今日我開始左對公司啲同事進行復仇大計: 第五十節

Sam姐終於決定左將佢同Valarie所發生嘅事話畀我知，但條件係要我單刀赴會上佢屋企。雖然Sam姐以前同我關係係好友好，不過我呢一刻真係唔多敢信佢，防人之心不可無，我堅持將個點改去我屋企，Sam姐喺遲疑左一陣之後無奈答應，但佢千叮萬囑叫我唔好畀其他人知呢件事。我明白佢好歹都係一個所謂高層，佢每行一步都有佢嘅顧慮，特別係佢已經因為唔知啲咩事畀Valarie揸住左痛腳，而佢曾經對我都算好好，我應該無條件幫返佢以報知遇之恩。不過佢之前反轉豬肚嘅行為其實真係好傷我心，所以我暗下左個決定，喺必要時我會連Sam姐都出賣埋，就好似當日佢為左自保一樣都可以不念舊情炒左我。雖然應承左Sam姐我唔會同其他人講發生嘅事，但我為左幫自己個計劃下定一重保險，我叫Miki喺Sam姐黎到我屋企之前上定我度埋伏左先，至於點解咁做，除左係有咩事我可以多個證人之外，而且必要時我仲可以叫Miki出黎威脅返Sam姐轉頭，雖然我未知係咩事，不過足以令到Sam姐要受Valarie操控嘅事，如果畀多一個人知道Sam姐一定會驚到賴。喺放工之後，我即時返左屋企準備，由於我屋企平時多數都係得我同個妹兩個喺屋企，所以我都係打算預先耍走左佢先再叫Miki同Sam姐上黎，不過喺我返到屋企畀左幾百蚊叫我阿妹出去食飯夜啲先返之後，佢竟然問我：「喂大佬，你出左面縮骨，連我大學畢業果陣你都係喺山邊摘兩棵草畀我算，但呢排你成日塞錢洗開我，其實你係咪有事發生呀。」估唔到呢個成日同我駁咀鬥氣嘅妹竟然會擔心我，連我畀錢佢洗佢都會問長問短，我呢一刻真係有啲安慰。不過為左唔好令佢有咩擔心，我同佢講話：「其實我叫左兩條女上黎，你知啦，一次過兩條喎？。嘈架嘛，你都唔想一路聽住我地開party你一路唔知點咁呀，我叫你走係為你好咋。拿拿臨走啦，唔好阻住我呢個熱愛生活嘅大好青年去感受兩性之間嘅奇妙之處啦。」點知佢聽完之後不懷好意咁笑住話：「阿哥你節省小小啦，你咁嘅死款唔好話有兩條女，一條都難啲啦。起雙飛，你左右手一齊打飛機就係起雙飛啦。」

 

可能有啲嘢真係基因注定，我個妹同我一樣都係一名好事之徒。佢認定我講大話，同我要用錢打發佢走必定係因為會發生啲相當有趣嘅事，所以佢選擇左死守喺屋企，佢拎左我幾百蚊之後就衝左入房鎖埋門。其實都唔理得咁多，我唯有隔住門同佢講話陣間會多個人入去間房匿，而佢亦隔住道門，相當雀躍咁答應左我呢個要求。無幾耐，Miki終於上到黎。再一次踏足我家門嘅Miki，同上次唔同，佢眼中已經無左當初果種咁熱徹要幫我手果種熱情。相反佢上到黎之後，只係粒聲唔出咁坐埋一邊。我突然醒起呢兩日Evans雖然突然上進，但係個出發點好似係喺Daisy身上，連我都將呢件行看在眼內，我身旁嘅Miki又點會察覺唔到呢。由於陣間嘅事事關重大，Miki亦都係我計劃內非常重要嘅一環，所以我要爭取時間喺Sam姐上黎之前，摸清Miki呢一刻嘅意向。我決定一黎就單刀直入開門見山咁問佢：「如果Evans係你搞咁多嘢嘅唯一理由，佢而家竟然開始肯上進，你應該好開心架，點解你個樣好似死晒狗咁？」Miki聽到我呢個問之後冷笑一聲話：「James哥，大家都唔係蠢人，唔好同我黎呢一套啦。係人都見Daisy已經一副押寨夫人咁嘅樣啦，我算係咩姐？」「挑，咁你仲上黎搞咁多嘢把撚咩，真係唔講粗口都唔得架。你放工太得閒咪去工聯會報下堂學下點用Facebook啦，做咩要牽涉入我呢啲麻煩嘢度呢？」Miki聽到我咁講之後再一次冷笑一聲，佢用不屑嘅眼光望住我話：「難怪你個Daisy跟左第二個人啦，你根本都唔明白女人諗咩。」「挑你係咁醒嘅，而家等緊做老闆娘果個就係你唔係Daisy啦。你如果係無心再玩落去唔該你快啲走呀，我而家打算玩大去豪賭一鋪呀，我唔想連累埋你，襯呢一刻仲有得走好走啦。」Miki聽到我咁講，原本一臉不屑嘅佢竟然微笑起黎，佢話：「James你真係好戇居呀，我鍾意左Evans咁耐，我投資左嘅時間心血咁多，我點會無預計過呢個結果。我的確係好唔好受，不過有時女人就係咁盲目架啦。」如果連Miki呢隻小妖精都會為愛情而盲目，咁點解偏偏Daisy對住我就咁多猜疑嘅呢？我真係諗唔明。

