由O Camp組爸組媽變左做真正既夫妻: Chapter 65

我同世伯傾完，妹妹係Claudia間房到拎咗好多嘢出嚟。唔使問一定係Claudia同伯母俾佢㗎啦！

「有冇搞錯啊又食又拎？」我問妹妹。

「嘻嘻！姐姐俾我㗎！」妹妹同我講。

「有咩所謂啊B，我都係咁啱有啲衫多咗喺度，見Angela身形同我差唔多，不如比佢好過！反正你着唔到嘅！」Claudia對住我講。

「係嘅係嘅！」我同佢地兩個講。



話時話，Claudia同妹妹無論身高、體重基本上都係差唔多，只不過Claudia嘅上圍比妹妹多咗兩個Cup。你話邊個靚？其實真係冇答案，點解？因為一個係我女朋友、另一個係我個妹，就好似左手同右手咁樣，缺一不可。希望妹妹日後有咗男朋友，唔好唔記得我呢個哥哥啦！

「B啊，你要講故事俾我哋聽！」Claudia對住我講。

「Claudia姐姐，乜阿哥會講故事俾你聽嘅咩？」妹妹問。

「我要佢每日都要講故仔俾我聽！」Claudia扯住我同妹妹講。

「我要聽我要聽！佢由細到大都唔會講故仔俾我聽㗎！」妹妹向Claudia撒嬌。



我心諗，其實唔係我唔想同你講故仔，只係我每次向你講故仔你會話我低B！每次一講完故仔就會俾你鬧！

「我講野好低B架喎！」我對住佢地兩個講。

「咁我地更加要聽啦！」Claudia對住我講。

於是我就作個故仔比佢地聽，係多啦A夢同比卡超既小故事。

有一日，多啦A夢向大雄告左假，於是坐時光機返去22世紀搵多啦美。點知返去途中出現左時空裂縫，去左一個不知名既地方。



當多啦A夢仲諗到呢到係咩地方既時候，突然間有個精靈球係佢面前轆過。佢仲聽到：「比卡比卡！」

於是多啦A夢聽住D聲行過去，見到比卡超成身傷晒。

「喂你冇事啊嘛？」多啦A夢問。

不過比卡超唔識講日文，多啦A夢聽唔明佢究竟講乜，唯有係百寶袋拎出翻譯蒟蒻俾比卡超食。

食完之後，多啦A夢想問比卡超呢到係邊到黎，點知⋯⋯比卡超見到多啦A夢，就即刻攬住佢喺度喊。

而多啦A夢見到佢咁嘅現狀，所以就攬住比卡超，等佢心情平靜返。過咗一陣，多啦A夢知道原來比卡超同佢嘅主人—小智失散左。

雖然多啦A夢仍然未知道呢度係邊度嚟，但為咗可以平安咁樣返去22世紀，唯有咩都聽比卡超話。

「頭先真係唔該晒你呀，你叫咩名？」比卡超問。



「我叫多啦A夢啊，多多指教！」多啦A夢向比卡超握手。

「我叫比卡超，多多指教！」比卡超向返多啦A夢介紹自己。

「呢度係邊度嚟㗎？」多啦A夢問。

「呢度係關東地區純白鎮，我哋係小精靈，我其他朋友仔都係收埋喺佢哋嘅精靈球入邊㗎！」

突然間，比卡超嘅主人小智係咁叫佢，佢見到多啦A夢個樣梗係好奇怪㗎啦。佢心諗呢個人肯定係其中喺某個精靈球跌落出嚟嘅小精靈。

小智聽到比卡超識聽日文，感覺到好奇怪，亦都感覺到好欣慰。然後比卡超就介紹咗多啦A夢比小智識。點知小智見到多啦A夢冇耳仔，就問佢係咪狸貓？

多啦A夢聽到「狸貓」呢兩個字，就即刻怒火中燒。喺度好大聲咁樣鬧人，而比卡超就用一啲好嗲嘅語氣哄返多啦A夢，同時小智都同多啦A夢道歉。



而比卡超就叫多啦A夢，希望可以幫到同小智、比卡超佢哋一個忙。原來比卡超之前同喵喵怪大戰，因為喵喵怪同火箭兵團喺大戰中使用陰招，導致比卡超元氣大傷。但由於大木博士同研究所一行人去咗渡假，所以冇辦法即時可以修理比卡超。

於是多啦A夢就諗到用隨意門，叫小智同比卡超locate左大木博士既位置。一打開門，就見到大木博士坐咗喺沙灘到曬太陽。當然，大木博士見到比卡超同小智帶着多啦A夢喺佢面前出現，就喺度嚇咗一跳。

不幸中之大幸就係大木博士見到比卡超傷成咁，就即刻幫佢修復，回復返之前嘅美貌。同時大木博士因為要研發一種小精靈，佢見到多啦A夢個樣都幾可愛。就以多啦A夢做一個藍本，將佢同比卡超混合，成為新嘅寵物小精靈。不過，要研發出一種新嘅精靈都要時間嘅。於是多啦A夢同比卡超、小智就用咗隨意門返去純白鎮。

一番到去，火箭兵團同喵喵怪又再出現，當然開場白又係嗰幾句廢話啦。但今次嘅喵喵怪比以往強化左好多，實在好難應付。而火箭兵團嘅願望一直都係想捉走比卡超，當佢哋見到多啦A夢，當然係得一想二，想捉走埋多啦A夢啦！

但才智過人嘅多啦A夢，一眼就識穿火箭兵團嘅詭計。首先，比卡超同多啦A夢就不斷喺度挑釁喵喵怪，逼佢喺度發癲。呢個時候，喵喵怪就打開咗個口。一多啦A夢就喺度睇準左機會，係百寶袋度攞出迷你多啦同埋一個丫叉。一野射落喵喵怪個口到，令到佢打咗一個大乞嗤，迷你多拉就出咗嚟。過左唔夠1分鐘，喵喵怪因為機器失靈，引發左大爆炸，瞬間灰飛煙滅！而呢個時候嘅武藏同小次郎當然好傷心，不斷抱住喵喵怪嘅屍體痛哭。自此之後，火箭兵團就徹底被解散，武藏、小次郎同佢哋嘅幕後老板亦都要承擔法律責任。

過咗幾日之後，多啦A夢知道時空裂縫已經修好，可以返去22世紀，就向小智同比卡超告別。就係多啦A夢準備離開之前，大木博士就衝左過嚟，向佢哋三個告知，新嘅精靈已經整好，一打開嚟睇。原來就係多啦A夢同比卡超嘅混合體，裏面有多啦A夢嘅百寶袋，同比卡超嘅必殺技10萬伏特，而呢個新精靈可以喺22世紀、同埋純白鎮之間自由活動，係多啦A夢或者比卡超嘅身邊不斷切換。

就係多啦A夢準備踏上時光機，比卡超就係眾人面前Kiss左多啦A夢，而呢個吻，代表着佢哋之間嘅關係，永遠都唔會改變。

當我講完呢個故仔之後，Claudia同妹妹不斷咁樣笑，覺得我講嘅嘢好有創意。而Claudia仲話我仍然記得我哋O Camp嘅隊名「比卡超與多啦A夢」，係一個好重視對方嘅人，然後佢就學故仔裏面嘅比卡超女孩，喺其他人面前Kiss左我呢個多啦A夢男孩。