今日我開始左對公司啲同事進行復仇大計: 第三十二節

估唔到我一直都睇小左Valarie，我而家將件事從頭思索，成日喺唔同男人身邊打滾嘅佢，普通一個油頭粉面小契弟佢都應該見過唔少，佢點會咁易就中左我計畀Taylor得手呢。我喺今日返工之前，叫左Judy出去食早餐，諗住喺佢身上知道多啲關於Valarie嘅嘢。仲有罪證喺我手上面嘅Judy見到我一瞼惶恐，佢應該係怕我會責怪佢辦事不力，亦會籍此再折磨佢。我為左立個下馬威去攞個主導權，我故意約佢喺佢屋企附近嘅茶餐廳，等佢一路驚住會畀啲街坊熟人撞到。而且我亦都故意大大聲咁去講嘢，等佢一路都要提心吊膽怕畀人聽到。佢一坐低左之後，我就即刻拍枱大聲咁話佢：「叫你做小小嘢你都做唔掂，你而家係咪即刻恰我份人和善，覺得我唔敢對你做啲咩呀。」一面惶恐嘅Judy細細聲咁講：「你冷靜啲先啦，我真係好努力去周圍問人打探架啦，但我本身同Miki又唔係熟，況且阿Kate果件事就更加令難去打探啦，你再畀啲時間我啦。」我故意繼續大大聲咁答佢：「叫我冷靜啲？你而家即係覺得我好唔冷靜，嚇親你大小姐咁話啦下話。你即係睇唔起我呢啲粗人，平時講嘢都有大大聲咁，我同你講我大聲唔代表我無禮貌，見住你咁嘅死樣我都無講過半句粗口，你就知我份人幾有禮貌啦。」隔離枱兩個金毛哥哥仔聽到我呢番說話，佢地都點同表示認同。我眼前嘅Judy見到我不斷大大聲咁講嘢，佢除左一臉無奈同四處張望睇下有無熟人之外，都唔敢再講任何嘢。我見已收到主導之效後，將聲線控制返喺正常音量同Judy講：「拿，咪話我唔畀機會你去將功補過啦，Miki你就話因為唔熟，雖然時間去打探，我就再畀時間你。但Valarie你同佢應該就好熟啦……」

 

Judy聽到我提起Valarie個名之時一臉疑惑道：「Valarie都宣佈左唔會爭阿Kate個位啦，仲關佢咩事？」見到佢竟然對所謂嘅好姊妹Valarie嘅動向一無所知。我忍唔住大笑道：「你仲話同Valarie係好姊妹喎，佢早排根本係扮退出減低你對佢嘅戎心咋。係人都知個位都係得你同佢最大機會啦，見你而家放慢晒手腳，佢咪即刻同阿Sam姐講佢其實比你更加勝任囉。」Judy聽到我咁講都仲係半信半疑，佢話：「無理由架……佢上星期仲約我去飲嘢，話咩會全力支持我……佢仲話之前同我有啲誤會，不過而家佢諗通左咁…..你喺邊度聽返黎架？」我聽到之後又再次拍枱鬧佢：「你而家即係質疑我姐，你咪唔好信，到畀Valarie坐左你個位之後你黎後悔，佢上左位果陣順手踢埋你走就好笑啦。」Judy聽到之後靜左一陣，再講：「其實我都唔係傻，我都知Valarie同我其實都係同一類人，我同佢喺無利益衝突之下咪相安無事，大家平時可以出去一齊玩囉。到要爭嘢果陣，佢可以比我更不擇手段。不過我係以為佢都就嫁人啦，點解會仲有心去博上位姐。」我聽到之後冷笑道：「你係咪坐住左個腦呀Judy姐，如果係你不如企喺身再同我講嘢啦。佢以前嫁醫生就唔憂柴憂米姐，而家佢係嫁個窮鬼佬呀，你估食廉價洋腸唔洗付出代價架？」Judy聽到之後唔出聲，我繼續講：「你當為自己又好，為左向我交差都好，你好拿拿臨搞清楚Valarie之前有耍過啲咩手段。如果唔係一陣連佢都有你嘅把柄喺手，你就喊都無謂啦。唔好成碌木咁企喺度啦，拿拿臨出去埋完單之後，跟手幫我截架的士恭送本大爺去返工啦。都幾十歲人架，仲下下都要人教，瘟仔又唔見你要人教。」

 

喺返到公司之後，本身同Miki傾緊計嘅Evans同Miki一齊行埋黎。Evan同我講：「多謝你呀James，係你令我有勇氣去搵Laura了結呢件事。不過你之前可能誤會Miki點解唔畀我見Laura，其實佢都係為我好怕我見到Laura會太傷心，你地都對我好好，都係我好朋友。」我聞言之後望住Miki陰陰咀笑道：「嘩Evans哥你都算衰格啦，唔只派好人卡畀我，仲派埋畀Miki，我唔制呀。」Miki聽到我咁講之後黑左一下面，之後再扮無事咁話：「唔洗咁客氣啦Evans，其實Daisy都好關心你架，佢對James都無咁關心呀。James其實都要多謝返你轉頭啦Evans，介紹左Jasmine畀你識。」佢呢一句說話好明顯係提醒我Evans都同有好有機會搶左Daisy，而且仲專登令到Evans覺得我同Jasmine係有路，Well played, Miki, well played。一時間唔識反應嘅我唯一扮有嘢做行開，我行返個位果陣故意望一望Daisy，但係Daisy好似故意逃避我眼光咁去埋首工作。





 

Valarie同Kate一齊行入黎，佢地一路有講有笑，睇黎喺返工之前Valarie有喺阿Kate身上落啲功夫。之後我襯Valarie身邊無人之際，行左埋去捉住佢雙手，之後大大聲咁講：「Valarie你真係現代女性典範呀，嫁左人都唔介意擔起頭家，唔洗男人養。我知你係為左養個西人男朋友先出黎爭阿Kate個位咋嘛，你咁樣唔算係反口呀。」本身我以為突然玩踢爆令到Valarie嚇左一跳，點知佢反過黎用全公司同事都聽到嘅聲量講：「多謝你呀James，有你支持我就放心啦。我係覺得自己最勝任呢個職位先出黎姐，大家同事都知道我唔搞是非，剩係想專心做好呢返工姐。」聽到Valarie突然又出黎爭呢個位，在座嘅同事都相當錯愕，特別係Miki，佢驚訝到挈大左個口。而Judy本身可能都有啲唔信我，但而家由我當眾幫佢去證實件事之後，佢只係冷冷地望住Valarie，我諗佢雖然無真係當過Valarie係交心朋友，但咁樣畀佢赤裸裸地出賣我相信佢都唔會太好受。而Valarie望住我嘅時候其實我都有啲心寒，呢個女人真係太好戲，由之前扮死狗到而家突然宣佈再次參戰，成件事佢都開始咁不動聲色咁做到，而且連Judy呢啲老江湖都畀佢呃到咁透，佢真係好利害。另一方面，我又好想知佢究竟對Taylor做過啲咩而玩到佢咁盡，我突然覺得Taylor應該係我扳倒Valarie嘅關鍵人物……