 

Sam姐突然打黎話佢要遲少少先到，咁我就打算喺Sam姐上黎之前同Miki複習一次我嘅計劃同講畀佢知呢幾日發生左咩事。Miki不愧為Miki，喺我未出聲之前，佢喺袋度拎左啲嘢出黎畀我睇。「自從你果日同Sam姐入左房嘈，我已經覺得你同佢遲早一日會再反多次面，所以你當本小姐大發慈悲可憐你，我幫你叫阿油佢搵定左Sam姐有咩古惑嘢…….」「喂Miki你對我咁好，其實係咪鍾意左我姐？不如咁啦，如果Evans同Daisy一齊左，我就同你一齊啦，反正同是天涯淪落人…….」「夠啦唔好唱落去啦，你想同我上床咪直接出聲囉James哥，不過我唔會咁易落搭架喎，廢話講夠啦。不過先旨聲明，我覺得Sam姐係好人，我唔希望你要對付佢。而且老實講，我搵唔到佢喺工事上有咩犯錯，而講佢私底下嘅事又好似好仆街。」我拎起佢疊嘢略略望過下，原來係Sam姐啲上網紀錄，佢竟然用過公司電腦黎買性玩具同上lesbian交友網。我望一望Miki，忍唔住恥笑佢話：「Miki姐，你係咪想同我講你發現Sam姐原來係les呀？你諗住叫我用呢樣嘢威脅佢呀。喂你地係咪果啲平時會同人講：『我喺網上搵到條片好搞笑架，我見到網上有條片好搞笑呀，係個阿叔喺架巴士上面鬧個四眼仔呀』，鍾意將啲舊聞同人分享嘅人黎架。」Miki聽到一臉不忿：「點都好啦，Sam姐都係好人黎嘅，你陣間最好唔好傷害佢啦。」其實講真我又點會想傷害Sam姐，我都希望我唔需要選擇同佢反面呢條路……







Sam姐喺比原定時間遲左一個鐘上左黎，而Miki亦照原定計劃匿左去我阿妹間房。平時做事謹慎小心嘅Sam姐，竟然滿身酒氣咁上左黎。由於佢已經遲到，而且仲要係因為飲酒而遲到，我即時怒火中燒。一向對佢和顏悅色嘅佢指住佢話：「你睇你搞到自己似咩呀，平時我一向以你做做人榜樣。我知自己學唔到你嘅辦事能力，但我都想學你做嘢咁謹慎同認真，但你明知約左我商討大事你都仲走去飲酒？你有無離譜啲呀？」Sam姐估唔到我會完全不分尊卑咁指責佢，再加上酒精影響之下，佢沖左上前扯住我衣領話：「而家係咪連你都想作反呀，如果唔係我你都唔會仲喺公司生存度呀。我係你上司，你要尊重我，即刻同我道歉呀。」我目無表情咁好大力咁推開佢，佢失左重心咁坐左落張梳化度。我繼續用批判眼光望住佢，一邊話：「你係我上司又點，呢排你嘅行為值得我尊重咩？我真係對好失望，我唔理你你點解同Valarie有咩瓜葛，不過你一開始接近佢已經係錯。你因為呢啲事而想開我刀就更加錯，我而家同你講，你一係就死入廁所洗過面，好好清醒下之後出黎同我講係咩事。但如果你要堅持擺老細款無理取鬧的話，咁我唔該你而家即刻同我走，喺放工時間我無必要再受你氣。」怒火中燒嘅Sam姐想起身打我，但佢隻手未打黎就到已經被我擋住左，我今次更加用力將佢推落梳化，向佢大喝：「Sam姐你而家真係成棟屎咁呀，你係我阿姐黎架，身為女強人嘅你點可以咁失控架。」一向堅強自信嘅Sam姐經我一喝之下忍唔住喊左出黎，佢一路喊住一路話：「我再叻都係一個女人黎架咋，我鍾意女人唔代表我想做男人呀，你地個個係咁迫我，我好辛苦呀。」我依然用冰冷嘅語氣同佢講：「你收得咁多人工就要遇左有咁大壓力，無籍口架，唔好試圖用自己性取向黎博同情。我就係因為無歧視過你，先唔想優待妳同情你，如果你而家反而想用你性取向黎控訴其他人係迫害緊你，我對你真係好失望。」

