［愛情甜故前傳--無糖純愛］曾經嘅我地，都係兩條平行線⋯: 67. 自己嚇自己

「呵～欠…」我大咗一個大大嘅喊露，我琴晚溫書溫到4點幾先瞓，瞓得嗰3個幾鐘…什至連3個鐘都唔知有冇然後就起身番學

今日終於係星期一，星期六日我全日邊度都冇去，淨係留喺屋企、坐喺書枱前面溫書，我琴日好似生吞咗成本地理書咁…淨係坐喺櫈都坐琴屁股好痛

琴日同前日，我應該除咗行出廳食早餐、食Lunch，同食晚餐，仲有去廁所之外已經冇離開過我張書枱

我望前望後，望下左又望下右…今日又會見唔到方芷諾嘅？

「唔通我今日遲咗出門口？」我一邊喺心入面問，一邊東張西望的，「唔係呀，我明明都係早咗十分鐘出門口㗎…」





我呢個幾星期都係日日Keep住早十分鐘出門口，日日都見到佢㗎…定係今日佢去咗買麵包？定係佢今日唔番學？

一諗到呢度我就開始有啲擔心，佢會唔會係病咗呢？我諗到呢度嘅時候，心中仲多咗一份悶悶不樂嘅感覺…連行路嘅步伐都慢咗…突然間對於番學呢樣嘢，好似又唔係真係咁感興趣…

我行入學校嘅大門，喺我身邊有好多人行過，但我都冇咩心情去留意，我直接就行向樓梯邁步，行嘅每一級樓梯都變得格外沉重，喺我身邊走過嘅人都踏着輕快嘅步伐一樣，大家都有講有笑，但係呢種歡樂嘅氣氛冇辦法渲染到我

行到上4樓，我走向我嘅班房，我感覺到今日會係一個好悶嘅日子…

當我邁步行一課室抬頭嘅一個瞬間，我見到嗰個令我心心念念嘅女仔已經坐咗喺位，一副乖巧嘅模樣溫緊書





我嘅心裏有一種喜滋滋嘅感覺，心情好似又瞬間變好起嚟

「原來佢今日只係早咗番嚟啫～仲以為佢唔番添…」我喺心中講道，我一邊行番埋位，一邊用眼尾嘅餘光朝佢望去，「自己嚇自己添。」

我番到埋位坐低，我偷偷地望向佢，佢仍然好專心咁溫緊書，冇人可以騷擾到佢一樣…佢溫書溫到入神嘅模樣好似又比平日更加吸引，我嘅心跳又快咗，心跳好似緩緩地變得強烈起嚟…

一望向佢，心就冇辦法平靜落嚟…望向佢嘅每一眼好似都要觸動到心入面嘅警報，連自己都可以感受到自己嘅心跳有幾強烈，一次比一次強

但係我仲可以咁樣見佢嘅時間其實唔多，因為好快就要考試，而且喺考完試之後番多一個月就放暑假啦…暑假我一定冇咩可能見到佢，我就要等兩個月等到下年中四開學先可以再見到方芷諾；而且我都唔知道我可唔可以分到同方芷諾同一班，如果可以分到我地喺同一班就好啦！因為咁樣嘅話，我嚟緊嘅三年都可以同佢同一班，成日都可以見到佢





等陣…我做咩已經講到我好似會一直都中意佢咁？可能下年我就已經唔中意佢呢～不過如果我下年仲中意佢但我地冇同班咪死？神呀！求你一定要分到我地去同一班呀！唔一定要同一科，但拜託要同一班！

我抬頭望一望掛喺課室前面嘅時鐘，都差唔多時間要落去早會，我下意識嘅第一個反應係望向方芷諾

方芷諾都抬頭望鐘，見到差唔多時間嘅佢將原子筆放喺書入面然後合上書，將教科書就咁放喺枱面就企起身行向門口

我行喺佢身後，一直望住佢嘅背影，感覺上佢就連氣場都同我唔一樣…大家都會想同佢做朋友，大家都中意佢； 佢對所有人都一樣好，唔會討厭邊個…

「呵～欠…」我又打咗一個喊露，琴晚咁夜瞓真係唔掂，搞到我今日淨係打喊露都唔知打咗幾多個

我其實更加中意行喺方芷諾嘅身後，因為我中意睇佢嘅背影，佢其實都唔算好矮，喺我地班入面佢嘅身高都算中上，可能都有160cm

「如果我再高啲就好…」我嘅腦海中忽然默默地飄出一句，我都唔算係好高，宜家我都係得168差唔多169cm，喺我地級同呢個年紀嚟講都算係正常嘅身高，唔太高又唔太矮

但我都係覺得自己太矮，至少可以高到176或者178cm就差唔多啦，我諗好多男仔都會覺得至少要有175cm先叫Okay，男仔都唔會想自己太矮…





我嘅目光一直落喺方芷諾嘅身上，佢安靜咁走着，佢會唔會係喺腦海中背緊書？每一分每一秒都要用到盡嚟溫書，唔可以浪費可以用到嘅時間

佢伸手入去裙袋入面拎嘢，喺佢隻手從裙袋中抽番出嚟嘅時候，有嘢喺裙袋中跌咗出嚟

我眼見係可以同佢搭話嘅機會，頓時就行上前執起跌咗喺地上嘅紙巾，然後輕輕拍佢嘅博頭

「你跌咗嘢。」我壓抑着內心掀起嘅大浪，盡量保持同平時一樣嘅平靜同佢講嘢




IG Link: https://www.instagra.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link