【全劇終】《我喺街執咗個失憶嘅女仔返屋企》: 原定誕生日（下）

花咗成個鐘頭車程，終於嚟到。
 
四周充斥熟悉嘅花香味，而且雖然係假期，但唔係特別節日，所以冇乜人。
 
「你確定你要入去啦嘛？」我最後一次問小悠。
 
佢抬頭，橫視裏面環境：「…墓地？」
 
「嗯。」我冇特別停落嚟，直接走到要去嘅位置。
 




小悠冇再追問，只係靜靜跟住我。
 
去到一塊小小嘅墓碑前，我停低腳步。
 
墓碑上只有寥寥可數嘅幾個字同埋一個日期，甚至連相片都冇。
 
「你好嗎？」我對住墓碑講，同時將手上嘅花放喺地上。
 
小悠居然冇笑我對住個碑自言自語，反而問：「佢係…？」
 




我聳一聳肩：「我有冇同你講過，而家嘅阿妹其實唔係我親生阿妹，喺佢之前，我本來應該有個準備出世嘅阿妹——今日係佢預期嘅生日。」
 
「準備出世？」
 
「嗯，但最後都係冇機會見到佢出世。」
 
小悠冇再講啲咩，反而令我覺得氣氛有啲尷尬，於是我對住個碑講：「今年我帶多咗個人嚟探你，開唔開心呀？」
 
然後同小悠講：「…我慣咗每次都會同佢傾一陣計，如果你覺得悶嘅不如出出面等我？」
 




小悠搖搖頭：「我留喺度就可以，定係…我唔方便喺隔離聽？」
 
我搲頭：「都唔係嘅。」
 
話雖如此，我都係冇足夠恥力喺小悠面前對住個墓碑自言自語，所以只係靜靜地清潔墓碑嘅四周。
 
沉默咗一段時間，我偷偷瞥向小悠，因為我發覺佢靜得太耐。
 
雖然頭先叮囑過佢唔可以喺呢度嘈，但一句嘢都唔講真係唔似佢作風，或者係呢個地方本身令佢唔慣（？
 
所以，我決定由我呢邊打破沉默：「明明未出世，都要幫佢立個碑，好奇怪呀可？」
 
小悠向我望過嚟，我繼續講落去：「記得嗰陣我仲係5歲，阿爸阿媽有一日好開心咁同我講，我就嚟多個阿妹。」
 
「因為嗰陣興玩爆旋陀螺，你知啦要兩個人先好玩架嘛，所以知道會有多個人同我玩之後，我真係期待到唔識形容。」




 
一路講，一路回憶起已經逐漸變得模糊嘅心情。
 
「然後，有一日阿爸突然同我講，bb可能搵到一樣比爆旋陀螺更好玩嘅玩具，於是乎就唔嚟我地屋企喇，我問咁佢會去邊，阿爸就話去一個好幸福嘅地方。」
 
小悠一直冇講嘢，靜靜地聆聽。
 
「我喊晒口咁話我想同佢一齊玩，阿媽嗰陣為咗安慰我，就講咗一句令我好深刻嘅說話，佢話無論分隔幾遠都好，只要心入面有嗰個人，咁就已經足夠，就係愛佢嘅表現。」
 
「明明嗰陣我應該係聽唔明，但之後每次諗返起呢句說話，我就會收返起啲眼淚，改用自己嘅方式去記住佢。」
 
阿爸阿媽最後為bb立咗眼前嘅墓碑，呢個係佢地記住bb嘅方式。
 
而我，就因為bb而開始畫畫，因為嗰陣時嘅我想用畫畫呢個方式嚟記住冇嚟到呢個世界嘅佢。
 




不停畫、不停畫，但隨住時間過去已經唔知放晒去邊。
 
「呢啲嘢我未同人講過架，你係…」我緩緩抬起頭，卻發現…
 
「小悠？」
 
一聽到我叫佢，佢即刻擰轉咗身。
 
只不過，頭先嘅一瞬間已經足夠我睇清楚——
 
佢流緊眼淚。
 
我踏前一步，想要了解發生咩事，但被佢一下子阻止：
 
「唔好過嚟！」佢背對我講咗呢句。




 
「…你係咪唔想聽呀？最多我唔講囉。」
 
佢搖頭，同時用手抹去臉上嘅淚水。
 
「唔係，只係…今日嘅我有啲奇怪。」佢依稀擠壓出聲音。
 
「奇怪？」
 
我地就咁樣企咗喺度。望住佢低頭哭泣嘅背影，我忽然覺得後悔，頭先或者唔應該講啲咁嘅話題。
 
唔知幾耐之後，佢先轉過身：「頭先嘅事，阿帆就忘記佢啦。」
 
「…對唔住。」猶豫咗一陣，我向佢道歉。
 




佢搖頭：「應該係我道歉先啱，突然間就咁樣。」
 
「其實件事過咗咁耐，我唔應該再講起。」
 
「點會呢？如果佢知道你咁愛佢，佢一定覺得好幸福。」小悠講嘅佢，我知道係指bb。
 
然後，小悠將我頭先放喺地上嘅其中一朵花拎起，插咗喺墓碑旁邊：「你真係有個好好嘅哥哥。」
 
聽到佢咁形容我，突然有啲不知所措。
 
「阿帆。」
 
「…嗯？」
 
「呢段日子以嚟，辛苦你喇。」同臉上柔和嘅笑容相反，小悠講呢句嗰陣顯得有點寂寞。