 

Sam姐對我嘅義正詞嚴全無還擊之力，不過佢開始抹眼淚同唔畀自己喊落去。我呢個時候喺地下執起佢頭先喺糾纏之間跌左喺地下嘅一包煙，遞左畀佢。開始冷靜嘅佢以為我向佢示好，佢就喺入面抽左支煙出黎，之後拎起火機打算點黎食。我見狀粒聲都唔出入行去雪櫃拎左支水出黎，Sam姐應該以為我係想畀支水佢飲，用返把逐漸平和嘅聲線同我講：「我唔口喝。」我無理佢，扭開左個樽蓋行埋去，之後拎支水將佢支煙淋熜，而佢亦都當然畀我淋濕埋。佢黎唔切迴避，只係一臉驚訝咁望住我，我繼續用果把冷淡語氣同佢講：「你入到我間屋，行都未除就周圍行我已經無同你計。但你問都無問過我就食煙？Sam姐，我對你已經一再忍讓，但點解你都係唔尊重下我，你當自己真係過門都係客就大晒呀？」我相信我一連串嘅行動已經令Sam姐明白佢呢一刻唔係我上司，亦唔係在我之上。我都唔係想連對住Sam姐都咁工於心計，不過我呢一刻真係唔可以太過和善。Sam姐見我目無表情，開始有啲驚，佢應該無諗過一向當佢家姐咁樣嘅我會有呢一面，佢唔敢發作，只係有啲無助地咁拎紙巾抹返乾條裙。Sam姐一路抹緊，一邊驚惶失措地同我講：「我要將一切話畀你知，其實都好需要勇氣架。我唔知你會唔會都出賣我，不過我呢一刻無路揀，我頭先只係想飲酒去壯膽。我就係因為唔想再畀人控制先黎搵你，我頭先都係想食支煙黎定下驚，我唔知你咁介意…..」「我都係果句啦，我唔會同情你，不過我感激你對我有知遇之恩，所以我想幫你。如果你唔信我嘅，門口喺果邊。我唔想見到一個猶豫不決，畏首畏尾嘅Sam姐。」

 





慢慢平伏左嘅Sam姐，好似想搶返個主導權，佢試圖用返佢平時高高在上嘅聲話：「你都係想整走Valarie先想幫我咋嘛，你估我唔知你咩。」我冷笑一聲話：「係呀，我係想搞Valarie，我係要向佢報復呀。不過我根本唔需要你幫手，相反，喺我收佢皮嘅過程你都可能地位不保呀。我而家係當報恩先幫你，你如果有自信自己搞得掂嘅，你咪行出呢個門口囉。不過行出左個門口之後，你唔洗旨意我會再幫你。」Sam姐嘗試再反駁，不過佢諗左好耐都係啞口無言，最後佢話：「我因為太寂寞，做左一件好錯嘅事。」「你又黎啦，你做錯事就係做錯事，唔洗試圖搵籍口令我同情妳，呢樣嘢係你教我架Sam姐。」Sam姐頹然地點一點頭認同我嘅講法，繼續講：「過程我唔想多講啦，總之Valarie原來一早發現左我係les，佢亦都知道我另一半好耐無返過香港，所以佢早排成日黎搵我。我初初以為佢只係想黎擦我鞋，但點知佢一直都只係關心我同同我去玩，我先放下左戒心，我以往佢同你一樣都當我係朋友。點知之後佢開始有意無意咁撩我，最後我仲因為飲大左同佢開始左上床。但最後一次，佢竟然叫左兩個黑鬼同佢個鬼佬老公黎拍片……我唔想講落去啦，總之我有把柄喺佢手啦。」估唔到Valarie又係用呢招，不過好彩我呢一刻都有佢老公嘅玉照喺手，而且仲有咁多人喺我呢邊。我唔想畀Sam姐知我咁胸有成竹，我用好誠懇嘅語氣同佢講：「對唔住，我唔知你經歷左啲咁慘嘅事，我仲咁差對你。Sam姐，你好勇敢，我地齊心合力一定可以搞掂果個Valarie架，你唔洗怕呀Sam姐。」Sam姐只係無奈咁講：「我都講晒野你知，我唔信你都唔得啦。」就係咁，復仇者聯盟又增加多一員了。



