由O Camp組爸組媽變左做真正既夫妻: Chapter 67

「起身，唔好訓！」有一把女仔嘅聲線叫我。

「俾我瞓多一陣啦。」

「唔得！即～刻～同～我～起～身！」個女仔不斷擠我全身。

呢把聲線，好溫柔！但我好肯定唔係妹妹，我擘大眼⋯⋯嗚啊！原來係Claudia啊！佢仲學埋電視劇嗰啲新婚妻子爬落我個身到。


「好啦好啦我起身啦！早晨啊B！」我講完就Kiss左Claudia既嘴唇。



「早晨呀B，快啲起身食早餐啦！」Claudia講完就推咗我入廁所梳洗，再帶我出飯廳到。

一出到去，就見到妹妹坐咗喺到食早餐。原來係芝士蛋包。

「阿哥你咁遲起身㗎，快啲食早餐啦！」妹妹對住我講。

「妹妹你煮㗎？」我問妹妹。

「Claudia姐姐整架，你要食多啲呀！」妹妹對我講。



「B啊快啲食啦，如果唔好食嘅話唔好見怪啊！」Claudia笑住咁同我講。

我心諗，既然係我最愛嘅女朋友煮嘢俾我，就算味道點樣都好，都一定要食晒佢為止！

於是我就將個包放入口，嗚啊，Claudia整啲包真係好好食呀！估唔到佢真係入得廚房出得廳堂，我諗佢將來一定係一個好媽媽嚟嘅啫。

「點啊？好唔好食啊？」Claudia問。

「好好食呀！女朋友整嘅乜都好食！」我講完就Kiss左佢。



「真㗎？我好開心呀！」Claudia嗲住咁同我講。

「Claudia姐姐我覺得你整啲嘢好食過阿哥整嗰啲幾十倍呀！」妹妹對住我哋兩個講。

喂喂喂！妹妹你使唔使咁樣詆毁我呀？話晒平時都係我煮飯俾你食喎！你仲食到舔舔脷添！

「唔係呀，我覺得你哥哥煮飯好好食啊！好過好多男仔㗎啦！B啊，你快啲食啦！」Claudia就幫我護航。

「咁我就唔客氣啦！」我哋三個就一齊品嘗早餐，然後我就走咗去洗碗。洗洗下，Claudia就走咗入嚟廚房，俾咗個Kiss我。

「做咩阿B？」我問。

「冇啊想睇你洗碗洗成點咋嘛？」



「你想好似上次⋯⋯」我好曖昧咁講。

「你去死啦！成日諗埋晒啲衰嘢！」

「唔好咁啦老婆，最多老公豬錫返你囉！」

「講笑咋！洗完碗快啲換衫，唔好着得太麻甩啊！同埋我哋今日唔使揸車！直接落地鐵站就得㗎啦！」

唔着得咁麻甩？我平時都係恤衫西褲，到咗放假基本上都係著T恤長褲波鞋咋喎。我覺得OK啊！

見到Claudia今日着住黑色Vans Sk8波鞋，我就知道今日其實要點樣着㗎啦！於是我就喺衣櫃攞咗件H&M白黑間條T恤，黑色Carhartt褲，再着返對黑色Vans Sk8波鞋就行得。

「點啊大少行得未啊？」Claudia同妹妹問我。

「OK啦兩位大小姐！」



我哋三個就出咗門口，經太古城中心就落咗去地鐵站。不過今日係星期日，地鐵梗係多人㗎啦！點解？因為呢個時候會有好多家長會帶小朋友出去行街睇戲食飯。

不過坐車嘅過程中，妹妹同Claudia雞啄唔斷咁樣傾偈，完全忽略咗我呢個人嘅存在！

差唔多去到銅鑼灣站，Claudia就叫我落車。由於妹妹要返去DGS嗰邊練水，所以佢就要去到金鐘站轉車過海。

同妹妹道別左之後，我就跟左Claudia出閘。

「B到底我哋去邊度啊？」

「跟我嚟啦！不過你陣間唔可以講粗口喎。如果唔係呢我會打死你㗎！」

「知道啦老婆！」



我就跟咗Claudia去左C出口，到底佢會俾啲咩驚喜我呢？