(嚴重FF愛情輕鬆同居故）《我與貓系女室友的二三事》: Ch.11

第二日放假，好早就比呀Man嘈醒，佢好急咁敲我房門叫我起身。梳洗好之後，我地就搵個袋袋住芝麻糊去附近嘅診所睇獸醫。

呢次係我第一次同呀Man一齊出街，雖然只係帶芝麻糊去診所，但係比我感覺好似同佢出去約會咁。好似一對同居嘅情侶帶貓去睇獸醫咁。

有一瞬間，我真係有咁嘅錯覺。

我同呀Man一齊走入診所幫芝麻糊登記，過咗無幾耐就可以見醫生，經過醫生檢查芝麻糊並無大礙，估計佢應該未到一歲，醫生幫佢打咗針同杜蟲。芝麻糊好乖，醫生幫佢打針個陣無點反抗，只係好慘咁喵咗聲。

呀Man就一直摸芝麻糊嘅頭頂，安慰佢。



睇完獸醫之後，呀Man就拉住我去寵物店去買芝麻糊嘅用品，入到去見到好多唔同嘅寵物用品，花多眼亂。

我哋係舖頭到行咗個圈，最後呀Man停咗係個飾物架到。

「你覺得邊條頸繩襯芝麻糊多啲？」

貨架上面掛咗好多款頸繩頸圈，又有唔同嘅質料，我望住一條紅色有噹噹嘅頸繩，唔知點解我第一時間會幻想到呀Man戴住呢條頸繩⋯⋯

又好似幾襯佢⋯⋯



「不如買呢條啦。」我係貨架上拎條頸繩落嚟遞到呀Man面前。

「都幾好喎，黑色配紅色都幾襯。」

我覺得襯你多啲。

我哋又走去揀芝麻糊嘅床、碗、廁所、糧，罐罐⋯⋯

好多好多嘢，因為買得太多嘢嘅關係，有免費送貨服務。我哋比錢嗰陣，呀Man佢諗住比哂全部，我立即阻止。話晒芝麻糊都係我拎返屋企，而且佢只係做緊freelance畫畫。



我都唔係咁好意思。

當我哋沿路返去嗰陣，我一直留意住呀Man嘅表情，同尋日一樣露出好溫柔嘅表情，嘴角都微微向上翹起。

「其實妳笑起嚟都幾好睇呀。無咁cool。」我不自覺咁講咗出嚟。

當我講完出嚟之後我先發現自己好似撩緊呀Man咁。

呀Man塊面紅晒，望落有啲怕羞。

正常我想講嘢嗰陣，忽然聽到有把聲叫我個名。

「Gary?」

我轉頭一望原來係Tracy。佢用好奇嘅眼光打量住我同呀Man。



我行開幾步拉開咗同呀Man之間嘅距離。

「又會咁啱係到撞到你嘅Tracy。」我有啲尷尬笑住講。

「係呀。因為尋日颱風班機取消咗，所以我放假呀。」

忽然佢視線轉移去呀Man到，佢有啲猶豫問：「佢係⋯⋯」

「我⋯⋯我朋友呀Man。」我唔想比Tracy知道我同呀Man同居，好在Tracy經常飛，無係大堂撞過呀Man，不過大家住埋同一幢大廈，點都會撞到，到時真係唔知點解釋好。

聽到我嘅說話，呀Man望咗我一眼，佢咬住唇無出到聲。

「係喎，你仲差我一餐飯喎。既然今日大家都得閒，不如今晚一齊食飯？



「好呀！」無諗過Tracy會主動開口約我，我覺得有啲驚喜。

呀Man見我應承Tracy食飯，就開口講：「我⋯⋯走先啦，唔阻止你哋啦。」

「呀Man⋯⋯」我未講完佢就帶住芝麻糊走咗。

我一直望住呀Man嘅背影，直到Tracy拍咗拍我膊頭。

「做咩呀？你成個人呆咗咁嘅？你對人有意思呀？」Tracy向我壞壞一笑。