喺Sam姐走左之後，Miki喺我個妹間房走左出黎。佢問我：「估唔到你把口又叻左，頭先好好戲呀，如果唔知真係以為你係真心想幫Sam姐。」「我從來都無打算主動去加害Sam姐，只要佢唔會對我做成任何阻撓，我都係想佢好，佢一直對我其實都算唔錯。」Miki拎起Sam姐頭先留低左包煙，問我：「即係如果我如果成為左你嘅阻礙嘅話，你都會毫不猶豫地對付我啦？係呢，如果我而家拎支煙出黎食，你會唔會用水淋我架？」「我會即刻除褲向你耍聖水，收拾你呢隻小妖精。如果你驚我之後會對付你，不如你而家先下手為強喺床上收服左我先啦。」Miki聞言之後大笑：「你真係死剩把口，就算我而家肯同你上床你都唔肯啦。你個妹頭先話我聽你根本純情到不得了，同之前個女朋友拍左成年拖先敢上床，更何況你個心仲有Daisy……呀講起Daisy，你知唔知佢黎緊請左幾日假好似話係去旅行呀？」我聽到之後有啲錯愕，因為我事前完全無聽過Daisy話要去旅行，雖然係短程幾日，但佢敢都唔同我講真係令我有啲傷心。Miki可能睇得出我面上難掩嘅黯然之色，佢半帶玩笑咁講：「有無搞錯呀，男人老狗小小事都唔開心，佢又唔係同Evans一齊去，可能佢都係想行開下散心姐。」我無理到Miki，自顧自地行左去開左支紅酒飲(支紅酒係我喺朋友婚宴度為左回本，偷偷地拎返黎)，呢個時候Miki行埋黎搶左我支紅酒黎飲，之後用不屑嘅眼光望住我話：「你真係無鬼用架，我鍾意左Evans咁多年，幫左佢咁多，佢而家轉投左Daisy我都未有你咁頹啦。」我聽到佢咁講忍唔住扯火話：「挑我點同你姐，你係作賤自己係都要纏住個正眼都唔望你嘅男人姐，明明以你條件，你開到聲呀，大把男人排住隊黎服侍你啦。我真係唔明你架，Evans都擺到明對你無興趣架啦，你仲要咁落力幫佢把鬼咩，興其浪費青春，不如搵個另一條仔釣下蟹好過啦。」Miki面對住我嘅指責不怒反笑，佢問：「你咁緊張我做咩姐，咁睇唔過眼我為Evans付出，你唔係鍾意左我呀？」正當我想反駁之時，我竟然一時語塞唔知講咩好，呢個時候我喺腦海浮現起Daisy對我嘅指責，唔通我個心入面真係有Miki？

 

正當我陷於無從反駁嘅困局之時，我屋企門口傳黎左一陣急促嘅拍門聲，我即時襯機行出去喺打算睇下係邊個。呢個時候門外傳黎左阿油嘅怒吼聲：「唔洗旨意匿埋啦，我知道你地兩個喺入面架，你兩個姦夫淫婦都對得我住啦，我而家就要同你地同歸於盡呀。」仆街！我真係完全忘記左阿油嘅存在，喺我叫Miki上黎我屋企之前，我唔記得洗開阿油先。正當我唔知點算嘅時候，飲左酒雙頰泛紅嘅Miki一臉從容咁行埋黎，佢企左我後面，喺我耳邊細細聲咁講：「如果而家開門的話，我地就前功盡廢架啦，但就算喺度匿一世都唔係辦法架喎，James呀，你唔係好有辦法架咩，快啲諗計拆掂佢啦哈哈。」從Miki果種挑釁嘅語氣，再加上佢略帶挑逗嘅身體姿勢睇黎，我好肯定佢一早已經預計左阿油會搵到上門，我亦都肯定佢一定已經有拆解方法。我反過黎轉身將佢抱住，Miki畀我呢下突如其來嘅舉動嚇親，而且佢雙頰睇黎比之前更加紅，我話：「無架啦，我無晒計架啦。不如咁啦，反正都係畀佢誤會架啦，不如我地而家即時就地正法左先啦，咁我地都起碼唔洗死得咁無辜呀嘛。」Miki用佢曖昧又帶點挑逗嘅望住我，畀佢咁樣望一望我都不禁承認我真係有一剎意亂情迷，佢邊笑住咁推開我，邊用一把嬌嗲得令我骨頭發麻嘅聲音話：「你就想啦，等我應付佢啦。」





 

