［愛情甜故前傳--無糖純愛］曾經嘅我地，都係兩條平行線⋯: 17. 他⋯叫我的名字了！？

「今日佢唔落嚟打波呀…」我望到一班男仔喺籃球場上打波，但唯獨見唔到最常見到嘅葉子朗

本來我有三分期待可以見到葉子朗喺籃球場，就算唔可以光明正大咁望住葉子朗打波，偷偷望佢一眼都好呀～

有時我覺得，暗戀一個人都係一種幸福，縱使唔可以大步地走向佢搭話，但嗰種望一眼都滿足嘅感覺真係好難忘記

「芷諾～」忽然聽到有人叫我，我放低手上嘅蘋果汁然後抬頭，有三個女仔企喺我身邊，佢地呈三角型咁企，企前面嘅女仔問，「你一個人食飯呀？」

「係呀…」我微微笑講道，雖然聽到佢咁問有啲尷尬，不過我都係揀咗微笑着回答





「我地搵唔到位呀～可唔可以同你一齊坐呀？」佢問道

呢三個女仔都係我同班同學，一般熟，未去到我同靜愉咁熟，但係我同佢地都有嘢講

「哦，好呀～你地坐啦～」我點一點頭，然後打開飯盒蓋

「芷諾你真係好呀～」佢地三個即刻坐低，坐我隔離嘅女仔叫悠悠，坐我對面嘅兩個女仔，係詩雅同雯茵

我拆開餐具嘅膠套，拎咗匙羹同叉出嚟





「今日歷史堂調咗位真係慘呀～我坐到去最前，上堂都冇得瞓覺啦～」詩雅一嚟就抱怨着，佢地開始好似平日一樣傾計

「我咪仲慘，我坐到最側邊呀！點睇黑板啫？」雯茵無奈咁講道，「悠悠你坐喺芷諾隔離就好啦～」

今日問我借筆記嗰個女仔就係悠悠，悠悠聽到後望向我笑咗一笑

「諗諗下其實我地都未算慘啦！芷諾先慘呀！」詩雅望向我

「我？」我一臉愕然，仲有啲疑惑，「點解呀？」





「你坐正喺葉子朗後面呀！仲唔慘呀？」悠悠一臉驚訝咁望住我，好似我唔覺得慘係好驚訝嘅事一樣

一聽到「葉子朗」呢三個字，我嘅心跳就不由自主地加快咗，但係我唔可以比人知我中意葉子朗，所以我要假裝着心平氣和咁回答

「點解咁講嘅？」我面不改容地問道，臉上仍然保持着不解嘅表情，但心裏早已變得驚濤駭浪似的

「佢又唔係咩好學生，坐你前面影響到你呀陣間！」雯茵講道，聽佢咁講，睇嚟佢唔太中意葉子朗，「喺班上都冇咩女仔想坐佢附近。」

「今日你竟然主動借咗本筆記比佢呀！我真係嚇咗一跳呀！」悠悠輕輕地捉住我嘅前臂講道

「點解嚇一跳呀？」我仍然有啲不解，冇諗到原來班上嘅女仔都唔太中意葉子朗，都唔太想坐佢附近

「葉子朗份人咁高冷，你唔好同佢講咁多嘢就真呀！」詩雅好似喺度提點我一樣，好認真咁講

「哈哈…」我不禁笑咗出嚟，「你地講到葉子朗好似好得人驚咁嘅？今日係佢問我借筆記抄㗎，唔係我主動話要借比佢。」





「我仲以為你主動借比佢添呀！」悠悠輕輕拍咗兩下心口，然後又再拎起匙羹，食咗一啖飯

「就算主動借比佢都係芷諾好人啫～」雯茵笑起嚟講道，「唔通芷諾中意葉子朗咩～」

我聽到雯茵突如其來嘅一句，嚇到我心臟都頓時緊縮咗一下

「芷諾咁優秀，又點會中意葉子朗呢類男仔呀～」悠悠都笑了笑講道

「你地太誇獎我啦…我冇你地講得嘅咁優秀。」聽到人地嘅稱讚當然開心，不過都要謙虛做人

「咁你讀書真係叻嘛！」詩雅又稱讚道，搞到我都有啲唔好意思

「我都係中游咋，都要繼續努力。」我謙虛地微笑着表示





「諗下都知道芷諾唔會中意葉子朗呢類型啦～葉子朗讀書又唔好，個人又cool到死…」悠悠望向我，一臉認真咁同我講，「同芷諾你都唔啱…」

「宜家芷諾有諾中意葉子朗咩？」雯茵無奈咁笑道，「講到好似芷諾中意葉子朗咁～」

我坐喺一邊默不作聲，只係默默咁笑，因為我真係中意咗葉子朗…唔係好似佢地講嘅咁，我唔中意佢…

「噓…細聲啲啦…」詩雅突然傾前身子細聲同我地講，「葉子朗行緊過嚟…」

我聽到之後用眼尾偷瞄過去，真係葉子朗！佢行緊嚟呢邊，又會呢個時間先落嚟打波嘅？

「佢又會突然間行嚟呢邊嘅…？」悠悠細聲同我講

「佢啱啱明明直行㗎喎…又會突然間轉方向嘅？」雯茵和應道

「噓…！」詩雅皺一皺眉頭





葉子朗行到去悠悠嘅身後時停咗，我、悠悠、詩雅同雯茵同時望向葉子朗

「喂方芷諾，Miss Yiu搵你，叫你去教員室搵佢。」葉子朗面無表情咁同我講道

啱啱我冇聽錯呀可…？佢叫我個名…佢第一次叫我個名…




IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link