［愛情甜故前傳--無糖純愛］曾經嘅我地，都係兩條平行線⋯: 48. 別再喜歡我就好

喺等待上堂之際，我默默地望向對街嘅窗嗰邊，同時望到嗰個喺一個星期前比我拒絕咗嘅女仔—方芷諾

佢正同李靜愉講緊嘢，唔知講緊咩笑得好開心咁，方芷諾同李靜愉成日都一齊，佢兩個好似幾Friend

自從前幾日我同方芷諾一齊喺地理室執完嘢之後，最近我好似成日都會同佢對上視線一樣，我都唔知點解…上次喺地理室真係比佢嚇死，差啲成個箱跌落嚟，都未見過啲人咁唔小心，好彩我趕得切大步行過執扶住…

「第一堂係咩堂？今日嘅第一堂係咩…」我喺心中默默地諗緊到底今日第一堂要上咩堂

正當我快要諗到之際，有一個人企喺我個位隔離望住我





我一望過去，見到方芷諾企咗喺我個位隔離一臉唔好意思咁望住我

做咩呀？咪同咗你講你中意我係困擾，叫你死心囉…你仲想點呀？

「上堂啦要…」方芷諾一臉尷尬咁講咗一句，「歷史堂。」

我頓時望向黑板，喺黑板上值日生寫咗今日嘅上堂表，第一堂又真係歷史堂喎…我喺櫃桶拎咗本歷史書同筆記，然後起身行去前一個位坐低

之前歷史堂突然間話要調位，所以我坐咗喺自己本來嗰位前面嗰個位，方芷諾就坐咗喺我後面





我企起身嘅時候望咗方芷諾一眼，佢好似有啲驚我咁，我一行開咗佢就即刻坐低喺我個位度

方芷諾喺班上都算係讀書叻嘅人，個個老師都好錫佢咁，簡單啲嚟講就係會比較偏心

就好似之前Miss Yiu咁…佢係最偏心嗰個，雖然我對於呢啲小事並唔在意

「芷諾，出嚟幫我派嘢。」楊sir望向方芷諾，然後拎一拎起放喺枱面上嘅嗰一疊嘢

後面傳嚟拉櫈嘅聲音，然後喺我隔離有個女仔經過，方芷諾行咗出去，拎起喺枱面上嘅嗰疊嘢抱喺懷中，然後疊低頭望住疊嘢之後就開始喺課室行嚟行去





我對佢真係冇咩太大嘅興趣，嗰日聽到佢話中意我之後，我自己都有啲愕然其實，到底佢中意我啲咩？

佢呢啲品學兼優嘅人，點解會睇得我呢啲人上眼？

佢一時耷低頭，一時又抬起頭，應該就係望一望個名然後抬頭睇下佢坐邊

方芷諾，品學兼優、勤奮向學、深受老師嘅寵愛、一等一良好學生，呢啲嘢唔係因為我留意佢所以講得出，我講得出呢啲嘢係因為呢啲嘢係所有人都知道嘅事嚟，都冇咩邊個唔知

你係老師嘅話，你都會中意讀書成績好嘅學生啦，簡單又易明嘅道理

方芷諾喺下一個抬頭嘅瞬間佢望向我，但佢好快又耷低頭

唔知點解最近好似成日都會同佢對上視線咁，我都唔知點解，佢好似成日都喺我嘅視線範圍之內咁，我去到邊都會見到佢

最近唔知發生咗咩事，成日都會見到佢，就好似前幾日咁，許sir突然搵咗佢一齊幫手執儲物室，佢喺儲物室嘅時候對住我好尷尬咁，佢連望多我兩眼都唔會





一抬頭見到同我對上嘅視線，有眼神接觸嘅時候，佢就會即刻耷低頭望clip board，拎起筆

完全就係兩個人共處一室嘅尷尬…

但最近佢好似冇之前咁大反應見到我嘅時候，佢上個星期仲會特登避開我咁，今個星期就冇乜啦又，女人心 海底針，真係難捉摸

不過冇嘢所謂啦～只要佢唔好再中意我就好啦～唔好煩住我就係，我淨係覺得佢繼續中意我嘅話會令我更加困擾

佢派完嘢又行番番嚟，坐我前面嗰個傳咗三本簿過嚟，我拎咗自己嗰本之後就將剩低嘅兩本傳去後面

方芷諾番到埋位坐低，我坐嘅嗰張櫈同後面張櫈有啲距離，因為我同佢又唔係太熟，所以唔想將張櫈貼到去佢嘅枱邊

「宜家派番上次嘅測驗比大家呀，聽到名就出嚟拎啦。」楊sir講道，然後拎咗最面頭嗰份，「最高分，方芷諾，46 over 50。」





方芷諾好似啱啱坐低冇耐，然後又起身出去拎嘢

佢幾乎次次測驗都係最高分，就算唔係最高分，都會係頭三個高分

佢行到番嚟坐低，坐佢隔離嗰啲人即刻就開始喺度阿諛奉承咁

「你好勁呀！又係最高分啦！」

「下次我地一齊溫書呀！」

「葉子朗。」聽到楊sir叫我個名，我就起身，張櫈就自動比我推後咗

「呀！」

就喺我企晒起身準備行出去嘅時候，突然喺我身後傳嚟一聲短暫嘅叫聲








IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link