今日我開始左對公司啲同事進行復仇大計: 第四十八節
真係意想不到平時剩係掛住參與社運嘅Evans，喺決定左要坐阿Kate個位之後會變得咁積極。唔知係咪佢伯爺見到個仔肯興極工作，老懷安慰之下，一向什少喺我地分公司出應嘅高層突然之間蒲頭，而且佢地一入到黎都即刻同Evans打招呼。見到呢個景象，我心情有啲複雜，一方面我又有啲高興Evans終於肯成長做返個大人，但另一方面我又唔慣睇住佢呢個咁單純嘅細蚊仔去耍手段。我諗Miki呢一刻心情應該同我一樣複雜，佢心愛嘅Evans終於肯去成長，只可惜佢肯長大嘅原因唔係因為Miki。而呢個時候，Judy主動走埋黎問我：「阿太子爺係咪先係被人欽點果個呀？」「就算係，你都無份做特首夫人架啦老女人，不過如果Evans真係上左位你就可以安心喺度頤養天年啦，有你著數架。」「但係Valarie個賤人會唔會肯放棄？」「喂你當我真係公司高層咩，你問我我點知姐，不過你嘗試下發揮下小小用處，走去睇下Valarie有咩反應啦。」點知Judy無出聲，佢只係用眼神示意要我望返去果堆高層度，著到花枝招展咁嘅Valarie一面風騷咁行左埋去班高層度，而且同佢地言談什歡，一啲都唔似受到威脅咁，相反Evans只係一臉緬甸咁喺隔離陪笑，一啲大將之風都無。望住呢個景象，我唯有搖頭嘆息。我再問Judy：「點解你仲棟喺度，唔走埋去爭取機會？哦，你驚我會威脅你呀？我咪講左我唔會阻你上位囉，你快啲過去啦老野，老人家手腳慢，你再唔過去就會執輸唔夠啲後生鬥架啦。」講完之後我就無理Judy行返埋位，喺行過Daisy個位之際，佢望一望左我，而且好似欲言又止咁，由於我都唔知同佢講咩好，我都只係苦笑左一下就返返埋位。喺返埋位之際，我枱頭嘅電話又響起：「喂我尋日用左一晚時間，終於破解到啲暗號啦。我用左好耐時間去破解……」電話另一邊嘅阿油好似好興奮，佢應該對自己呢個成就好滿足，不過呢一刻我無心情聽佢長篇大論：「我唔想知你用咩方法，你剩係話我知破解左內容係咩就ok。」
「佢地其實係用緊摩斯密碼去溝通，如果我無睇錯，佢地好似係講緊公司附近有咩好食。」「阿油哥，你覺得如果佢地係講緊公司附近有咩好食，真係值得大費周張咩？」我講完之後，阿油沉默左一陣，佢之後話會再諗下就收左線。我都預左阿油呢條友靠唔住架啦，不過除左拉埋佢落水，我暫時都諗唔到仲有咩有效方法去刮大明出黎。呢個時候，有一名我都唔知好似叫咩名嘅高層走左埋黎問我：「你係咪阿James，你阿姐Sam姐成日向我地提起你架。」「係呀你好，我就係阿James，不過唔好意思我而家做緊野，唔得閒同你講住。我無興趣爭阿Kate個位，我只係想一心服務公司，所以唔好意思我唔打算奉承你地。」果個高層聞言大笑：「你果然就如阿Sam所形容，又唔識做人又亂講嘢，不過我欣賞你呢種人，起碼你唔會靠擦鞋上位，我會繼續留意你，你唔好令我失望。」我故意兵行險著，唔理眼前係咩人，都扮晒耿直唔擦鞋亦都唔怕得罪對方，果然某啲高層就係鍾意我呢一類人。喺我附近行過果件唔知係Kathy定Katy聽到我同果個高層嘅對話之後目瞪口呆，佢等果個高層走左之後走黎同我講：「你知唔知頭先果個係董事局一員黎，係老細級，你個痴線佬真係咩都夠膽……」「喂你條友偷聽人講嘢咁無禮貌架，喂你又話過完年辭職嘅，而家都就黎清明啦，點解你仲喺度架？」阿唔知katy定Kathy聽到之後陰陰咀笑咁話：「一日未睇到你班痴線佬同痴線婆分出勝負，我都唔打算走住，老老實實呀，你地是但一個仆街我都想睇呀。」
「咁以你作為一隻局外人去睇，你覺得邊個最有機會脫穎而出呀？」「雖然本身我以為Valarie應該都穩操勝卷架啦，點知今日見到Evans佢突然發力，不過你頭先對坐高層果一著都夠高章啦。」「即係你覺得其他人，好似Judy果啲都已經無晒機會？」「講真一句呀，Judy呢排好似失魂落魄咁，一睇就知佢係畀男人飛啦，小小嘢都已經落晒形無晒心機做嘢，佢點擔到起支大旗呀，其他人就更加唔洗提啦。」我望住眼前呢位我到而家都唔記得佢叫咩名嘅女人喺度分析大局，不禁覺得佢平時一定係無人同佢傾計好鬼悶，我問佢一句佢就答咁多句。不過佢咁唔起眼，平時一定有好多時間去觀察其他人，佢啲意見都應該有啲參考價值。
班高層喺度留左一陣，再捉左阿Kate入去講左陣之後佢地就走左。Valarie好明顯無畀頭先Evans得寵嘅情景影響到，佢喺啲高層走果陣好似主人家咁恭送人地出去，唔知真係以為佢擺緊酒呀。相反Evans好明顯都仲未識得點耍手段，佢見到班uncle走都無乜反應，剩係坐左喺度，要Daisy走去提佢佢先識得起身去做下樣。不過Daisy頭先果下動作除左我留意到之外，Miki都應該同樣看在眼內。佢之後走左埋黎喺我耳邊輕輕同我講：「我終於見到Evans肯成長啦，你係咪好替我高興呢。」當我再望向Miki，我已經見到佢眼角含淚，而睇住Daisy一副女主人照顧夫君嘅模樣，我又何嘗唔難受呢。我無答Miki，只係又開始左唱：「同是天涯淪落人，相逄何必曾相識～～～」我其實仲可以講啲咩，就算Daisy真係同左Evans開始左，我都係最無資格怪責佢地果個，不過可憐Miki由始至終做左咁多嘢，都係得唔到Evans嘅青睞。