我倆的緣份，於半世紀前已經開始: 八掛

星期一返學，我一去到我班級果一層就已經見到OV笑得好甜咁行過
 
「喂!!!蜜運緊呀妳?笑得咁甜嘅?」
 
「呀….邊係喎」
 
我放低左書包後就走過理科班果邊繼續八掛「點呀?同我哥哥有咩計傾呀?甜得妳個樣丫」
 
OV個樣真係甜到漏咁，無時無刻都係到微笑
 




「唔…佢教我功課咋…暫時都係咁樣」
 
「妳借D意搵佢傾計咋?妳都要問人功課架咩，太陽由西邊升起囉」
 
「咁…都要慢慢黎架…」OV愈講愈細聲，然後Silvia就係背後大叫
 
「喂!!!!OV話佢唔識功課呀!!!大家覺得有冇可能呀??有個Queen屎仔教緊佢功課呀喂!!!」
 
「喂!肥鴿!!唔好亂講啦」
 




係女校，永遠都係呢D花邊事情最轟動，一時間，我地三個俾好多同學圍住
 
「OV妳有男朋友呀?」 「咩人黎架?邊到識架?」 「靚唔靚仔架?」
「介紹佢D同學俾我地識啦」
 
呢D問題此起彼落，OV塊面愈來愈紅
 
「我…呀…我…」
 
睇見佢咁慘，係時間幫佢解圍架啦




 
「教佢功課果個呢，係我哥哥」
 
「下?沙律妳好似係獨生女黎架喎」 「係囉，妳係英華家族嘅獨生女嘛，邊到有哥哥呀」
 
「哦，正確d黎講，果個係我青梅竹馬嘅契哥，佢爸爸係我婆婆契仔，我媽咪契哥」
 
「咁佢係咪恐怖鴨呀?」喂!呢個名我鍾意呀!
 
「根據媽咪同婆婆所講，佢兩父子係英華女校最後兩個女校男生，兩父子都係英華分別識到同埋重遇佢地太太」
 
「嘩….好浪漫呀….」
 
「咁佢地而家點呀?」我班同學愈來愈八掛
 




「唔….老契爺老契媽已經過左身好多年啦，留低左兩姊弟相依為命，所以我婆婆就照顧埋佢地兩個」
 
「咁有冇D愛情故事聽呀?」大家非常興奮
 
「唔….都有嘅」
 
「點呀點呀?」
 
「原來老契爺一直都係鍾意我婆婆，不過佢最後揀左老契媽，到佢臨過身之前，送左條鍊俾婆婆，而婆婆將佢俾左媽咪，想佢代替自己嫁俾我契爺，完成佢地願望」
 
「但係…沙律妳唔係姓程架喎」
 
「嗯，媽咪由細細個開始已經鍾意契爺，不過佢都同婆婆一樣，爭輸左俾契媽」
 
「咁可憐?Charlotte妳話過妳好似妳媽咪，一樣咁靚，莫非妳契媽再靚d?」




 
「嗯….我都係覺得媽咪靚過契媽，不過契爺係未夠10歲就話要娶契媽，佢地係小學同學，之後係英華重遇，契爺仲係畢業典禮向契媽求婚，同老契爺一樣」
 
「仲有呢?」
 
「契爺有一個女兩個仔，大家姐個中英文名同我媽咪一樣」
 
「咁浪漫?」
 
「因為我媽咪係契爺心中好重要囉」
 
「咁佢地有冇訂情信物呀?」
 
「下…..」
 




「當然有啦!!!!果樣野而家係Charlotte身上架!!!」
 
「嘩!!!係咩黎架」
 
「係一條鍊，我前排先知老契爺係打左兩條鍊，兩個鍊咀可以組合成心形，心中有個梅比斯環」
 
「妳有一條丫….咁另一條呢?」
 
「另一條呢…就…唔講」
 
「呀!!!!唔好吊我地癮啦」
 
「另一條係佢契哥身上呀!!!!」Silvia又做我代言人啦
 
「咁OV…..妳咪同Charlotte爭男朋友?」




 
「下….」OV用絕望眼神望住我
 
「唔會啦唔會啦，我契哥成碌木咁，我點會鍾意佢」係女校，應該係話係女仔嘅朋友世界，做姣婆同搶人男朋友係死罪，不可原諒