我娶左個台妹做我老婆啊！: Chapter 6

一上到車，我就較好個位置，著左車。架Stepwgn我都好耐冇揸過，用返CVT波箱我都好唔慣。而操控方面當然冇得同EG比較啦，話晒個Market定位都唔同，不過真係車住一家人真係開心既，而且仲有嘉欣坐我隔離，簡直係人生一大樂事。

我地四個就好似一家人咁樣，齊齊去遊車河，享受呢個家庭樂。

「係咪好唔慣呢？」我問嘉欣。

「唔怕啊！呢到同台北好似啊！你唔好唔記得我係香港出世架！只係上落方向係相反姐。」嘉欣微笑地講。

「嘻嘻！不過台北我以前有去過啊！覺得好親切。」我講。



「頂你啦！黎台灣又唔搵我，肯定又去夜店把妹啦！」嘉欣同我講。

「費事麻煩你啦！又唔知你個樣變成點。」我講。

「不過唔緊要啦！而家我返香港做野，到時你要帶我行港九新界喎！」嘉欣微笑，然後向我單左下眼。

嗚啊！如果你係我女朋友就好啦！但係⋯⋯唔知個傻妹⋯⋯有冇男朋友呢？？始終佢咁靚女，一定大把人追啦，輪都唔會輪到我呢啲毒撚。

行到去停車場門口，爹地媽咪提議話不如去元朗到食野。我就冇咩所謂，而嘉欣就表現得好興奮，係咁叫我帶佢去，我諗佢肯定食得台灣菜多，想食返啲香港既美食。



入元朗既話，最快就一定行大欖隧道，話咁快用左半個鐘就出到去市中心。冇理由經大山去咁On9架！

去到元朗，我地就將架車泊係元朗廣場，行去榮華到食飯。由於爹地一早已經Book好位，所以入到去都唔使等。

爹地媽咪好快就揀到食咩，然後比張點心紙我同嘉欣睇。而嘉欣就表現得好雀躍，係咁同我一睇下有咩好野食。

「你想食咩啊？」我問嘉欣。

「冇所謂啦，我咩都食架！食得飽就OK啦！」嘉欣同我講。



「咁我決定啦！」我回應佢，然後畫左啲點心交左比個Waiter。

真係估唔到嘉欣小公主好隨和，食野唔會好挑剔。如果換轉係阿Jane，一定會大發港女脾氣，開拖都似。每次帶佢出黎同爹地媽咪食飯，佢必定會黑面，好似全世界人欠左佢錢咁樣，所以爹地媽咪一直都好唔鐘意佢。當我決定要同阿Jane分手之後，爹地媽咪就變左徐小鳳上身，係咁「熱烈地彈琴熱烈地唱」。

過左一陣，啲野食到左。而爹地媽咪就好似當左嘉欣係半個女咁，係咁夾野食比佢。完全冇將我放在眼內。瞬間我就變左全家最低等既動物。


食食下，爹地突然同我講：「阿仔，陣間不如去錦田啦，去睇車啦！」

「冇啦啦睇咩車啊？」我問左一問。

「去睇私家車啦！唔通睇電單車咩？」媽咪話。

「唔使啦！我揸電單車返機場咪得囉！」我話。



「你唔好傻啦，咁嘉欣點啊？你地兩個一齊返工，唔通要佢坐電單車咁危險咩？你唔顧你自己，都要顧下嘉欣啦！」爹地話。

「咁我點啊？你要車我返工架！自私鬼！」嘉欣就Cool住我條頸搖我，搞到我頭都暈埋。

「不如我地投票啦，要求盧頌賢買私家車既舉手！」媽咪話。

結果爹地、媽咪、嘉欣都舉手，今次我終於都投降啦。睇黎我以後都要揸私家車返工啦！雖然我表面說不，但係我身體好誠實⋯⋯只不過⋯⋯我唔想買架CVT車揸，始終冇左嗰種駕駛樂趣。

食完飯之後，今次就輪到爹地揸車，媽咪坐前面。而我同嘉欣就坐後面，而我爹地揸車就好似啲職業司機咁，快得黎又會好安全好定，所以我地坐佢車都可以好放心。

用左十分鐘，我地就到左錦田，呢到同市區好唔同，有一種好獨特既鄉郊文化，沿途都冇咩OK同7仔。