全實景系列《香檳大厦 1:55 am 行人止步》重製版 (已完結): 第十章：【未知區域】

第十章：【未知區域】

01:55 – 香檳大廈B座7/F

阿Ken估都估唔到佢會跌入一個地窿，更加始料不及嘅係，佢宜家被困喺一個進退為艱嘅局面。

佢卡住咗喺下一層樓嘅地板上，動彈不得。





喺八樓嗰間尾房嘅床下底跌落下一層，理應到達樓下七樓，但阿Ken無喺七樓停低，雙腳一掂到地面就再直接陷入去，一直去到胸口為止先停低。

迷糊嘅阿Ken覺得極之混亂，由佢喺床下底見到嗰個頸椎疑似折斷嘅人到宜家，都只係十幾秒鐘嘅事，驚魂尚且未定，又遇上呢個尷尬嘅情況。

好彩跌落去嘅時候，阿Ken右手本能地向上捉住條電線，宜家可以有限度咁揮動雙手，如果連手臂都卡住，恐怕佢想郁都郁唔到。

佢嘗試提起兩個膝頭，發現可以上下自由郁動，甚至將膝頭屈起甚至可以掂到自己腹部。即係表示卡住佢嘅夾層唔係太厚，約莫只有一呎距離。

插喺地板上面，四周圍一遍漆黑，直頭係伸手不見五指。阿Ken唯有用手向附近嘅地板摸索，感覺濕濕哋、笠笠哋，仲摸到類似紙碎，同細小嘅木板。
 




突然間，佢感覺到一個長方形，扁扁哋，質感似係電話嘅嘢，佢即刻攞埋嚟。

「電話﹗」阿Ken摸到嘅的確係一部電話，係Yolanda部電話。
 
「謝天謝地﹗」阿Ken感恩自己係慌亂之中仍然有捉緊部電話。

阿Ken撳著部電話，螢幕中除咗主頁畫面外，仲有一啲紅色而又稀薄嘅液體喺上面，被手指摸到化晒。

佢唔理得咁多，即刻開著電筒App，白色嘅光由手提電話中射出，然後，佢被身邊嘅情境嚇呆。





阿Ken發現自己被卡喺房間嘅中央。而地面、牆身，一直到天花板，都濺滿晒紅色嘅液體。唔見到都唔覺，佢開始覺得空氣中瀰漫住一陣血嘅腥味。

「血？咁多？」阿Ken心入面嘅寒意驟升。

佢身處嘅環境好靜，但喺寂靜之中，仍然聽到一啲聲音，一啲類似手指甲刮著木板嘅聲音，節奏有時好平均，有時又好亂。
 
「呯﹗呯﹗呯……呯﹗」
 
突然，四下實在嘅撞擊聲喺不遠處嘅牆邊轉角後傳出，呢個熟悉嘅聲響，令阿Ken聯想起之前幫阿媽去街市買豬骨煲湯，豬肉佬手起刀落，將刀劈落砧板嘅聲音。

電筒光照過去，赤色嘅牆角未有任何動靜。佢忍住道氣，唔敢呼吸亦唔敢郁，靜靜咁用電話射住嗰個轉角位。

「呯呯」聲亦靜止落嚟。
 
阿Ken知道係呢個空間中唔止得佢一個人存在。而呢個血紅色嘅環境加上「呯呯」聲，佢只能聯想到兩個字：「屠房。」





阿Ken好緊張，想快啲擺脫宜家呢個困境。佢放低電話，將電筒嘅光向上射，成間房都充滿住恐怖嘅血紅色氣氛，佢再嘗試用手向下大力按，想撐起深陷喺地板嘅身體，但雙臂可屈曲嘅角度大細，唔足以畀佢發力，而且地板上嘅血太滑，佢試咗好幾次都唔成功。

佢四周圍望，想搵嘢借力爬返上去，可惜喺房間嘅中心，無任何嘢可以幫到佢將身體由地板中間拉起。

突然，手指甲刮木板嘅聲又傳出，阿Ken嘅腦一遍空白，只有凝視住轉角位置。

一個黑影喺轉角慢慢行出嚟。阿Ken從下而上，先望到一對著住水靴嘅腳，然後係一條畀大肚腩撐住嘅白色圍裙，佢嘅左右手分別攞住一把切肉刀，同埋一隻手。

手？﹗

阿Ken驚自己會失控叫出嚟，即刻用手掩口，亦無理會手上嘅血會整污糟自己塊面。佢知道呢個黑影，就係嗰個佢喺閉路電視見過，追住黃經理同Fiona嘅豬肉佬。

眼前嘅豬肉佬仍然套住一個大大嘅鐵面罩，遠睇就好似戴住一個頭盔。佢好慢好慢咁行出嚟，攞住嘅一隻斷手仍然滴緊血。呢隻斷手，由手掌背面到手臂都佈滿龍形圖案紋身，而手臂嘅肌肉亦十分發達。





