今日我開始左對公司啲同事進行復仇大計: 第二十二節
尋日畀Evans知道我同Daisy每朝都會一齊食早餐之後，佢提出佢都想加入，而且佢仲邀請埋Miki一齊黎食。雖然我心入面萬分不情願，不過為免得失Evans，再加上我想從Evans同Miki嘅互動尋找蛛絲馬跡，所以我唯有犧牲我同Daisy嘅獨處時光。喺早餐果陣，我故意唔多出聲，等佢地自由發揮。雖然個早餐只係大約一個鐘，不過我已經從佢中得知左幾樣嘢。一：Evans同Miki喺大學果陣只係普通朋友，而且Miki喺當時應該唔多起眼，Evans由第一見返Miki到呢一刻為止，我起碼聽左佢講幾次話Miki靚左好多；二：Evans呢一刻係單身，而我直覺話畀我知佢對Daisy同Miki都有啲興趣；三：我樓下間茶餐廳個老細原來每朝都收多左我幾蚊，同樣係一份奄列，一個通粉配一杯熱飲，我買果陣佢就話得返常餐要收三十二蚊，Evans買就可以當早餐叫，都係收佢二十八蚊……講返正題先，喺食完早餐果陣，Daisy走埋黎同我講：「從女仔嘅直覺我估到Miki應該對Evans有啲feel，其實佢地都幾襯呀，唔知佢地會唔會一齊呢？」「Miki同你都好襯架，你地又唔試下一齊？」Daisy聽到我又亂講野之後忍唔住笑左出黎，佢大力拍左一下我隻手之後就走返埋位。呢個時候又到Evans走埋黎同我講：「我想喺星期五晚約班同事去我屋企度聚下同玩下，你覺得好唔好？」「你想順手感召佢地加入反資本革命行列呀？唔好呀，你睇阿Judy Valarie果啲一睇就知佢地應該係支持葛珮帆博士果啲啦。」Evans聽到我又係亂答，佢同Daisy一樣都係笑住話左我兩句就走開。其實呢一刻我心亂如麻，因為我諗唔通Evans同Miki之間嘅關係，所以我都無乜心情去同佢地傾計。
今日阿Kate委派左我同Kathy一齊去做某啲工作上嘅嘢。我一直都無提過Kathy呢個人，唔係因為我唔記得左佢嘅存在，而係因為我同佢之間連少少交集都無。佢同其他人唔同，佢由一返工開始已經無同我講過嘢，而我亦從來無興趣同佢講野。佢係果種非常普通嘅女仔，外貌普通，打扮普通，言談普通，普通到我同佢做左個幾月同事，都唔多記得佢係咩樣。如果唔係今日畀阿Kate老點我同佢一齊做嘢，我相信就算再同佢做多十年同事，我都未必會同佢講到一句嘢。話雖如此，我係唔介意畀佢無視，不過有時佢啲態度真係好奇怪。就好似今日咁，我明明叫左佢十幾次，佢都唔應我。畀著平時佢唔應我我都無乜所謂，不過由於呢排我實左有太多嘢煩緊，而我同佢又真係有樣工作急住要完成，我忍唔住走過去大聲同佢講：「Kathy小姐，我叫左你十幾二十次啦，而家工作時間，你禮貌上係咪都應該回答我呢。」Kathy聽到我咁講之後，佢非但無露出半分歉意，相反佢仲青根暴現，好大力咁拍枱。全公司都畀佢呢一下拍枱嚇親，佢跟住就對住我破口大駡：「仆你個街，我叫Katy，唔係Kathy呀。我喺度做左差唔多兩個月同事啦，就得你一個成日叫錯我個名，就連喺email都打錯，我已經專登send左個email畀你糾正你啦，點知你到而家都仲係叫緊我Kathy，你識唔識尊重人架。」講完之後佢就好嬲咁走左出去。Evans立刻走埋黎叫我追出去道歉，本身我就唔會理呢啲咁任性嘅後生女，由佢自生自滅架啦，畀人話兩句就發返我脾氣轉頭，仲要走左去，真係畀人縱到壞晒。不過Evans出到面叫到，我唯有死死地氣跟埋出去……
「慳返你啲所謂道歉啦，成間公司個個都唔尊重我架啦，唔只你一個。」Kathy…呀唔係，係Katy喺後樓梯一見到我追出黎就破口大駡，佢繼續鬧：「我知呀，成間公司個個女同事都係靚女，得我唔係呀嘛，我認命架。佢地其實女仔睇唔起我我都慣啦，不過我最嬲係連你地呢班咁甩頭甩骨嘅男人都無視我。」唔知點解聽完佢呢句話之後，我諗起前晚阿輝喺經過佢個位，真係完全當佢無到，諗到呢度我忍唔住笑左出聲，我嘅笑聲當然激到佢仲嬲，佢鬧得越黎越大聲：「你個人渣笑咩呀，你覺得自己好得戚咩？當日你搞咁多野玩Daisy果陣，我教佢色誘下你，你已經輸晒啦，你咪又係死狗公一隻。不過你好彩，Daisy生得咁人頭豬腦，我教佢色誘你，點知連佢自己都動埋真情，佢咁蠢呀抵佢成日畀男人呃啦。」聽到佢呢句說話，我嘅腦海突然一片空白，我唔知阿Kathy.,.呀唔係係Katy呢一刻係咪講緊真話，不過由於太震撼，我唔識畀反應我，佢繼續鬧：「你地成間公司啲人都係痴線架，仲有果個Miki，佢同你一樣剩係識搞埋啲小動作。你估你兩個人真係好醒做咁多嘢都無人知呀。我由同Miki一齊入職果日已經知道佢係有目的而入黎，佢同你兩個真係天生一對呀，公司遲早畀你呢啲啲人搞死呀。我過埋新年唔做架啦，公司有你地呢啲人根本做唔到落去架啦。你死返入去啦，唔好浪費時間做戲同我道歉啦。」我聞言之後答左句：「我追出黎問你要唔要紙箱執野走人咋，我根本無諗過道歉，係走就快唔好等下個禮拜啦Kathy。」講完之後我轉身就走，我好想即刻行返入去搵Daisy同佢再深入詳談下，不過理智阻止左我咁做，而家都未係時候……