[無糖故]我既女神係樂隊既主音: 第十一章

時光匆匆。

我地Pentaship，已經成立左四個月。

我、慧同傑仔嘅中三生涯亦都即將完結。

我地即將升上中四。

雖然中三發生左好多事，有喜有悲，但係我至少，開始搵到我嘅寄托。





結他，同樂隊。

七月二十日。結業禮。

經過中三之後，我同慧都係讀理科嘅Ｂ班，傑仔就讀文科嘅Ｄ班。

「雖然我地唔同班，但我地夾BAND都會成日見架嘛。」我望一望坐喺我隔離好似有啲失落嘅傑仔。

「做咩姐你，你唔係覺得我唔捨得呀。」傑仔輕輕一笑，「我係覺得，我地五個月後就要喺呢個禮堂表演，有啲難以置信姐。」傑仔提一提，下年嘅聖誕聯歡會就係十二月二十日。





「距離我地嘅目標，仲有五個月。」我輕輕握拳。

「你唔覺得五個月好長架咩？我簡直想依家就上台表演。」傑仔摸一摸下巴，「當初我學彈鋼琴嘅時候，我係冇諗過夾BAND架。估唔到你又會搵我，我依家又會咁樂在其中。哈。」

「我係驚你條友下年就係咁讀書，唔理隊BAND咋！」我。

「讀書就一定會，唔理隊BAND就一定唔會。」

「唔好吹水呀。我地樂隊冇左邊一個都唔得架。」





「梗係啦，我地隊名係咩呀。」傑仔微笑。

「咁，暑假你得唔得閒？約你練習要出黎喎。」

「睇下時間岩唔岩啦，出到一定出。」

「一言為定喇咁。」我伸出拳頭。

「一言為定。」傑仔用佢個拳頭輕輕碰一碰我個拳頭。

－－－－－－－－－－－－－－－－－－－－－－－－－－－－－－－－－－－－－－－－－－－－－

校長演講完之後，我地各自返課室。

「下年我地要分開喇。Michelle..」一返到課室，就見到阿敏同慧，阿敏對慧有啲不捨，因為阿敏佢下年升左Ａ班。





「唔緊要啦。我地幾時都可以約出黎見面架嘛。」慧安慰阿敏。

「係囉。我地練習果陣你都可以黎睇我地架嘛。」我行近佢地。

「講起練習，上次我咪影低你地嘅練習嘅，我今晚SEND返比你地啦。雖然都幾耐之前，但我一直都唔記得，哈。」阿敏笑一笑，好似已經冇野。

「好呀。我都想睇下我地練成點。」我坐低喺自己位。

「你睇下，你張枱到依家都係啲樂譜。哈。」阿敏指住我張枱。

「某程度上，冇呢啲樂譜，我地都未必有機會夾到BAND。」我摸一摸張枱，「其實真係要多謝呢啲譜。」

「做咩突然咁感性姐，搞到我又有啲感動喇。」慧微笑，又泛起微微嘅酒渦。





「初初識你，真係估唔到你咁眼淺。」我笑住咁望住慧。

「我份人一啲都唔眼淺，係覺得我可以實現我嘅夢想有啲感動姐。」慧。「老老實實，你條友雖然傻更更咁，但有時做啲野都幾令我感動。」

我冇回應慧，只係淺淺一笑。

年青嘅時間總係過得特別快，未來可以做嘅野只會愈黎愈少。我地要把握時間，追逐夢想。

我嘅中三正式劃上句號。

但係，我地樂隊嘅故事，中四先至開始。