由O Camp組爸組媽變左做真正既夫妻: Chapter 53

「呢邊啊！呢邊啊！」Claudia對住個女仔講。

「唔好意思啊！」女仔話，然後佢就上車。

「介紹下先，呢個係我朋友Toby，呢個係我男朋友Aaron！」Claudia向我地互相介紹比對方，我地兩個就好熱情咁介紹比對方識。

「喂喂等陣！我叫埋我條仔落埋黎食宵夜先！」Toby對我地話。

「好啊！四個人唔怕悶！」我講。



然後Toby就打電話，叫佢男朋友出黎。趁呢個時候我攞部電話開YouTube睇我最愛既多啦A夢，劇情基本上都係大雄比胖虎搞完，然後返去搵多啦A夢攞法寶去報仇，見到胖虎比多啦A夢既法寶搞到雞毛鴨血，簡直大快人心。不過為免失禮，所以我都係戴返AirPods黎聽，而Claudia就係到同Toby雞啄唔斷咁傾偈。

過左一陣，Toby既男朋友就落左黎，原來係我中學同學Michael。而我同佢、Steven三個老友鬼鬼，大家都係籃球校隊出身。Form 6嗰年曾經一齊作首《拔萃有個大仆街》去唱衰一個On9同學，仲影埋片Po上YouTube。搞到我地全部人都要比校長記過。雖然我地而家讀唔同既大學，不過我地定時定候都會出黎食下飯，講返以前中學做過啲On9野，考試有咩出貓策略，而家諗返都覺得好好笑。我同Michael一見如故，即刻用粗口問候大家，搞到Claudia同Toby用鄙視既目光啤住我地。（留意返，粗口問候係因為大家都好熟，講野唔需要客氣，同埋大家都係男仔，你明啦！）。不過估唔到Michael竟然會揀中國文學及教育系走去做阿Sir，完全同當年粗口爛舌既佢判若兩人。

「勇哥！原來Claudia係你女朋友啊？」Michael同我講。

「係啊！佢係我老婆！」我回應佢。

「我有話會嫁比你咩？唔知醜！」Claudia又係到串我。



「Aaron你同Claudia結左婚啦！？」Toby問我同Claudia既關係。

「係啊係啊！」我講笑咁講。

「咩喎？人地怕醜架老公！」Claudia面紅咁講。

「唔怕啦老婆！」我同返Claudia講「老婆」，搞到佢好霖。

「算啦！我地對你既私生活冇咩興趣啊！」Michael同Toby異口同聲對我地講。



「好啦！我地去邊到食野啊？」Claudia問。

「不如入大埔啦！難得我地四個人！」Michael提議。

我地全部人都冇意見，所以我地就去大埔墟到食野。話時話大埔真係好耐都冇黎過，呢到基本上同沙田一樣，好多地方都冇變。唔似得屯門、元朗、天水圍同啟德嗰邊變晒天。我地一邊食野，一邊係到傾偈，女仔當然講下啲女仔野啦，而我地男仔就會講下車、粗口、同埋以前中學啲野，至於女呢⋯⋯當然唔講啦！反正大家都有左鐘意既另一半啦！

「勇哥，叻仔喎。學Steven換JDM啊？」Michael問。

「係啊！學Steven咁，佢買露筍，我買佢對家掃把佬！」我話。

「唔怪得之唔見左你架100仔啦！」

「人呢要向前望既！比架車光榮退休囉！你部Scirocco點啊？」

「屌咪提啦！部Scirocco早幾個月之前比架FV牌大陸車衝燈撞到Total Loss，成個車頭爛晒。後來啲警察話個司機食左白粉偷埋架車，搞到而家都未搞掂。」



「咁你有換車？」我問Michael。

「當然有換車啦！換左架銀色前期FD，高橋啟介嗰部。」佢講完就比左張相我睇。

我一望張相，係一架一九九四年出產既FD，仲有埋Mazda Speed包圍，如果噴埋黃色就係高橋啟介。