《足印》-從幼稚園開始，對你的心意原來一直是愛情-: 14
付過錢以後，我便扶著阿柔離開，向著景峰輕鐵站走去。
「點啊，仲痛唔痛啊？」我問。
「少少啦…」阿柔舉起大拇指，笑說：「我OK喎！」
「上嚟啦，」我把背包背在前面，再次半跪做出山上背向她的動作，「揹你到輕鐵站啊。」
「吓…？唔使啦…」阿柔的臉又紅了，「呢度又唔係山上少人，好怕羞架…」
「快啲啦傻妹，咁早都冇乜人~」真是的，我還半跪在地上呢。
「哎呀呀…」口是這麼說，不過阿柔也躺上了我的背上。
「不如今晚你都喺我屋企瞓啦？」我突然想到。
「嗯…？」阿柔她是聽不清楚，還是猜不到我這樣說的原因？
「我話，不如你今晚都喺我屋企瞓。」我一步一步的向前走，「如果你聽日起身隻腳都仲係好痛，你自己一個喺屋企，冇人睇住你就麻煩。」
「哎呀呀…又當人哋係…」阿柔話說到一半，我便伸了隻食指豎立到她嘴唇前。
「唔係當你細路女，係擔心你。」我微笑一聲，「我晏啲打畀阿媽同佢講聲。」
「呃…咁好啦~」阿柔甜笑一下，「呵呵~不過等我打畀盧姨姨同佢講啦，天仔你講嘅話姨姨實鬧死你啊~」
「哈哈，邊個講有咩分別？」不就是一樣麼。
「緊係有分別啦，記唔記得細細個有一次帶咗我落樓下玩，然後我唔小心仆咗落地擦損膝頭？」阿柔一邊說一邊回想著往事。
「記得~我揹住你返屋企，然後俾阿媽係咁鬧，最後佢罰我哋一個星期唔准落樓下玩呀嘛~估唔到你都記得。」我在下山的時候也回想起這段過去呢。
「唔係罰我哋，係淨係罰你一個~我只係陪你起屋企玩，冇俾姨姨罰~」阿柔打趣的笑著糾正我的錯誤，「緊係記得啦，多多都記得添啊！」
「哈哈，咁就交畀你打電話喇。」我也不想這麼大一個人還被老媽訓斥呢。
「而家就打~」阿柔舉起大拇指、微笑的說。
…
「好~拜拜盧姨姨~」
雖然我聽不到老媽的聲音，但是從阿柔的話中我也大約猜得到她們說了些甚麼。阿柔掛掉電話後不久，背著她的我也差不多走到景峰站。
「搞掂~又要借用你張床一晚喇~」阿柔又把頭伏在我的肩上。
「呵，唔滿意？」我可是要睡在地上呢。
「唔係啊~」阿柔雙手從後捏住我的兩邊臉，「只係自從細細個，好少機會喺你度瞓多過一晚呢~」
「你想嘅話，幾時都得架啫~」
「係至好講~」
「一個星期間唔中囉，阿媽都唔會唔畀你嚟。」老實說，老媽還會很開心呢。
我們走到景峰站後，便按照來的時候所乘搭的交通原路折返。一程輕鐵綫加上一程西鐵綫所需的時間跟來的時候都差不多，差不多四十五分鐘後我們便下了車，一起慢慢走回家。
我扶著阿柔，彼此一步一步的踱步著。阿柔雖然走路依然一拐一拐的，不過表情亦不像山上般痛苦，看來是跌打藥酒的功效。
從車站走了約十分鐘，我們總算走到家中樓下。正當我打算扶著阿柔走上前時，她突然輕輕拉住我的衣袖。
「做咩啊…？」我呆了一呆、回頭看著她，「到樓下喇喎。」
「傻佬，我要返我屋企攞校服先啊。」阿柔用手指指向她家的方向。
「你先傻，緊係畀你快啲上去休息先，聽話。」
「哎呀呀，還掂晏啲都要攞架啦…」阿柔不甘示弱的，雙手捏住我的臉頰。
「都話你傻，我晏啲一個過去幫你攞咪得。」我淺笑。
「哈哈，我一時都唔記得咗仲有呢個方法係唔使我郁架添~」阿柔伸出舌頭、淘氣的說：「咁本公主就命你喺我沖涼嘅同時去幫我攞校服~」
「遵命~」我也配合阿柔的說著。
一回到家中，阿柔便走進浴室洗澡，我也趁著這段時間來回了一次我們二人家中，把阿柔的校服拿了過來方便她明天上學。
再次回到家中時，阿柔還未洗完澡出來，所以我便打算收拾一下我們兩人的背包。我把背包內的各樣物品都逐一放回原位，其實也不是花了很多時間。
「呼…」收拾完畢的我嘆了口氣後，便躺坐在沙發上看手機休息。
媽：「阿媽落樓下買餸，你同柔柔返到屋企同我講聲。」11：24
…對了，剛剛只顧著扶住阿柔，都沒有自己抽時間看手機。而且我剛剛回來時也在收拾行山的物品，都沒有在意到老媽不在。
盧樂天：「啱啱返到。」11：37
我把訊息傳出去的同時，眼角瞧到了現在的時間還未到十二時。有一股感覺忽然之間湧進了我的內心中。…這是甚麼感覺？我看著自己的手腳，除了感受著早上行山的疲憊內，好像還感受到一種充實。
一種…星期日不再只留在家中無所事事，投身並感受大自然的一種充實感。
看著窗邊現正高掛的太陽，我不自覺的泛起了微笑。
阿柔，如果不是你叫我嘗試作出改變，我躺在床上隔著窗簾所看到的這個陽光，不會像現在眼前的如此閃耀奪目吧？
「做咩望住個窗口傻笑啊~」洗完澡走出來的阿柔問我，並打趣的把手背放在我額上，「傻咗？發燒？」
「燒你個頭，」我輕力的向阿柔施展一式額頭手刀，「只係…啱啱諗到一啲嘢。」
「哎呀呀，我聽唔聽得架~」阿柔邊拿著吹風機、邊把頭伸到我面前。
「我沖完涼出到嚟再同你講，」我站起身走往浴室，「不過唔知你瞓著晏覺未~」
「哈哈，咁我瞓醒你再話我知啦！」阿柔說著便開始吹乾頭髮。
「你記得先算~」