《伙記唔該落單》: 第二十四章「謝謝你的愛」

第二十四章「謝謝你的愛」

總是向你索取 卻不曾說謝謝你
直到長大以後才懂 得你不容易

多想和從前一樣 牽你溫暖手掌
可是你不在我身旁 托清風捎去安康

我是你的驕傲嗎 還在為我而擔心嗎

你牽掛的孩子啊

長大了










我坐咗喺醫院走廊地下，雙手抱住膝頭哥，好似個小朋友咁。

唔知點解，呢一刻嘅我冇再喊。

可能呢幾日喊得太多，已經冇眼淚再流。

但係，個心真係好痛，原來最親嘅人離開自己嘅感覺，係咁難受。

我突然間發現，我又得返自己一個人。

一直陪住自己嘅婆婆，已經唔喺度。

冇得再同婆婆講，我返工喇。





冇得再同婆婆講，今日霖霖會上嚟食飯呀。

冇得再同婆婆講，不如我哋去飲茶囉。

「婆婆，我會好掛住你。」

。

「先生...你冇事嘛...」隔咗一陣，有個護士踎低問我。

「嗯...」我慢慢企起身。

「我而加...要做啲咩。」

「你入去睇一睇你婆婆先，之後我會帶你去辦埋啲手續。」





「好...唔該..」

我入咗去急救室，見到被一塊白布冚住嘅婆婆。

我慢慢行前，細細力揭起塊布，見到婆婆瞓得好安詳，好舒服。

「婆婆呀，記唔記得我八歲嗰年，話大個儲到錢，要買一間大屋俾你住？」我笑一笑，望住婆婆。

「但係呢..杰仔仲未做到..對唔住呀...」

「不過，我會努力。」

「而且我相信，婆婆你一定會保佑我。」





「係咪？」

。

幾分鐘之後，護士就帶咗我去辦手續，護士話要差唔多開始處理身後事。

於是佢問我有冇其他親人，我話冇，護士就叫我自己搞掂，但係我話我未試過處理身後事。

「咁呀...你有冇熟人或者朋友可以幫手？」

熟人...朋友...究竟我有冇。

「有。」我諗咗幾秒，就答咗個護士。

離開醫院後，我打咗個電話。





呢一日，我冇去街，冇食嘢，返咗屋企靜靜地咁坐喺度。

「頭先出咗去食煙呀...」

「呃..係呀婆婆。」

「喺屋企食都得架...」

我喺屋企點起咗一枝煙，諗返起呢十幾年嚟嘅一切。

人，原來真係唔夠個天鬥，佢想你走嘅，你冇得唔走。

叮噹。

「喔...嫻姐。」

今朝護士同我講，要諗用咩儀式做喪禮、火化定土葬、喺邊間殯儀館舉行。

我咩都唔識，但第一時間就係諗起嫻姐。

「唔該曬你..要你專登....」

「得啦。」嫻姐搭住咗我。

「唔洗講埋曬呢啲嘢。」

「嫻姐幫到嘅，一定幫你。」

「嗯。」

「係呢..子彈佢未知架可？」我問嫻姐。

「放心，嫻姐冇講出嚟，我淨係話有啲嘢做，要返一返屋企。」

嫻姐捉住我隻手，老懷安慰咁望住我。

「呢件事，你自己同佢講啦。」

「你兩兄弟雖然表面成日鬧嚟鬧去，但嫻姐知你哋感情好好，子彈一定會撐住你。」

「總之你有咩需要，就搵我啦。」

子彈，佢的確係一個幾好嘅兄弟。

「杰少，你去執幾樣婆婆平時最鍾意嘅嘢。」

「好。」

我見到今朝買嗰兩個砵仔糕仲喺地下，就執返上嚟，諗住俾婆婆帶埋上去。

我諗住去執兩件婆婆成日著嘅衫，之後見到電視櫃有一格突咗啲嘢出嚟。

一打開，見到一個盒仔，裡面有一張紙。

仲有啲錢。

杰 
呢度少少錢 
係你呢半年來每日比婆婆的
婆婆無能力比好生活你 
乖孫 呢筆錢用來娶個好老婆

原來，我每朝俾婆婆嘅錢，婆婆一蚊都冇用過。

而係留曬嚟俾我結婚用。

婆婆...點解你對我咁好...