自從女神做咗我讀者之後: 可柔視角（一）
我叫黃可柔，我係好多人口中嘅「女神」、「娘娘」。我係學校表面上好似有好多朋友咁，但係我知道佢哋全部都係虛偽嘅人，個個係我身邊都係為咗俾更多男仔留意到，點解？因為當我係一個空間嘅時候，我感覺到周圍嘅視線都望落我到，無論男仔定女仔都係。如果唔係我有一個好啲嘅樣，我覺得佢哋全部都會離我而去。
每年都會有幾個男仔追求我，但係無一個係了解我，包容我，全部都係鍾意我個樣，想威,想向周圍嘅朋友晒佢有個靚女朋友揸麻。
除咗一個人，佢叫Michael，佢係一個大我一年，係隔離學校讀書嘅男仔。我係一個巴士站到認識咗佢，我哋每日都搭同一班巴士返學放學，佢有時又坐我隔離，當佢坐我隔離嘅時候，我哋都會傾偈，自然我哋就熟絡，我哋開始一齊食飯，一齊約出嚟行街，最後，我哋一齊咗。但係我無周圍同人講，因為我屋企同佢屋企都唔想我哋咁細個拍拖，我哋亦唔想周圍嘅人都知，加上我哋都覺得呢樣係好私人嘅嘢。係我哋嘅交談入面，我覺得佢係一個好為女朋友著想，又係一個細心嘅人。但係去到我中學3學期尾嘅時候，佢開始話要返parttime，所以我哋少咗好多二人世界嘅時間。每當佢話parttime陪唔到我嘅時候我都好唔開心亦都好自責，因為一方面我想我男朋友陪我，但係如果我無理取鬧，係都要佢陪我嘅話，咁樣我就變成一個自私，野蠻嘅女朋友。
「唔得架，男朋友已經咁忙，你體諒佢架！體諒！體諒！」我拍咗我塊面幾下，希望自己冷靜啲。
「咁邊個體諒我阿！」但係我個情緒都係爆發咗，我係個刻喊咗，我真係好想有人可以陪我，有人聽下我講廢話，有人可以陪我消磨時間阿。
係我情緒冷靜完之後，我打開咗紙言呢個app嚟打發我嘅時間。
「詩？咁得意嘅，打開睇下先…」就係咁，我睇完幾篇之後見到佢有留低ig id，我就係ig到聯絡佢。
係之後，我哋開始熟絡，每當男朋友唔得閒，我就搵個個菠蘿先生傾幾句，男朋友一搵我，我就即刻去覆佢，好怕就咁錯過同佢傾偈嘅時間。
菠蘿先生俾我嘅感覺同Michael係我哋啱啱識嘅感覺好似，好似充滿Michael嘅影子咁，都係咁溫柔，係一個好好嘅人。我有陣都會諗其實會唔會係我將Michael代入咗佢嗰度，將佢變咗Michael嘅替代品，攞佢嚟滿足Michael陪唔到我嘅時間，根本就唔係真係攞個心出嚟識佢。咁樣同我啲「朋友」有咩分別？可能我嘅本性都係咁，只不過我係學校係俾人利用，而家我係利用人。
「你係唔係度阿？我好想搵個人陪下我阿。我而家好唔開心阿。」其實我都知唔會有回覆，只不過係俾個希望自己，希望Michael返工偷睇手機，然後可以理下我。點解我咁唔開心？我今日收到我嘅成績。我唔明阿,點解阿？點解我用咁多時間，日溫夜溫都係咁？我見Michael過咗咁耐都無搵我，我就去搵菠蘿先生。我將我心入面嘅問題都問晒佢。
「係架，一分耕耘未必有一分收穫，但係你唔耕耘，你唔努力，就一定唔收穫。我相信你已經盡力啦，既然件事已經過咗，就由佢停留係過去啦。」當我見到呢句嘅時候我竟然喊咗，唔係因為佢安慰得我好好，而係佢有聽，有陪伴我。點解？點解係我最需要人陪嘅時候我竟然要搵一個素未謀面嘅網友嚟陪我？點解我唔係搵我嘅朋友，搵我嘅男朋友？我都唔知…可能我覺得得佢先會陪我，先會係個刻肯聽我講廢話嘅人…
有一日，Michael竟然主動搵我。
「bb不如我哋行街囉。」平時我問佢都話要返工或者攰嘅佢係今日竟然得閒搵我，咁我緊係想陪佢啦。但係屋企人唔俾我出街，佢哋唔想我呢個時間感染肺炎，所以就算cici佢哋叫我出街我都唔答應，但係我真係好想陪我男朋友，就係我內心不停諗好唔好出街嘅時候。
「算啦，出一陣姐，好快就返嚟架啦。」呢個想發係我心入面萌生。
「好阿，我哋去邊度行阿？」我係已讀佢幾分鐘之後終於覆返佢。
「我哋去深水埗西九個邊阿，我想換一換我電腦嘅零件。」
其實我唔係好想陪佢去個邊，不過難得佢有時間，就算我嘅唔願意都唯有陪佢行下啦。
「好阿，我哋係西九到等阿。」
就係咁我哋行咗一兩個鐘黃金，我有啲急，想去個廁所，但係Michael又好似未揀好咁。我唯有自己行開，去個廁所。
「bb你慢慢睇啦，我去個廁所再返嚟呢度搵你阿。」
同我係商場個廁所出返嚟嘅時候，有個染咗金色頭髮，一望就知唔係好人嘅男人行埋嚟。
「靚女,一個人阿？陪哥哥去食餐飯阿，你唔想咁快食都ok個喎，你俾你聯絡我阿，我哋到時再約都ok個喎。」
佢用一個挑逗嘅眼神望住我，但係我俾佢逼咗埋一個角落到，我好希望有人可以幫到我，但係我不斷望周圍嘅人，似乎無一個想過嚟幫我趕走佢。
「我…我…我…」我唔敢直接望個個男人，我亦都好想快啲走但係個刻我完全唔知我應該點做。
「bb sorry阿我揀耐咗。你啱先話去個廁所你搞掂未阿？搞掂就行啦，我哋去睇衫啦。」突然之間有一把男聲係我隔離，我以為係Michael睇完嘢發現我係到嚟幫我，點知原來係我其中一個同班同學，黃浩軒。我完全估唔到係佢，因為我哋平時都唔會傾偈，更加估唔到佢會係呢個時候幫我。
後尾佢趕走咗個男人，係個一刻我發覺原來佢係一個幾man，肯為人挺身而出嘅人。但係後尾Michael終於發覺我去太耐都未返去個舖頭所以就嚟咗搵我。我為咗唔想俾黃浩軒知更加多我男朋友嘅嘢，因為我怕佢返學會將呢件事周圍講，所以我就連多謝都無好好講就拉咗我男朋友急急腳咁走。後尾我哋行咗一陣西九佢就送咗我返屋企。
就係我返到屋企嘅時候，我send左一個問題俾菠仔。「你覺得男女朋友最需要咩？你覺得陪伴重唔重要？」呢個同時都係我想問自己嘅問題，我唔明點解Michael成日都陪唔到我，咁我拍拖仲有咩意思？