Miki推開我之後行左去開門，門外激動嘅阿油見到係Miki打開門，即時頹然地將身體挨去牆度，喊住咁話：「估唔到你真係上左黎，點解你要咁對我。」點知Miki非但唔係即時道歉又或者解釋，佢行左埋去一巴車埋去阿油度，之後用好惡嘅語氣話：「你頭先話邊個係姦夫淫婦呀，我可以發毒誓我同佢咩都無做過呀。」阿油一路喊住一路問Miki：「咁你點解要上佢屋企呀？」呢個時候我為免阿油再喺我屋企走廊度大吵大鬧，我忍唔住出聲話：「雖然我係好唔歡迎你黎我屋企，不過你入左黎我地再解釋你知啦，快啲死入黎啦，我唔想隔離左右見到我招呼你呢類核突毒男入屋呀。」阿油一入到我間屋之後，Miki就對佢破口大駡：「你點解要跟蹤我呀？我叫左你幾多次唔好查探我啲私事。總之我而家同你講，我上James度只係因為幫佢手問Sam姐啲嘢，你睇下枱面上仲有Sam姐包煙喺度。你唔信可以落樓下看更叫佢畀閉路電視你睇。」阿油畀Miki鬧到跪左喺度邊喊邊講：「對唔住呀Miki，你唔好嬲我啦。」呢個時候喺一旁幸災樂禍嘅我話：「我都幫你唔落啦阿油，你懷疑邊個都ok呀。但話我同呢隻嘢係奸夫淫婦真係太離譜啦，我覺得好侮辱我囉，Miki呢個level唔好話同我上床呀，就連佢想要黎觀戰我都要佢黑布蒙頭呀。」阿油唔敢出聲，佢只係一路喺度痛哭，而Miki就擰轉頭喺度忍笑。我見阿油呢一刻只係識無助地痛哭想乞求Miki原諒，我忍唔住再踩多兩腳：「講真呀阿油，我真係無乜見過一個女仔畀個核突毒男跟蹤完之後唔報警處理架，Miki已經算對你好好啦，你頭先仲叫佢淫婦？我知你條死毒男，你一定成日喺腦海度幻想Miki做淫婦啦，唔好畀我睇死你呀，我而家一講，你就算喊緊但都會即刻扯旗啦。我同你講呀，你啲眼淚已經夠污糟架啦，你唔好再喺我屋企度散播其他體液呀死毒男。」阿油聞言之後爬左去Miki身邊捉住佢隻腳話：「Miki你唔好聽佢講呀，我唔係咁諗你架，你唔好嬲我啦。」「嘩Miki你睇下呀，呢條友唔只叫你淫婦，佢原來仲有戀足癖架。佢而家肯定想一隻手捉住你隻腳，另一隻手就摷自己褲襠啦。」

 

Miki一腳踢開左阿油，之後冷冷地同阿油講：「我最憎男人咁易向女人跪低架啦，你如果係想我原諒你，就證明畀我睇你唔係無用嘅男人啦。」阿油聽到Miki咁講之後即刻好緊張咁話：「我好有用架，不如我畀晒啲錢你啦，我可以養得起你架。」我聞言之後即刻大笑左出黎話：「好心你啦，喺澳門輸左十幾雞都搞到要麻煩Miki，仲好意思話養得起人。等我James點條明路你行啦，而家我地同Valarie勢成水火，如果你喺呢件事上面可以立到大功的話，我保證Miki一定會對你刮目相看呀。Miki你話係咪呀？唔出聲即係認同啦，一於咁話啦，拿拿臨睇下有咩幫到我地啦，我睇好你架阿油。就算係一條廢柴都有佢嘅用處啦，例如用黎做反面教材教育下一代唔好成為廢柴。你都一定有小小用處架，加油呀廢柴，呀唔係，加油呀阿油。」Miki呢個時候無再出聲，只係拎返自己個手袋就行出門口，而阿油都即刻起身追左出去。不過我相信阿油呢一刻應該會更加落力地去幫手，復仇者聯盟當多左呢一個咁肯賣命嘅成員都算係今時嘅另一個收穫，呢個時候我收到Daisy嘅whatsapp，佢話：「我呢幾日想行開下，一來你堅持我會有危險，咁我就聽你話出去避下；二來我亦都想行開下諗一諗我同你嘅關係。可能你會覺得我一時一樣，好難捉摸，不過我嘅前度真係傷得我好深，果啲唔好嘅經歷令我好難再相信愛情……點都好，我唔知你黎緊會做咩，不過都小心為上啦，遲啲見。」我望住Daisy個whatsapp，再諗起Miki先嘅問題，呢一刻我發覺我連自己想點都唔多明白。