見左。
Stanley：「eh…HR囉，人工幾好架。呀唔講住啦，我趕住返去做野，仲有好多野等緊我去做，下次見啦拜拜。」
佢講完就急急腳走左，擺明就心虛啦，職位唔慌高得去邊，仲著到成個department head咁，搏乜。
Stanley走左之後我地再傾多左一陣，內容主要都係之後應該點算，再加上笑下Stanley咁。
然後，就没有然後了。
身體拖住失敗，失落同失望，一步一步咁走入屋企。
唉，佢地為我做左咁多野黎鼓勵我，但我居然表現得咁差，而家都唔知點面對佢地好。
行入門口第一眼見到既唔係任何人，而係個隻貓，佢就咁攤左係度同我四目交投。
我嘆左一口氣，決定走上去戲弄左佢一番。
軟綿綿既毛摸落去真係舒服，心情都即刻好返D。
雖然佢一臉厭惡，但係壓倒性既力量差距之下，佢根本無得反抗只能任我魚肉。
Ellen：「喂，摸夠我隻貓未呀衰人。」
突然出現既Ellen嚇左我一跳，下意識即刻縮手，隻貓亦乘機逃離，走到去旁邊既Ellie度。
我：「啊，Sorry囉你隻貓太可愛忍唔住同佢玩左陣。」
Ellen：「我明，鬼叫佢似我呢個主人咩，點呀今日個present，順唔順利。」
唉，始終話題都係會返黎呢度，算啦坦白認衰啦…
我：「今日…」
大家姐：「阿明！！！」
我只係講左「今日」兩個字，大家姐就突然從後出現，好興奮咁一下跳上我背脊，夾到我實一實。
多得佢既熱情引左全屋人黎，大家都黎睇發生乜事。
Sarah：「大家姐！快D落返黎啦！會整親阿明架！話時話你今日咁早返黎既？」
大家姐：「唔？哦因為我想快D講個好消息比阿明知，所以咪早D返黎囉~」
好消息？不過你介唔介意落返黎先？我條腰就快頂唔住啦大家姐…
唔知大家姐係咪可以聽到我既心聲，好快就落返地，仲甩兩甩咁除左對高踭鞋。
大家都望到佢實一實，等緊佢到底會公佈D乜好消息，當中都包括我。
大家姐：「咳咳，陳先生，恭喜您成功進入青年創業支援基金既第二輪審核，希望您繼續努力。」
咩話？我有無聽錯…？我入左第二輪？
我：「大家姐，你唔通…」
大家姐：「哎，唔好咁諗我，我公開得呢個計劃就會公平審核，唔會偏幫你既~雖然你係我既好細佬~~~」
「緊張呢家野，我地班評審一早就預左架啦，最主要都係睇返你地既計劃書，你份計劃書做得好，所以咪得左囉~」
嘩聽到大家姐咁講，肯定我地既努力，D眼淚差D就標左出黎，好彩忍得住。
不過…今日都真係幾多野令人意外…