《無啦啦多左幾個家姐同細妹Season 3》: 因緣
晨：「喂冷靜D先啦好嗎，你咁激動咪只會正中佢下懷，你睇下佢個樣幾得戚。」
晨哥既一下巴頭令我過熱既頭腦稍稍降溫，雖然唔，甘心，但我亦唯有放手。
係放手之後我先發現自己頭先既力度係有幾過份，日既頸都已經有一個印係度，但佢仍然面不改容，用一個我開始覺得詭異既笑容望住我。
日：「哈哈，真不愧係藍洛晨，咁快就搵到上門，果然唔可以睇小你。」
晨：「嘛，呢D無謂既說話就唔好講啦，對付你呢種癲佬我都叫有D經驗，雖然手段大家未必鐘意，但好有用架。」
日：「哼，你又可以對我做D乜？殺左我？咁你只會得唔到你想要…」
日既說話都未講完，晨哥就已經用膠帶封住左佢個口，再用幾條黑布綁住佢對眼。
晨：「放心我唔會殺你，對付你呢種人最好就係令你永遠都再睇唔到任何光又講唔到野，好好享受下永遠既可怕啦人渣。」
一聽到永遠兩個字佢就即刻激動，想講野又想爭扎但無果，最後只好放棄。
晨：「真乖，好喇咁呢邊呢位小姐你又點呢？由頭先開始就唔出聲，可唔可以話我知你想點呢？」
月：「既然而家都搞成咁，想點處置我隨便你地。」
晨：「哦~你比起你既朋友更加有意思喎，話時話你地係咩關係？呢D野可以話我知啦掛？」
晨哥一副滿不在乎既姿態令我開始有D著急，但有好幾次打算主動開口問Ashley野都比晨哥用凌厲既眼神制止。
Ashley，即係月都注意到我地之間既交流，笑左一下。
我：「有乜好笑？」
月：「果然你只可以靠佢先成到事，每次都係咁，乜你唔會覺得唔好意思架咩。」
晨：「佢可以令我肯幫佢係佢本事，你估我開善堂係人都幫架？而且佢之前都已經蠃過你一次，仲要係堂堂正正，所以佢邊洗唔好意思。」
「唔好扯開話題啦，話我知你同佢有乜關係啦。」
佢見自己既挑釁無效之後就無奈地嘆左一口氣，望一望天花板，冷冷咁拋出一句說話。
月：「佢係我阿哥，我地係孤兒，俾人遺棄個種。」
孤兒…？咁點解會同我扯上關係？而且…
我：「孤兒仲要咁後生黎講可以坐擁咁龐大既資源，又高科技面具又神經毒劑，你都幾厲害喎。」
佢對我始終有相當大既敵意，一聽到我開口就啤到我實一實。
月：「你估得無錯吖，我地係之後的確俾人收養左，大慨係三年前左右。日同月呢兩個名都係個時佢為我地改。」
終於問到有用既野，睇黎收養佢地既人就係想置我於死地既人。
但好可惜我呢個諗法只可以維持一陣，因為當我追問落去，想知道到底邊個要我死既時候，月既回答卻令我大跌眼鏡。
月：「佢從來都無叫過我地對你做任何野，但當我地知道自己個名既真正意思之後，我地就知道唔可以俾你再比你出現係佢既生命入面。」
「因為你既存在只會令佢痛苦。」
咩真正意思，咩存在令佢痛苦…又係一番莫名其妙既說辭，呢兩兄妹都神神化化…但係聽佢既講法，領養佢地既人應該唔係同我有仇先係…
只係佢兩個判斷我會令佢地既養父或者養母痛苦，所以先搞咁多野出黎。
啊只係梳理呢D關係都已經好頭痛，救命我仲要幾耐先可以問得到邊個先係佢地兩個既收養者。
面對眼前呢個困局，我唯一諗到可以做既就只係抓住自己一把頭髮，用力向後推，製造暫時而又不完美既allback。
伴隨住呢個動作既仲有一句說話。
「如果我唔係度，你所講既佢係咪就一定會開心？」
同我諗既一樣佢答唔到。因為佢都無法保證。
我：「不如就咁算喇，事到如今我知道你點都唔會講出佢既身份，因為你好想保護佢。」
「雖然我到呢一刻仲唔明白點解佢為你地改日同月呢兩個名，但與其用咁多精力策劃咁多野去對付我，倒不如花多D心思陪對你好重要既個一位好過啦，咁先係令佢開心既好辦法。」
唔知點解突然講出呢一番說話，自己都覺得奇怪，可惜既係佢並唔領情，而係繼續咬口切齒，且眼有淚光咁怒視住我。
月：「你明D乜野…如果咁做係work的話我地就唔洗咁辛苦…就係因為有你，佢先至係半年前突然間係我同阿哥面前消失…」
「同時亦係因為你，佢先至記起仲有我地兩個，仲打鑼打鼓搵我地，想我地唔好對你做D乜…一切都係因為你…」
喂阿小姐，你咁講我好無辜架喎，咩都推哂我度都有既？
當然我無講出口啦，避免刺激到佢。
係呢個時候，由頭先阿月小姐開口開始一直係旁邊睇既晨哥都開始有所動作，企左起身，伸左個懶腰。
晨：「好啦係時候離開呢度啦，始終唔可以留太耐，有咩想講等去到我既地方先再講啦。」
我：「要帶埋佢兩個去？」
晨：「當然啦你地仲有好多野未講完架嘛，而且我講過話要另一個體會下永遠既黑暗，總無可能咁順攤放過佢，放過佢地話唔埋過兩日佢地又會對你唔知做咩，到時又會搞一大輪，好煩。」
雖然唔係好想做到咁，但始終危險性仍然有，唯有聽晨哥講。
聽到自己要被帶走既消息佢地並無爭扎，似乎係知道大局已定。
但就係押送佢兩個出門既時候，有一架唔係我地既七人車停左係大門對出既馬路，擋住我地既去路。
起初我以為會係黎救日同月既人，所以握緊拳頭做好準備。
但當我見到係車上落黎既人既時候，呢雙拳頭唔只無辦法握緊，而且仲係度震緊。
因為，而家落車既人居然係已經好耐無見既二家姐。
二家姐：「將日同月交俾我。」