佢似乎唔發覺大廳入面多咗個人，喺阿Ken個頭一呎附近行過，阿Ken掩口閉氣唔出聲，心跳得極快，非常擔心旁邊嘅電筒光會出賣佢。

阿Ken嘅視線無離開過豬肉佬，望住佢走入另一個房間。透過微弱嘅光線，佢見到豬肉佬用個手掌咁大嘅鐵鈎勾起隻斷手臂，掛喺牆上面，呢個時候阿Ken先留意到，房入面成幅牆都掛滿晒被勾起嘅斷手，毛骨悚然。
 
睇到呢個情境，佢嚇到鬆咗手，終於都「啊」一聲咁叫咗出嚟。

聽到自己嘅叫聲，阿Ken左手再次掩口，右手快速遮住電筒嘅光源，成個大廳即刻變返做漆黑一遍。只有佢右手壓住嘅光源，喺地下形成一個暗暗嘅紅色光影。

突然，一陣快速而又沉重嘅腳步聲，由滿佈斷手嘅房間傳出。阿Ken感覺到呢陣腳步聲正向大廳呢邊行近，心諗：「弊﹗」。

一股濃烈腥臭味撲入阿Ken嘅鼻孔，而且附近嘅空氣溫度驟然下跌，甚至覺得有啲凍。
 
阿Ken隱約見到豬肉佬已經企咗喺佢前面，暗暗嘅光線投射喺豬肉佬嘅腳邊，只差半吋就會踩到阿Ken嗰隻撳住電話嘅手。

阿Ken雙腳喺地板下面前後扭動，想賺多少少空間，等自己可以向下滑落。無奈佢嘅胸肌都有少少份量，卡住咗唔係咁容易過到，但佢仍然不斷搖，嘗試偷位，而夾板層就發出「索索」嘅聲音。





喺拚命掙扎嘅時候，阿Ken並無留意到，原來豬肉佬已經喺黑暗中低頭向下望住自己，佢彷彿聽到木板磨擦嘅聲音。事情有啲唔對路，所以佢停低無再搖，而且感覺到有嘢正在哄埋嚟。

阿Ken知道，豬肉佬已經發現咗佢﹗

佢心入面嘅恐懼越嚟大，腎上腺素急升，無顧及電筒嘅光就縮起雙手。縮手嗰一刻，可以清楚見到，豬肉佬個面罩就係面前。阿Ken見到頭罩入面嘅雙眼，呢對眼亦同時望住阿Ken。

有眼，但無珠。只有一片眼白，並無瞳孔。

面對眼前呢隻怪物一樣嘅豬肉佬，阿Ken並無向恐懼感屈服，佢雙手並推，一下就推開豬肉佬個面罩，然後出盡力用手踭敲鑿卡住自己嘅地板，務求盡快脫身：「我要走，我唔要死喺度﹗」

人有時發起茅上嚟嘅破壞力一啲都唔少。阿Ken出盡全力，上又敲下又搖，感覺到身體有少少向下移，開始郁動到多少少，佢再發力係咁用手踭鑿落去，地板發出清脆嘅「啪啪」聲響。

豬肉佬被阿Ken推到向後一搖，但未有跌倒。佢知道阿Ken嘅位置，嗰隻攞住切肉刀嘅右手已經舉起，準備向阿Ken劈落去。





阿Ken視線一直望住豬肉佬，手踭一直鑿，睇住佢把刀舉起，向自己面門劈落嚟。
 
忽然間腳下一緊，有人拉住佢雙腳一扯，身體就向下沉。佢睇住豬肉佬把刀喺眼前一吋劃過，直劈入地面。
 
隨住阿Ken整個人向下墜，豬肉佬亦消失喺眼前。

由卡住嘅空間，再跌入下一層。「轟」的一聲，阿Ken跌咗喺地，頭部猛烈撞向硬淨嘅地面，佢感覺到一陣劇烈嘅暈眩，然後就昏昏沉沉失去知覺。

「阿Ken……阿Ken……」有把聲不斷叫佢個名。

喺佢暈倒之前一刻，阿Ken望住天花板，天花板並沒有任何破爛。

然後有一個熟悉嘅身影隨即出現，遮住咗佢望住天花板嘅視線。

阿Ken認得呢個人，用盡力氣叫佢個名：「阿琛……」

(待續)