［愛情純愛］由嗰一個Kiss開始，我地唔再係青梅竹馬: 122. 誰！？

望住梁玥嘉嘅笑容，宋千辰壓抑唔住內心嘅好奇，開口問道：「嘉嘉，你⋯打算幾時比答覆我⋯？」

梁玥嘉微笑側着頭望住宋千辰，宋千辰意識到自己好似太過急進

「我只係隨口一問，唔係逼你⋯！」宋千辰頓時講道，心裏有啲慌張，怕梁玥嘉會嬲佢嘅急進

「嘻嘻⋯唔會要你等咁耐嘅～」梁玥嘉甜甜一笑講道，「係咪？」

「點知你！」宋千辰伸手輕輕地拍咗梁玥嘉嘅額頭一下



梁玥嘉掂起腳尖，雙手攬住宋千辰嘅頸，額頭靠喺宋千辰嘅膊頭上，成個人都向前傾，幾乎係成個人嘅重人都落晒喺宋千辰度

宋千辰企得穩穩陣陣，要成為梁玥嘉嘅重心點當然冇問題

梁玥嘉諗起今日同李穎容講起關於楊楠恩係唔係中意宋千辰嘅事，梁玥嘉心中都有啲好奇到底係唔係真，不過呢一刻佢問唔出口⋯

⋯

大家喺小息嘅時候圍埋傾計，梁玥嘉坐喺宋千辰嘅枱邊，順手地就拎起放喺枱角嘅水，直接就開蓋飲



宋千辰喺梁玥嘉拎咗支水兩秒後伸手想拎枝水嚟飲，但卻發現枝水唔喺枱上，便開始周圍搵，睇下櫃桶睇下地下

「搵咩呀？」坐佢身後嘅霍思傑見佢忽然間喺度搵嘢便問道

「我枝水⋯」宋千辰伸手入櫃桶摸咗兩摸，但卻摸唔到枝水嘅存在

「喺我度。」梁玥嘉飲咗一啖之後，將水樽蓋擰番緊之後遞番比宋千辰，「口渴～」

「哦。」宋千辰毫不在意地點點頭，然後接過枝水，擰開樽蓋飲咗一啖



梁玥嘉下意識望向楊楠恩，發現同楊楠恩對上咗視線，梁玥嘉微微側一側頭，微微一笑，但佢呢個微笑帶咗一點炫耀嘅意味

楊楠恩望到梁玥嘉嘅微笑，怔了一怔，佢察覺到梁玥嘉嘅笑容同平日唔一樣，夾雜咗啲「雜質」喺入面，楊楠恩感覺到⋯敵意！

去到放學嘅時候，大家打算一齊走，呢個時候梁玥嘉話佢先去一去洗手間

「呀～差啲唔記得咗Miss叫我落去拎番份嘢。」楊楠恩忽然將書包除咗落嚟，「我落一落去先～」

「哦，好呀～」李穎容點點頭，然後望住楊楠恩衝出課室，往前梯行去

梁玥嘉行入廁所，放學之後嘅廁所通常都冇咩人去，梁玥嘉行入第二個廁格，佢特別中意去第二個廁格

此時聽到有人入咗嚟廁所，然後從廁格門下嘅門縫見到有一個影喺門前經過，不過梁玥嘉都冇多理會，畢竟佢專心去廁所就係

去完廁所，整番好條裙之後，轉身去沖廁，打算轉身行出去洗手嘅時候，手啱啱掂到門鎖嘅時候，忽然一桶水從門上面淋落嚟



「呀！！！」梁玥嘉頓時尖叫起嚟，一整桶凍水從上面淋落嚟，梁玥嘉由頭濕到落腳，凍水滲進衣服嘅每一個角落

喺廁格門下嘅黑影好快地消失咗，然後就聽到閂門聲，梁玥嘉一下子打開廁格門，淋佢水嘅人早已消失得無影無蹤

「邊、邊個尖叫呀？」比突如其來嘅尖叫聲所嚇親嘅霍思傑講道

「好似係喺toilet傳嚟⋯」李穎容都愣住了，「玥嘉唔係喺廁所咩！」

宋千辰聽到之後第一時間衝出課室朝女廁跑去，李穎容等人都跟喺佢身後；宋千辰企喺女廁門口，李穎容跑到嚟，一下子推開女廁嘅門，見到梁玥嘉好似落湯雞一樣喺廁格行出嚟，梁玥嘉自己都嚇到呆咗，個腦都Hang咗機

「咩事呀？」李穎容行入去女廁，行到梁玥嘉嘅面前，霍思傑企喺門口頂住道門，「你除咗件冷衫先啦！件冷衫都濕晒啦！」

梁玥嘉聽李穎容嘅說話，打算將身上濕淰淰嘅冷衫除落嚟，喺李穎容伸手打算幫梁玥嘉將冷衫掀起少少嘅同時，宋千辰叫住咗佢：「李穎容！」



宋千辰將身上嘅冷衫除咗落嚟，然後將冷衫扔比李穎容，李穎容穩穩妥妥地將冷衫接住

梁玥嘉背向門口，李穎容企到梁玥嘉嘅背後，同梁玥嘉背對背企，面對住門口，為梁玥嘉擋一擋，因為門口企咗一堆想知發生咗咩事嘅人

梁玥嘉將冷衫除落嚟，著咗宋千辰件冷衫，雖然有啲大件，但身上終於有一件係乾嘅衫

「發生咩事呀？」啱啱上番嚟嘅楊楠恩喺呢個時候從課室嗰邊跑到嚟廁所門口，望向企喺門口嘅張子萊

「啱啱梁玥嘉比人淋咗成桶凍水⋯」張子萊望向楊楠恩講道

楊楠恩一臉愕然，此時梁玥嘉同李穎容喺廁所行出嚟

「好凍⋯」梁玥嘉打咗個冷震，抱着雙臂






IG Link: https://www.instagram.com/nd_cotttoncandy/?hl=zh-tw